EZEQUIEL 23 - Biblia Guarani Tumpa Iñee

Samaria jare Jerusalén

¹ YandeYa jei cheve:

² “Nde kuimbae, yogüɨreko mókoi kuña metei ichɨ vae reta.

³ Egipto pe omboɨpɨ oasa reta kuimbae ndive; taɨrusu güive iyaguasa pota reta; joko pe omaeño opokouka reta iyé.

⁴ Tenondegua jee Ahola, jae ko Samaria, jare ipɨkɨɨ jee Aholiba, jae ko Jerusalén. Kuae reta ndive che amenda, jare imembɨ reta cheve.

⁵ Ahola che ndive oiko reve iyaguasa chegüi, iporopota iyaguasa reta jëta iyɨpɨ pegua Asiriaɨgua reta re,

⁶ jemimonde pɨ̈taü vae reta, opaete mburuvicha reta taɨrusu maepöra vae katuai, kavayu regua reta ko,

⁷ tuichagüe yae vae reta katuai. Ahola iporopota jare oiko aguasa pe jae reta ndive; jare omboete opaete jae reta itumpa-raanga reta.

⁸ Egipto pe omboɨpɨ iyaguasa pota vae mbaetɨ oeya. Taɨrusu güive oyapakua kuimbae ndive jare oasa jae ndive, jökorai oyeapo iyaguasa pota yae vaerä.

⁹ Jáeramo amee iyaguasa Asiriaɨgua reta ipo pe, jókuae jae iporopota jese vae pe.

¹⁰ Jae reta opa omonandi oeya; jare opɨ̈ro chugüi imembɨ kunumi reta jare kuñatai reta, jare jae reta etei oyuka kɨsepuku pe. Kuae jërakua yae opaete kuña reta ipɨte rupi, echa jupi rupi oiporara jeko re.

¹¹ Jare ipɨkɨɨ Aholiba oecha kuae; ërei jae oasa ete yé iyaguasa pota tɨke güi.

¹² Iporopota jëta iyɨpɨ pegua Asiriaɨgua reta re, mburuvicha reta oyemonde kavi jare jembiporu ñeraro pegua ikavigüe, kavayu regua reta ko, opaete jae reta taɨrusu jare maepöra.

¹³ Jare aecha jae oyemongɨa vi, tɨke oyapo vae jae oyapo vi.

¹⁴ Ërei jae oasa ete iyaguasa pota tɨke güi; oecha yave Caldeaɨgua reta iä ovapetea re oyeapo oñemopɨ̈ta kavi;

¹⁵ mburuvicha reta ikuakuaa ipöra yae jare iñäka-regua Babilonia pegua reta rami,

¹⁶ iporopota yae omae jókuae iägüe reta re; jare omondo ñee jerajaa reta Caldeaɨgua reta iɨvɨ pe.

¹⁷ Jare Babiloniaɨgua reta yogüeru ípɨri jare oasa reta jae ndive, omongɨa reta. Oyemongɨauka chupe reta oyuguaru chugüi regua.

¹⁸ Jökorai omboyekuaa iyaguasa pota imarambae etei vae, jökorai oechauka jete nandi, jáeramo ayuguaru chugüi, tɨke güi ayuguaru rami.

¹⁹ Ërei jeieteño iyaguasa pota, taɨrusu yave Egipto pe iyaguasa pota oiko rami,

²⁰ iyaguasa pota Egiptoɨgua reta re, echa jókuae reta ko kuña ndive ñogüɨnoi yave mburika nunga ani kavayu nunga.

²¹ Nde Aholiba, jökorai reyemomaendúa ye ndetaɨrusu yave reyapogüe re, Egiptoɨgua reta opoko nderé vae re.

²² Jáeramo, che ndeYa Tumpa jae körai: Amboarasɨukata ndeaguasa reta ndekotɨ, reyuguaru chugüi vae reta. Oipota rupi güi ambouta ndekotɨ,

²³ Babiloniaɨgua reta, Caldeaɨgua reta, Pecod, Soa jare Coa pegua reta, jare opaete Asiriaɨgua reta; opaete kuae reta ko taɨrusu maepöra vae mburuvicha reta, sundaro ruvicha reta, opaete kavayu regua reta.

²⁴ Yogüeruta ndekotɨ jeta sundaro reta käretou ñeraro pegua reve reve; yogüeruta opaetei neova vaerä tembiporu ñeraro pegua ndive, iñäka-ɨru jiero pegua ndive, iyeopiaka ndive; ameeta chupe reta nejäa vaerä, jae reta mborookuai güɨnoi rupi.

²⁵ Che aitɨta nderé chearasɨ cherägüɨro ramo, jae reta oiporaraasɨ katuta ndeve, oyasɨa retata netï, nenambi, jare oikoveño opɨta ndegüi vae reta, oyukata kɨsepuku pe. Opaeteita güɨraja ndegüi nemembɨ reta, jare jembɨregüe reta opata omokañɨtei tata pe.

²⁶ Opaeteita ndetɨrumboi reta, jare oyemombaeta ndembaembae jepɨ vae reñemopöra pɨpe vae reta re.

