EZEQUIEL 19 - Biblia Guarani Tumpa Iñee

Mbɨatɨtɨ mburuvicha guasu reta Israel pegua re

¹ Nde, Ezequiel etairari tairari mbɨatɨtɨ pegua mburuvicha guasu reta Israel pegua re, ere:

² ‘Ndesɨ yaguapope kuña, oikose yaguapope reta ndive. Oyapo ikuarä jae reta ndive, jare joko pe ombokuakuaa imembɨ reta.

³ Metei ombokuakuaa kavi yae, oyeapo regua yaguapope. Oikatu jembiarä oipɨɨ, jare oyuka jou kuimbae reta.

⁴ Jare ïru tëtaguasu pegua reta oendu jesegua; oipɨɨ reta metei ñuai pe, jare ombotɨrɨrɨ reta karena pe güɨraja Egipto pe.

⁵ Jókuae yaguapope kuña oecha yave oäro mbateeiño, jare oäro vae mbaetɨ oyerova ye jarembae yave, oipɨɨ ïru imembɨ raɨ jare ombokuakuaa kavi.

⁶ Tuicha ma yave, ojo oguata ïru yaguapope reta ndive. Oikatu jembiarä oipɨɨ, jare oyuka jou kuimbae reta.

⁷ Omboai mburuvicha guasu jëta reta, omboai tëta guasu reta jare pɨpegua reta; iñee pe omongɨɨye opaete vae.

⁸ Jayave oñemopüa jese iyɨvɨrigua tëtaguasu reta; oñono reta ñuai chupe, oipɨɨ reta pɨpe.

⁹ Karena pe oñapɨti reta oñono jɨru pe, jare güɨraja reta mburuvicha guasu Babilonia pegua pe; joko pe oñono reta tembipɨɨrɨru pe, agüɨye vaerä ma oyeendu iñee ɨvɨtɨ reta re Israel pe.’

¹⁰ ‘Ndesɨ, uva rami ko uvarupa pe, ɨ jembeɨ pe oñeotɨ vae; jäka jeta jare jeta ia, ɨ jembeɨ pe oï jeko pegua.

¹¹ Jäka reta ipoguasu, chugüi oyeapo mburuvicha guasu reta ipo peguarä; okuakuaa ɨvate ïru reta güi, oyekuaa katu ɨvate jeko pegua jare jäka jeta jeko pegua.

¹² Ërei Tumpa arasɨ rupi oapomondorouka, oyeitɨuka ɨvɨ re, jare ɨvɨtuakuvo omotini, osururu chugüi ia, jäka reta ipoguasu vae yɨpi jare oyeitɨ tata pe.

¹³ Añave oñeotɨ ñuu pe, ɨvɨ otini jare ñäkɨmbaea pe.

¹⁴ Iyɨpɨ güi oë tata, opa oapɨ jäka jare ia reta, mbaetɨ etei opɨta jäka ipoguasugüe mburuvicha guasu reta ipo peguarä.’ ” Jae kuae tairari yaeo pegua, jare yaeo peguarä toyeporu.