EZEQUIEL 24 - Biblia Guarani Tumpa Iñee

Yapepo opupu vae re oyembojaanga vae

¹ Chaúa año re, payandepoa yasɨ re, payandepo araa pe, yandeYa jei cheve:

² “Nde kuimbae, eikuatía kuae ara regua, emoapɨta añave voi, echa kuae ara mburuvicha guasu Babilonia pegua opüa Jerusalén re.

³ Jare kuae tëta oyembopɨapochɨ chekotɨ vae pe ere rembojaanga reve: YandeYa Tumpa jei cheve: ‘Eñono metei yapepo tata pe jare eñono ɨ pɨpe,

⁴ eñono pɨpe soo ikavigüe, iugüe jare ikupegüe, jare vi ikägüegüe iñäputuu ngatu vae.

⁵ Eipɨɨ metei vecha jete kavi vae, jare eñono yepea igüɨ pe, eyatapɨ jese togüorogüoro topupu, oyɨasɨ kavi vaerä ikägüe reve.

⁶ Echa, yandeYa Tumpa jei körai: ¡Paravete, tëta guasu oporoyuka vae! Metei yapepo ikɨa oya japɨpe re vae, mbaetɨ ma oyeekɨ chugüi rami. Metei metei rupi enoe chugüi soo, opa renoe regua.

⁷ Tëta guasu pegua reta jeta yae oporoyuka; ita re oporoyuka reta, mbaetɨ oporoyuka reta ɨvɨ re, ɨvɨkúi pe tugüɨ oyatɨ vaerä.

⁸ Che aeyata jókuae tugüɨ ita re, agüɨye vaerä oyeatɨ. Aitɨ vaerä chearasɨ jese reta, aiporaraukata vaerä chupe reta.

⁹ Jáeramo, yandeYa Tumpa jei körai: ¡Paravete, tëta guasu pegua reta oporoyuka vae! Che etei tuicha ayatapɨta jese.

¹⁰ Amboatɨta jeta yepea, ayatapɨta, amboyɨ kavi vaerä soo, ambopupuasɨta, opa tɨpa regua, tókai ikägüegüe reta;

¹¹ añonota jókuae yapepo ipombae tata pe oyepiroasɨ regua, tochɨrɨrɨ ikɨa, tókai jugua pe. ¡Ikɨambae topɨta!

¹² Ërei ngatu ikɨa täta yae oya jese, tata pe ave mbaetɨ oyeekɨ.

¹³ Jerusalén, aipota tëi rotɨo yepi reyemongɨa ndekuimbae pota vae güi, ërei mbaetɨ reyetɨo. Reyetɨota chearasɨ aitɨ nderé yave ramo.

¹⁴ Che ndeYa jae vae, oyeapota ko. Che etei ko ayapota, ambopota ko cheñee; mbaetɨta roparareko, mbaetɨta aipoepɨ cheyemongeta. Aiporaraukata ndeve, ndereko oï rupi. Che ndeYa Tumpa jae.’ ”

Ezequiel jembireko imano

¹⁵ YandeYa jei cheve:

¹⁶ “Nde kuimbae, aekɨta ndegüi nderembireko güɨramoi peguaño. Ërei agüɨye eäpiro, agüɨye eyaeo, agüɨye epɨyere nderesaɨ.

¹⁷ Eiporara ndepɨa peño, agüɨye eyemonde temimonde mbɨatɨtɨ pegua pe. Agüɨye neäka-güɨrai eiko, ani ndepɨgüɨrai eguata; agüɨye nderova eñova nekañɨmaa vaerä mbɨatɨtɨ pe, agüɨye vi jeu tembíu jókuae peguarä oyeapo vae.”

¹⁸ Ndeimbove yave chemiari jeta vae reta pe, jare kaaru yave omano cherembireko; pɨareve pe ayapo yandeYa cheokuai rami.

¹⁹ Jayave jeta vae reta jei cheve: “Emombeu oreve, mbae ra oipota jei oreve kuae reyapo reï vae.”

²⁰ Che jae chupe reta: “YandeYa jei cheve körai:

²¹ ‘Ere Israel iñemuña reta pe. YandeYa Tumpa jei körai: Che aröɨro jare amboaita chero mbaemboetea, peyembotuicha jese vae, pe reta peipota yae pemae jese vae; peraɨ reta jare perayɨ reta peeya joko pe vae, opata oyeyukauka reta.

²² Ere chupe reta: Che ayapo rami etei peasata: Ngaraa peñova perova pekañɨmaa vaerä mbɨatɨtɨ pe, ani peu tembíu jókuae peguarä oyeapo vae.

²³ Ngaraa peäka-güɨrai ani pepɨgüɨrai. Ngaraa peäpiro ani peyaeo. Pekañɨteita ikavimbae peyapo jeko pegua, pepɨatɨtɨ yaeta oyoe.

²⁴ Ezequiel oikota peve metei yembojaangarä, opaete jae oyapo vae, peyapota vi. Kuae oasa ma yave, peikuaata che ko jae peYa Tumpa vae.

²⁵ Jare nde kuimbae, jókuae ara apɨ̈ro yave Israel iñemuña reta güi iñepɨ̈roa, jae ko tupao, ipöra re oyerovia yae reta, oaɨu yae reta vae. Apɨ̈rota vi chugüi reta taɨ jare tayɨ reta.

²⁶ Jayave jókuae ara, oasayepe vae outa omombeu ndeve mbae oasa vae.

²⁷ Jókuae ara neñee yeta nemiari vaerä jókuae oasayepe ou vae ndive. Nde reikota metei yembojaangarä chupe reta. Jayave oikuaa retata che ko jae peYa vae.’ ”