EZEQUIEL 20 - Biblia Guarani Tumpa Iñee

Tumpa oyapo Israel ndive vae

¹ Chiúa año re, pandepoa yasɨ re, payandepo araa pe, amogüe Israel iñemuña itenondegua reta yogüeru oparandu yandeYa pe, jare oguapɨ reta cheróvai.

² Jayave yandeYa jei cheve:

³ “Nde kuimbae, nemiari Israel iñemuña itenondegua reta pe, ere chupe reta: ‘YandeYa Tumpa jei Körai: ¿Peyu pa peparandu cheve? Che jae cheyé aeño peve, ngaraa aendu peve.’

⁴ Nde kuimbae, ere chupe reta maratuta vae, jare eikuaauka chupe reta iñemuñagüe reta pɨ̈chɨi yae oyapo vae.

⁵ Ere chupe reta: ‘YandeYa Tumpa jei Körai: Aiparavo yave Israel, chepo aupi reve añererökuavee iñemuña reta pe jare ayekuaauka chupe reta Egipto pe. Chepo aupi reve añererökuavee, jae chupe reta: Che ko jae peYa Tumpa.

⁶ Jókuae ara añererökuavee anoe reta vaerä Egipto güi, araja vaerä ɨvɨ kavi che ameeta chupe retaa pe, ¡ɨvɨ ipöra yae ïru ɨvɨ reta güi vae!

⁷ Jayave jae chupe reta oeya reta vaerä opaete itumpa-raanga reta, agüɨye vaerä oyemongɨa Egiptoɨgua reta itumpa-raanga pe. Echa che ko jae peYa Tumpa.

⁸ Ërei oyembopɨapochɨ reta chekotɨ, jare ñäteɨ oyeapɨsaka reta cheré, mbaetɨ oeya itumpa-raanga reta, mbaetɨ oeya Egiptoɨgua reta itumpa-raanga. Jare jae aitɨ vaerä chearasɨ jese reta jókuae ɨvɨ Egipto pe; chepɨakatu vaerä apɨta chearasɨ güi.

⁹ Ërei aipoepɨ cheyemongeta cheree jeko pegua, agüɨye vaerä jërakua pɨ̈chɨi cheree ïru tëtaguasu reta rupi, jókuae yogüɨrekoa rupi, echa jae reta jovake ayekuaauka chupe reta jare arökuavee anoe reta vaerä Egipto güi.

¹⁰ Che ko anoe reta ɨvɨ Egipto güi jare aru reta ñuu pe;

¹¹ joko pe amee chupe reta mborookuai reta; kia oendu jare oyapo vae oikove vaerä.

¹² Aikuaauka vi chupe reta cheara mbutuu pegua, jókuae rupi ikañɨmaa vaerä tëi jae reta cheve, jare metei yemomaendúa che ko añono tee reta cheyeupeguarä vae.

¹³ Ërei Israel iñemuña reta oyembopɨapochɨ chekotɨ ñuu pe; jare mbaetɨ yogüɨreko reta cheporookuai reta rupi, güɨröɨro reta, kia oendu jare oyapo yave oikoveta vae; omboeteä reta cheara reta mbutuu pegua. Jáeramo ayemongeta aitɨ vaerä chearasɨ jese reta ñuu pe, opa vaerä amokañɨtei reta.

¹⁴ Ërei aipoepɨ cheyemongeta cheree jeko pegua, agüɨye vaerä jërakua pɨ̈chɨi cheree ïru tëtaguasu reta rupi, echa jae reta jovake ayekuaauka chupe reta, jare jae reta jovake ko opa anoe reta.

¹⁵ Jaeramiño vi, chepo aupi reve jae chupe reta ñuu pe, mbaetɨta amaeño oike reta ɨvɨ kavi che amee chupe retaa pe, ɨvɨ ipöra yae ïru ɨvɨ reta güi vae pe;

¹⁶ echa güɨröɨro reta cheporookuai reta, mbaetɨ yogüɨreko reta cheporookuai reta rupi, jare omboeteä reta cheara mbutuu pegua, echa ipɨa reta itumpa-raanga reta reteiño.