²⁷ Jökorai amboapɨta ndegüi ndekuimbae pota yae vae, ndeaguasa pota reyeapo Egipto pe vae; ngaraa ye ma reecha Egiptoɨgua reta jare ngaraa ye ma nemaendúa jese reta.

²⁸ Echa, che ndeYa Tumpa jae körai: Amaeñota rea tëtaguasu remotareɨ vae reta ipo pe, jókuae reyuguaru chugüi vae reta ipo pe.

²⁹ Jae reta nemotareɨta omae nderé, jare opaeteita opɨ̈ro ndegüi reparavɨkɨ jese vae, ndereeyata nderete nandi; oitɨrumboita nderete remee aguasa pe vae. Ndekuimbae pota yae vae jare ndeaguasa pota ramo,

³⁰ añave köraita reasa, echa reiko aguasa pe ïru tëtaguasu pegua reta ndive, jare remboete itumpa-raanga reta.

³¹ Nderɨke jeko etei remomoe, jáeramo ameeta reɨu rami chearasɨ re jae oɨu rami etei.

³² Che ndeYa Tumpa jae körai: Ameeta reɨu chearasɨ oï kopa pe vae re, nderɨke oɨu jese vae, jae ko kopa iporusu vae; nemotareɨta ïru tëtaguasu reta, ndeyóyai yóyai retata,

³³ opata reyemboai, repɨtata tëtagüerä. Nderɨke Samaria oiporara vae, ndembosavaɨpo ramita jare jasɨ katuta ndereeya.

³⁴ Opaeteita reɨu jese, javoi reyokata jókuae kopa, pɨpe rembopereta ndepɨtía. Echa, che ndeYa Tumpa ko jae.

³⁵ Jáeramo, che ndeYa Tumpa jae körai: Neakañɨ chegüi jare reyerova chegüi ramo, reiporarata ndekuimbae pota vae jare ndeaguasa pota vae re.”

³⁶ YandeYa jei cheve: “Nde kuimbae, iara ma rere vaerä Ahola jare Aholiba pe maratuta vae, eikuaauka chupe reta pɨ̈chɨi yae oyapo reta vae.

³⁷ Jae reta mbaetɨ jupi yogüɨreko cheve, oporoyuka reta, omboete reta itumpa-raanga reta. Oapɨ imembɨ reta tumpa-raanga reta pe, jókuae cheve imembɨ reta vae.

³⁸ Jare kuae ye vi oyapo reta chekotɨ: Metei ara peño omongɨa reta chero mbaemboetea jare omboeteä cheara reta mbutuu pegua.

³⁹ Imembɨ omee oyeapɨ vaerä itumpa-raanga reta pe güire, oike reta vi jókuae ara chero mbaemboetea pegua pe, omongɨa reta vaerä. ¡Jae kuae oyapo reta chetupao pe etei vae!

⁴⁰ Omondo vi ñee jerajaa ombou vaerä kuimbae reta mombɨrɨ güi, jare jae reta yogüeru; iporopota jese reta güi oyau reta, ombojovɨ reta jesakua jare oñemopöra reta oäro vaerä;

⁴¹ javoi oguapɨ reta metei tupa kavi pe, jare mesa pe oñono reta ikäti kavi vae incienso jare olivo iasaite oñeñono tee cheve vae.

⁴² Jɨapu oyeendu jeta vae reta oyapo arete jae reta ndive vae; kuae reta yogüeru ñuu güi ípɨri reta; jae reta güeru oñono poapɨ regua ipoapɨ reta re, jare äka-regua ipöragüe iñäka reta re.

⁴³ Jare che jae itɨ̈aro ma aguasa pe vae reta kotɨ: ‘¿Kuae kuimbae reta yogüɨrekota ra aguasa pe kuae kuña reta ndive?

⁴⁴ Echa yogüeru reta ípɨri, kia ou kuña jete omee vae reta pɨri rami, jökorai yogüeru iyaguasa pota vae Ahola jare Aholiba pɨri.’

⁴⁵ Jáeramo kuimbae jupi vae reta ojäata mborookuai menda re oyuvanga vae pegua rupi jare mborookuai mboroyuka pegua rupi. Echa jae reta oyuvanga menda re jare oporoyuka reta.”

⁴⁶ Jáeramo, yandeYa Tumpa jei körai: “Che ambouta ikotɨ reta jeta vae, omongɨɨye yae vaerä jare opɨ̈ro reta vaerä chugüi imbaembae reta.

⁴⁷ Jare jeta vae reta oyuka retata ita pe jare kɨsepuku pe, oyukata chugüi reta imembɨ reta, jare jo reta opata oapɨ reta.

⁴⁸ Che amokañɨta kuae ɨvɨ güi jókuae aguasa oyeapo vae. Jökorai opaete kuña reta oikuaata opɨta iyegua, agüɨye vaerä omomoe kuae kuña reta jeko ikavimbae vae.

⁴⁹ Ërei kuae kuña reta oiporarata iyaguasa pota vae re jare mbaeyoa itumpa-raanga pota vae re. Jayave pe reta chekuaata che ko jae peYa Tumpa vae.”