EZEQUIEL 16 - Biblia Guarani Tumpa Iñee

Jerusalén jupimbae oyapo vae

¹ YandeYa jei cheve körai:

² “Nde kuimbae, eechauka Jerusalén pegua reta pe ikavimbae yae oyapo vae.

³ Ere chupe reta: ‘Körai jei yandeYa Tumpa Jerusalén regua: Jerusalén, ndeɨpɨ jare rea pɨpe vae jae ko ɨvɨ Canaán; nderu jae ko amorreo jare ndesɨ jae ko Het iñemuña pegua.

⁴ Jókuae ara rea ramo yave nepürúa mbaetɨ oyeasɨa ndegüi, mbaetɨ ɨ pe ndeyoe vae, yukɨ pe ave mbaetɨ ndepichɨ vae jare mbaetɨ neoma ñomaa pe vae.

⁵ Mbaetɨ kia ndeparareko omae nderé ndemborɨ vaerä. Jókuae ara rea ramo yave, ndereeya reta ɨvɨ pe, oyuguaru reta ndegüi.

⁶ Che aasa ndeɨpɨ rupi yave, roecha ndepɨtávɨi távɨi reï nderugüɨ pe, jare jae: Ikavi ko oikove.

⁷ Rombokuakuaa temitɨ rami; rekuakuaa, ndetuicha, jare reñemokuñatai nepöra yae; ndekambusu kavi jare ndeavuku kavi. Ërei nenandi reï.

⁸ Aasa ye ndeɨpɨ rupi yave, roecha rekuakuaa ma jare reñemokuña ma; jare cheñeapevaka pe roñova nenandi reï vae; añererökuavee ndeve jare ayapo morogüɨrökuavee päve nde ndive, jökorai reiko chembaerä. Che ndeYa Tumpa jae.

⁹ Romboyau ɨ pe, jare ayoe tugüɨ oï nderé vae, aipichɨ mbae ikäti kavi vae nderé.

¹⁰ Romboemimonde temimonde ipöra vae, jare mbɨɨru mɨmba pire ikavi yae vae pegua pe, amee ndekuakuaarä lino pegua jare temimonde seda pegua;

¹¹ romopöra mbae jepɨ vae pe, yɨva regua añono ndeyɨva re, jare mboɨ ndeayu re;

¹² añono moäka-veraecha vae netï re, jare namicha nenambi re jare äka-regua ipöra vae neäka re.

¹³ Jökorai reñemopöra oro pe jare korepoti pe, nderemimonde ipïra oñemopöra lino pegua vae. Reu mbɨyape ikavigüe trigokúi ipɨuasɨ vae pegua, ei jare olivo iasaite; jare oasa ete yé reñemopöra, reyeapo regua mburuvicha kuñarä.

¹⁴ Nerërakua yae ïru tëtaguasu reta rupi nepöra yae ramo; nepöra yae ko che romboemimonde jeko pegua. Che ndeYa Tumpa jae.

¹⁵ Ërei reyerovia ndeyé nepöra jeko pegua, jare nerërakua yae vae reipoepɨ ndembokere vaerä, reñemee opaete oasa jokoropi vae pe.

¹⁶ Nderemimonde reta pe reyapo o mbaemboetea reta ɨvɨtɨ rupi, jare reiko aguasa pe joko pe. Mbaetɨi kuae nunga oyeapo, jare ngaraa ye oyeapo jókuae nunga.

¹⁷ Reipɨɨ vi reñemopöra pɨpe vae ndembaembae, oro jare korepoti pegua che amee ndeve vae, jare reyapo kuimbae iä reta, reyapo vaerä aguasa.

¹⁸ Reipɨɨ nderemimonde ipöra vae jare remboemimonde pɨpe, chembae asaite jare ikäti kavi vae incienso reñono jóvai reta.

¹⁹ Mbɨyape amee ndeve vae trigokúi ipɨuasɨ kavi vae, asaite jare ei amee nderembiurä vae, remee chupe reta mbota ipiche katu vae. Che ndeYa Tumpa ko jae kuae.

²⁰ Reipɨɨ vi nemembɨ cheve vae michia reta, jare remee netumpa-raanga reta pe ókai vaerä. ¿Jaekaviño maä pa ndeve aguasa reyapogüe,

²¹ reñaseokɨ̈ti yeti remee cheraɨ reta tumpa-raanga reta pe, mbotarä oyeapɨ vaerä vae re?

²² Ërei opaete kuae ikavimbae vae jare aguasa reyapo vae, nemoakañɨ ndetaɨrusuasɨ vae güi, nenandi, mbaetɨ neñomaa jare ndepɨtávɨi távɨi nderugüɨ pe reiko vae güi.