¹⁷ Jeseve cheɨ̈ro chupe reta jare mbaetɨ opa amokañɨtei reta ñuu pe.

¹⁸ Jayave jae taɨ reta pe jókuae ñuu pe, agüɨye vaerä oyapo tu reta oyókuai vae, agüɨye vaerä oñovatu ipɨa pe jókuae mborookuai ani oyemongɨa reta itumpa-raanga reta rupi.

¹⁹ Jae chupe reta: Che ko jae peYa Tumpa. Peiko cheporookuai reta jeigüe rupi, peñovatu pepɨa pe jare peyapo,

²⁰ jare peñono tee cheara mbutuu pegua, toiko kañɨmaarä cheve jare peve, jökorai peikuaata che ko jae peYa Tumpa vae.

²¹ Ërei taɨ reta oyembopɨapochɨ reta chekotɨ, mbaetɨ yogüɨreko reta cheporookuai rupi, mbaetɨ oñovatu reta jare mbaetɨ oyapo reta, jare omboeteä reta cheara mbutuu pegua. Jáeramo ayemongeta aitɨ vaerä chearasɨ jese reta ñuu pe, chepɨakatu vaerä apɨta chearasɨ güi.

²² Ërei ayembopɨaguasu cheree jeko pegua, agüɨye vaerä jërakua pɨ̈chɨi cheree ïru tëtaguasu reta rupi, echa jae reta jovake ayekuaauka chupe reta, jare jae reta jovake ko opa anoe reta.

²³ Jaeramiño vi, chepo aupi reve jae chupe reta ñuu pe, opata amoai moai opaete tëtaguasu reta rupi vae,

²⁴ echa mbaetɨ oyapo reta cheporookuai jeigüe vae, echa güɨröɨro reta cheporookuai, mbaetɨ yogüɨreko reta cheporookuai rupi jare omboeteä reta cheara mbutuu pegua, echa omae reta tu reta itumpa-raanga reta reteiño.

²⁵ Jáeramo amee vi chupe reta mborookuai mbaetɨ ikavi vae, jare yavai yaeta jókuae rupi yogüɨreko vaerä vae.

²⁶ Amaeño jese reta, oyemongɨa reta vaerä mbota omee reta itumpa-raanga reta pe vae rupi, taɨrɨpɨ reta omee oyeapɨ vaerä yave. Kuae ayapo ambopɨatɨtɨ reta vaerä, jare aikuaauka vaerä chupe reta, che jae ko iYa Tumpa vae.’ ”

²⁷ “Jáeramo, nde kuimbae, nemiari Israel iñemuña reta pe, ere chupe reta: ‘YandeYa Tumpa jei körai: Peñemuñagüe reta körai vi chemboarasɨuka, oyembopɨapochɨ reta yave chekotɨ.’

²⁸ Che aru reta jókuae ɨvɨ arökuavee amee vaerä chupe retaa pe, jare oecha reta ramboeve ɨvɨtɨ ɨvate vae jare ɨvɨra iküaraɨa kavi vae yave, joko pe omee reta mɨmba oyeyukagüe, jare mbota reta, pɨpe chemboarasɨ reta, joko pe omee vi ikäti kavi vae incienso jare mbota vino oyepɨyere vaerä oñemee vae.

²⁹ Jare che aparandu chupe reta: ‘¿Mbae pa peo peyapo mbaemboete renda ɨvɨtɨ rupigua re? Jare oyembojee Bama añave regua.’

³⁰ Ere Israel iñemuña reta pe: ‘YandeYa Tumpa jei körai: ¿Maera pa peyemongɨa peñemuñagüe reta rami? ¿Maera pa pemboete jókuae tumpa-raanga reta ikavimbae yae vae?

³¹ Echa pemee mbota reta chupe, peraɨ reta pemee oyeapɨ vaerä, jökorai peyemongɨa itumpa-raanga reta rupi añave regua. Jökorai reve peyu peparandu mbae re cheve Israel iñemuña reta. Che peYa Tumpa jae cheyé aeño peve, ngaraa aendu peve.

