EZEQUIEL 17 - Biblia Guarani Tumpa Iñee

Yembojaanga güɨraké re jare uva re

¹ YandeYa jei cheve körai:

² “Nde kuimbae, eyapo Israel iñemuña reta pe metei yembojaanga.

³ Ere chupe reta: ‘YandeYa Tumpa jei körai: Metei güɨraké tuicha vae ou oväe Líbano pe; ipepo reta tuicha jare ipuku yae, jeta jaa jare oipotagüe ipïra; oipɨɨ ɨ̈vɨrare iyapokɨ,

⁴ jare oakɨo iyapokɨ iyapɨte regua ete, jare güɨraja oñotɨ omaemee vae reta iɨvɨ pe; omaemee vae reta jëta guasu pe.

⁵ Oipɨɨ vi jókuae ɨvɨ güi metei temitɨ jäɨ, jare oñotɨ metei ɨvɨ kavi pe; oñono ɨ tuicha vae jembeɨ pe, ɨvɨra sause jee vae rami.

⁶ Jókuae temitɨ jäi jeñɨi, jare oyeapo metei uva jokɨ katu vae; yepe tëi ɨ̈vɨi, ërei jäka reta omondo güɨraké kotɨ, jare japo reta ojo ɨ́vɨkotɨ. Jökorai oyeapo uvarä; jokɨ jare jeta jäka.

⁷ Ërei oime vi ïru güɨraké tuicha vae, tuicha ipepo reta jare jeta jaa. Jayave jókuae uva japo reta jare jäka reta omondo güɨraké kotɨ, oyemboɨuka vaerä chupe, mombɨrɨ jae oñeotɨa güi.

⁸ Ërei ngatu ɨvɨ kavi pe oñeotɨ tëi oï, ɨ tuicha vae iyɨpɨ pe, joko pe ipuere vaerä jeta jäka jare ia, jare oyeapo vaerä metei uva ikavi vae.’

⁹ Ere chupe reta: ‘YandeYa Tumpa jei Körai: Kuae uva ngaraa oiko. Tenondegua güɨraké oapomondorota, jare opata osururu ia reta, jare opata yɨpi; yavaimbae etei jare mbovɨ vae ndiveño oapomondorota.

¹⁰ Yepe tëi oñotɨ pɨau yeta ngaraa ma oyepota; ipiruta ɨvɨtuakuvo oipeyu yave. Opata ipiru jókuae oñeotɨa pe.’ ”

¹¹ YandeYa jei cheve:

¹² “Eparandu kuae tëta ipɨapochɨ vae pe, oikuaa reta ra kuae oyembojaanga vae re. Ere chupe reta: ‘Mburuvicha guasu Babilonia pegua ou Jerusalén pe oipɨɨ mburuvicha guasu Judá pegua jare iyɨvɨrigua mburuvicha reta, jare opa güɨraja reta jupíe Babilonia pe.

¹³ Javoi oiparavo metei mburuvicha guasu iñemuña pegua güi, jare oyapo morogüɨrökuavee päve jae ndive, jeiuka chupe Tumpa jee re oiko vaerä jae jeia re; jare güɨraja jupíe tuichagüe reta jókuae ɨvɨ güi,

¹⁴ agüɨye vaerä ma Judá iporookuaía güɨnoi mbaepuere oñemopüa ye vaerä, jaeño morogüɨrökuavee päve ombopo vae rupi oikoño vaerä.

¹⁵ Ërei kuae mburuvicha oñemopüa mburuvicha guasu Babilonia pegua re, omondo jekovia pe kuimbae reta imiari vaerä Egipto pe, omee vaerä chupe kavayu reta jare jeta kuimbae. ¿Perovia pa kuae oyapo yave oasayepeta? ¿Ipuereta ra morogüɨrökuavee päve mbaetɨ ombopo vae oasayepe?

¹⁶ Che jae cheyé aeño jei yandeYa Tumpa, omanota ko Babilonia pe, jókuae mburuvicha guasu oñono tëi mburuvicharä Judá pe vae oikoa pe, echa jae mbaetɨ ombopo iñee jare morogüɨrökuavee päve mburuvicha guasu ndive oyapo vae güɨrokomegua.

¹⁷ Faraón ngaraa etei omborɨ sundaro jëia vae reta pe ani jeta vae reta pe, mburuvicha guasu Babilonia pegua opüa yave jese, oñono kavi yave yeupika reta ñeraro pegua, omokañɨtei reta vaerä jeta vae.

¹⁸ Echa mbaetɨ ombopo iñee jare omboeteä morogüɨrökuavee päve; jae yepe oñererökuavee tëi, ërei oyapo ye kuae mbaembae reta. Jáeramo ngaraa oasayepe.

¹⁹ Jáeramo, yandeYa Tumpa jei körai: Che jae cheyé aeño: Jae oyapoä oñererökuavee che ndive vae, jare omboeteä cheporogüɨrökuavee päve; jáeramo aiporaraukata chupe.

²⁰ Amombota chepɨsa jese jare aipɨɨta pɨpe; arajata Babilonia pe, joko pe ajäata mbaetɨ ramo jupi oiko cheve.

²¹ Jare isundaro reta jëia vae reta omanota ñeraroa pe, jare oasayepe vae reta opata oñemoai moai oipota rupi. Jayave pe reta chekuaata che ko jae peYa vae.

²² Che ndeYa Tumpa jae körai: Che aipɨɨta vi jókuae ɨ̈vɨrare iyapokɨ iyapɨteasɨ regua jare añotɨta; jeñɨi kavi vae ayasɨata jare añotɨta metei ɨvɨtɨ ɨvate yae vae re.

²³ Ɨvɨtɨ ɨvate yae vae Israel pegua re añotɨta. Jokɨta jare iata jare oyeapota metei ɨ̈vɨrare ikavi yae vae. Oipotagüe mɨmba oikota igüɨ pe, jare oipotagüe güɨra reta oyapota jaitɨrä jäka re.

²⁴ Jare opaete ɨvɨra reta oikuaata che ko jae peYa vae. Che amboai ɨvɨra ɨvate yae vae, jare amboɨvate ɨvɨra ɨ̈vɨi vae; che amboɨpi ɨvɨra jokɨ vae, jare ɨvɨra yɨpi vae ambojokɨ. Che peYa jae kuae, jare ayapota.’ ”