²³ Che ndeYa Tumpa jae: ¡Paravete!, ¡maera pa ko! Jókuae ikavimbae reyapo güire,

²⁴ remopüa yeti mbaemboete renda ɨvɨtɨ rupigua reta rembaemboete vaerä, jare mɨmba oyeyukagüe oyeapɨ jese vae opaete oka guasu rupi.

²⁵ Opaete tape oyoasaa ñavo rupi remopüa mbaemboete renda, nepöra yae vae remopɨ̈chɨi, reñemee opaete oasa jokoropi vae pe, jökorai rembojeiete aguasa reyapo vae.

²⁶ Jare ndeaguasa reiko nerëta iyɨpɨ pegua Egiptoɨgua reta ndive; jëia yae jókuae peguarä vae reta ndive; jökorai chemboarasɨ yeyé jekuaekuae reyapo aguasa vae rupi.

²⁷ Jáeramo, aiporarauka ndeve, apɨ̈ro ndegüi nderembíu, jare romee nemotareɨ vae filisteo reta ipo pe, jae reta güɨnoti ndereko ikavimbae vae.

²⁸ Mbaetɨ ramo ndeangapɨɨ, reiko vi Asiriaɨgua reta ndive, jeseve mbaetɨño ndeangapɨɨ.

²⁹ Jekuae rembojeiete ndeaguasa Canaán pe, jare Caldeaɨgua reta ndive; ërei jeseve mbaetɨ ndeangapɨɨ repɨta.

³⁰ Che ndeYa Tumpa jae körai: ¡Mbaetɨ ndepɨa jenda peño, reyapo opaete iyaguasa pota vae jeko nemarambae reve!

³¹ Remopüa mbaemboetea opaete tape oyoasaa ñavo rupi, remopüa mɨmba oyeapɨ jese vae opaete oka guasu reta rupi. Ërei nde mbaetɨ rekovara jete omee vae reta rami. ¡Nde mbaetɨ etei rekovara!

³² Ërei reiko kuña oyuvanga menda re vae, ime güi oiko ambuae kuimbae ndive rami.

³³ Opaete kuña omee jete vae reta okovara, ërei ngatu nde, ndeí rembopota ndeaguasa reta, yogüeru vaerä oipota rupi güi ndeaguasarä.

³⁴ Kuae ndeaguasa pota vae pe, nde reyoavɨ ïru kuña reta güi: Mbaetɨ etei kuimbae oiporu ndeve oasa vaerä nde ndive, mbaetɨ vi omboepɨ ndeve, ërei ndeí remboepɨ chupe reta. ¡Jókuae pe ko ambuaeye nde!

³⁵ Jáeramo, nde iyaguasa pota vae, eyeapɨsaka cheñee re:

³⁶ Che ndeYa Tumpa jae körai: Nde remboyekuaa nemarambae reve nderete remee ndeaguasa reta pe jare opaete netumpa-raanga reta pe yave; repɨyere vi tugüɨ, remee yave nemembɨ oyeapɨ vaerä mɨmba oyeyuka oñemee jese vae re.

³⁷ Jáeramo, amboatɨta opaete ndeaguasa reyerovia jae reta ndive vae, opaete jókuae reaɨu vae reta remotareɨ vae reta ndive; amboatɨta opaete ndeɨ́vɨri, jare jae reta jóvai romonandita oecha reta vaerä nderete.

³⁸ Rojäata reyuvanga menda re jare reporoyuka vae jeko pegua, jare cherägüɨro ramo chearasɨ reve romeeta mano pe.

³⁹ Romeeta jae reta ipo pe; jae reta opata omboai ndembaemboete renda reta ɨvɨtɨ rupigua, jare mɨmba reyuka reapɨ remee jese vae reta. Opaeteita ndetɨrumboi reta, jare opɨ̈rota reñemopöra pɨpe vae reta; ndereeyata nenandiño jare ndepogüɨrai etei.

⁴⁰ Jeta vae reta opüata nderé, ndeapi retata ita pe jare ndeyuka retata ikɨsepuku reta pe.

⁴¹ Oapɨ retata ndero reta, jare ndereko ojäa retata jeta vae kuña reta jóvai. Jökorai amboapɨta ndeaguasa pota vae, ngaraa ye remboepɨ ndeaguasa reta pe.

⁴² Jayave chepɨakatuta jare chearasɨ poita cherägüɨro nderé vae güi; aiko pɨagüiveta, ngaraa ma chearasɨ aiko.

⁴³ Echa nde neakañɨ ndetaɨrusu reiko yave vae güi, jare chemboarasɨuka opaete kuae reyapo vae rupi; jáeramo aiporaraukata ndeve reyapogüe re. Che ndeYa Tumpa jae; echa mbaetɨ etei kërai ave reyemongeta ikavimbae reyapo vae re.’