³² Jare ngaraa peiko jókuae peyemongeta rami.’ Echa pere: ‘Yaiko mo ïru tëtaguasu pegua reta rami, jae reta omboete ɨvɨra jare ita.’

³³ Che peYa jae cheyé aeño, chembaepuere yae reve jare chearasɨ aitɨ peré reve, aporookuaita peré.

³⁴ Che pomboatɨta opaete ïru ɨvɨ rupi opa peñemoai moai peïa güi, chembaepuere pe jare chearasɨ aitɨ reve peré.

³⁵ Pogüeruta tëta reta iñuu pe, jare joko pe pojäata yayóvai pe etei.

³⁶ Peñemuñagüe reta ajäa Egipto pegua ñuu pe rami pojäata. Jei yandeYa Tumpa.

³⁷ Che popapata, metei vecha iyangarekoa oipapa kavi ivecha reta rami, jare pomoingeta peiko vaerä morogüɨrökuavee päve pe.

³⁸ Ambosɨrɨta pegüi ipɨapochɨ vae reta, jare oyembopɨapochɨ chekotɨ vae reta; anoe retata ɨvɨ ambuae güi, añave yogüɨrekoa güi, ërei ngaraa oike reta Israel iɨvɨ pe. Jayave pe reta chekuaata che ko jae peYa vae.

³⁹ ‘Israel iñemuña reta, yandeYa Tumpa jei körai: ¡Pekua metei ñavo pemboete petumpa-raanga reta, mbaetɨ yave pekɨ̈reɨ chemboete! Ërei oväeta ara chemboete vaerä jare ngaraa ye ma pemongɨa cheree ikɨambae vae jókuae pemee mbota vae rupi jare pemboete petumpa-raanga reta vae rupi.

⁴⁰ Ërei cheɨvɨtɨ añono tee vae re, ɨvɨtɨ ɨvate Israel pe vae re, jei yandeYa Tumpa. Joko pe chemboeteta Israel iñemuña reta, joko pe aiporuta chupe reta mbota mbaagüɨyerɨpɨ jare opaete mbota oñeñono tee vae.

⁴¹ Pomboatɨ ma opaete ïru tëtaguasu reta peñemoai moai peïa güi yave, aechauka ma cheyemboetea peré opaete vae reta jovake yave, chepɨakatuta amae peré ikäti kavi vae incienso re rami.

⁴² Jare pomoinge ma ɨvɨ Israel pe, arökuavee amee vaerä peñemuñagüe reta pe vae pe yave, jayave pe reta chekuaata che ko jae peYa Tumpa vae.

⁴³ Joko pe pemaenduata opaete pereko ikavimbae re, jare peyapogüe rupi peyemongɨa pɨpe vae re; jare pe aeño peñemotareɨta jeta mbaeyoa peyapo vae jeko pegua.

⁴⁴ Israel iñemuña reta, kuae ayapota peve ayeaɨu ramo, mbaetɨ pereko kavimbae ani ikavimbae yae peyapo vae jeko pegua, jayave pe reta chekuaata che ko jae peYa Tumpa.’ ” Jei yandeYa Tumpa.

Neguev maratuta vae regua

⁴⁵ YandeYa jei cheve:

⁴⁶ “Nde kuimbae, eyerova emae arayevɨ kotɨ, emondo neñee jokotɨ cheree re, emombeu maratuta oasa jókuae kaa Neguev vae,

⁴⁷ ere chupe: ‘YandeYa Tumpa jei körai: Che amoendɨta tata nderé, jókuae tata oapɨta opaete ɨvɨra reta jokɨ vae jare yɨpi vae; ngaraa ogüe jare oapɨta opaete vae jova, ɨvɨtuguasu güive arayevɨ kotɨ.

⁴⁸ Jare opaete vae oechata che ko amoendɨ jókuae tata vae. Jókuae tata ngaraa ogüe.’ ”

⁴⁹ Jare jae: “¡Atataɨ cheYa Tumpa, jeta vae reta jei, cheyeugüi aeño ko jae kuae yembojaanga reta vae!”