EZEQUIEL 2 - Biblia Guarani Tumpa Iñee

Ezequiel iñeenɨi

¹ YandeYa jei cheve: “Nde kuimbae, epüa eyemboɨ, chemiarita ndeve.”

² Imiari oï ramboeve Tumpa imbaepuere ou cheré jare chemopüa chemboyemboɨ. Jayave aendu imiari cheve vae,

³ jei cheve: “Nde kuimbae, romondota Israel iñemuña reta pɨri, metei tëta iñeereendumbae, oyembopɨapochɨ chekotɨ vae reta kotɨ. Jae reta jare iñemuñagüe reta oyembopɨapochɨ ckekotɨ añave regua.

⁴ Jaeramiño vi taɨ reta iñeereenduä jare ipɨatäta. Ikotɨ reta romondota, rere vaerä chupe reta: ‘Körai jei yandeYa Tumpa.’

⁵ Güɨramoi ra oyeapɨsaka retata ani mbaetɨta, echa jae reta ko ipɨapochɨ vae, ërei oikuaa retata, oime ko jae reta ipɨte pe ñemombeúa vae.

⁶ Nde kuimbae, agüɨye eipoɨu chugüi reta ani ekɨɨye iñee reta güi, yepe tëi reï ñairaka ani ñurati pɨte pe rami, ani reiko tumɨkarape oporoöpi vae ipɨte pe rami. Agüɨye ekɨɨye iñee reta güi ani taneiämondo reta, echa ipɨapochɨ vae reta ko.

⁷ Nde emombeu chupe reta cheñee, ipuere oyeapɨsaka nderé ani mbaetɨ vi, echa jae reta ko iñeereendumbae.

⁸ Ërei nde kuimbae, eyeapɨsaka che jae ndeve vae re, agüɨye neñeereenduä jae reta iñeereenduä rami, eyurupeka jare jeu ameeta ndeve vae.”

⁹ Jare aecha ombou chekotɨ metei tembikuatía oyepomombɨ vae.

¹⁰ Oyora cheróvai jókuae tembikuatía oyepomombɨ vae, oyekuatía yoyavi oï: moroäpiro regua, yaeo regua jare täse reta regua.