Kuñatai ogua ichɨ jeko

⁴⁴ Mase, opaete ñee arakuaa pegua oiporu vae reta jeita ndekotɨ: ‘Kuñatai, ichɨ ye etei jeko pe.’

⁴⁵ Nde ko jae omotareɨ ime jare imembɨ reta vae imemɨkuña; jökoraiño vi, omotareɨ ime reta jare imembɨ reta vae ipɨkɨɨ jare tɨke ko nde; pesɨ jae ko Het iñemuña pegua jare peru jae ko amorreo.

⁴⁶ Ɨvɨtuguasu kotɨ oï nderɨke, tëta guasu Samaria, jare iyɨvɨrigua tëta raɨ reta; arayevɨ kotɨ oï ndepɨkɨɨ, tëta guasu Sodoma jare opaete iyɨvɨrigua tëta raɨ reta.

⁴⁷ Nde reiko jae reta yogüɨreko rami, reyapo jae reta oyapo vae. Ërei mbaetɨ ndeangapɨɨ, ndereko oasa ete yé ikaviä chugüi reta.

⁴⁸ Che peYa Tumpa jae cheyé aeño: Ndepɨkɨɨ Sodoma jare tëta raɨ reta iyɨvɨrigua ave mbaetɨ oyapo, nde jare ndeɨ́vɨri tëta raɨ reta ñogüɨnoi vae ndive peyapo rami.

⁴⁹ Jae kuae ndepɨkɨɨ Sodoma iyoa: Jae jare tëta raɨ reta iyɨvɨrigua oyembopɨapochɨ reta jeta tembíu güɨnoi vae rupi jare ikavi yogüɨreko vae rupi, mbaetɨ omborɨ reta paravete vae jare mbae oata chupe vae.

⁵⁰ Oyembopɨapochɨ reta jare oyapo che aröɨro vae; jáeramo amboai, pe reta peecha rami.

⁵¹ Ërei Samaria mbaetɨ oyapo mbɨte ave nde mbaeyoa reta reyapo vae. Nde oasa ete yé reyapo mbaeyoa chugüi reta; oyemboyovake yave peyapogüe, jae reta jupiñota opɨta.

⁵² Nde reropɨata ko ñemomarai jare ñemomichi, echa oasa ete ndeyoa nderɨke jare ndepɨkɨɨ güi, ërei jae reta jupiñota opɨta. Nde reiporarata jókuae ñemomarai jare ñemomichi.

⁵³ Che amee yeta Sodoma jare Samaria pe, oï kavi ye vaerä, jare opaete tëta raɨ reta iyɨ́vɨri ñogüɨnoi vae pe; jare ndeve amee yeta vi reï kavi ye vaerä,

⁵⁴ ërei reropɨata ñemomichi, jare nemomaraita opaete reyapogüe, echa kuae rupi reikota yembopɨakaturä chupe reta.

⁵⁵ Sodoma, Samaria jare opaete tëta raɨ reta iyɨvɨrigua yogüɨreko ye ma tenonde yave yogüɨreko rami yave, nde jare tëta raɨ reta ndeɨvɨrigua ndive peiko kavi yeta vi tenonde yave peiko rami.

⁵⁶ Ndepɨayemboetese ndeyé, reyóyai yóyai yepi ndepɨkɨɨ Sodoma oiporara yave,

⁵⁷ ndeiño ikavimbae reyapogüe oyekuaa mbove; ërei añave iñeeasɨ katu ndekotɨ opaete Siria pegua reta jare filisteo reta. ¡Opaete vae nemotareɨ!

⁵⁸ Añave reropɨata ikavimbae yae reyapogüe re. Che ndeYa jae.

⁵⁹ Che peYa Tumpa jae: Ngaraa ayapo nde ndive, nde reyapo rami, mbaetɨ remboete reñererökuavee vae, jare mbaetɨ rembopo morogüɨrökuavee päve.

⁶⁰ Ërei che chemaenduata jókuae morogüɨrökuavee päve ayapo nde ndive ndetaɨrusu yave vae re, jare ayapota nde ndive morogüɨrökuavee päve jekuae avei pegua.

⁶¹ Jare nemaenduata jókuae ikavimbae reyapogüe re jare nemarata chugüi, reipɨɨ ma yave nemembɨ retarä nderɨke reta jare ndepɨkɨɨ reta; ërei mbaetɨ morogüɨrökuavee päve jeko pegua.

⁶² Jaeño cheporogüɨrökuavee päve ayapo vae amoañeteta nde ndive. Jayave chekuaata che ko jae ndeYa.

⁶³ Nemaenduata jare nemarata, jare ngaraa ye ma neñee remoë, nemara jeko pegua, cheɨ̈ro ma yave ndeve opaete reyapogüe re. Che ndeYa jae.”