EZEQUIEL 12 - Biblia Guarani Tumpa Iñee

Ezequiel oyapo vae rupi omoërakua tembipɨɨ regua

¹ YandeYa jei cheve:

² “Nde kuimbae, reiko ipɨapochɨ vae reta ipɨte pe. Oime tëi jesa reta omae reta vaerä, ërei mbaetɨ oecha reta; oime tëi iyapɨsa reta, oendu reta vaerä, ërei mbaetɨ oendu reta, echa ipɨapochɨ vae reta ko.

³ Jáeramo nde kuimbae, eyupavo reo vaerä ïru ɨvɨ kotɨ vae rami, ara pe etei eë ndero güi jae reta jovakei, ekua reïa güi ïkotɨa; güɨramoi jayave oikuaa reta, jae reta yepe metei tëta ipɨapochɨ vae.

⁴ Ara pe etei enoe ndembaembae reta opaete vae jovake, reota reï tembipɨɨrä oyereraja ïru ɨvɨ pe vae rami; jaeramiño vi kaaru yave opaete vae reta jovake, reëta tembipɨɨrä oyereraja ïru ɨvɨ pe vae rami.

⁵ Jare emombu tëta ikësea jovapetea opaete vae jovake, jare jokoropi eë ndembaembae reta reve.

⁶ Jare jäve jäve ma yave, evoɨ ndevoɨta jare eë jeseve opaete vae jovake. Eñova nderova, agüɨye vaerä reecha kuae ɨvɨ. Echa roñono ko rembojaanga vaerä Israel iñemuña reta pe.”

⁷ Jare che ayapo Tumpa cheokuai rami, ara pe etei ayupavo chembaembae ndive tembipɨɨrä oyereraja ïru ɨvɨ pe vae rami. Kaaru yave amombu ovapetea tëta ikësea; jare jäve jäve ma yave aë jokoropi opaete vae jovake.

⁸ Pɨareve ndeimbove pe yandeYa jei cheve:

⁹ “Nde kuimbae, güɨramoi Israel iñemuña reta tëta ipɨapochɨ vae oparandu ma ndeve mbae ra reyapo reiko vae re.

¹⁰ Jayave ere chupe reta: Kuae ko yemombarandu mburuvicha guasu Jerusalén pe oï vae peguarä jare opaete Israel iñemuña reta, kuae tëta pe yogüɨreko vae peguarä.

¹¹ Ere chupe reta, nde ko jae metei yembojaanga chupegua retarä, nde reyapo rami etei oasa retata, echa oyererajauka retata tembipɨɨrä ïru ɨvɨ pe.

¹² Juvicha jae reta ndive oï vae, ovoɨta ivoɨta iyatiɨ re jare oëta jeseve oguambɨ tëta ikësea oyemombu vae rupi jäve jäve ma yave; oñovata jova agüɨye vaerä oecha jókuae ɨvɨ.

¹³ Ërei che amombota chepɨsa jese jare aipɨɨta, jare amondoukata Babilonia pe Caldeaɨgua reta iɨvɨ pe, ërei jae ngaraa ipuere oecha jókuae ɨvɨ; joko pe omanota.

¹⁴ Jare iyɨvɨrigua reta, jembiokuai reta ani iyangarekoa sundaro reta opata amoai amoai oipota rupi, jare aaɨkuemoñaukata ñeraro pe.

¹⁵ Jare chekuaa retata che ko jae iYa, opa yave amoai moai reta ïru tëtaguasu reta rupi.

¹⁶ Ërei aroasayepeñota amogüe reta ñeraro güi, karuai güi jare mbaerasɨ ovakatu vae güi, imiari reta vaerä kerupi ïru tëtaguasu reta pe yogüɨrajaa rupi, ikavimbae oyapo reta vae re; jare oikuaa retata che ko jae iYa vae.”

Tembiporara oñemoërakua pɨau vae regua

¹⁷ YandeYa jei ye cheve:

¹⁸ “Nde kuimbae, ekaru rekɨɨye yae reve jare eɨu rerɨrɨi reve rekɨɨye güi.

¹⁹ Jare ere opaete jókuae ɨvɨ pegua reta pe, jare Jerusalén pegua reta pe jare opaete Israel iñemuña reta pe körai: ‘Kuae jei yandeYa: Okaru retata ipɨatɨtɨ yae reve, jare oɨu retata okɨɨye yae reve; echa kuae ɨvɨ oyemboaita jare opɨtata ipombae, pɨpe yogüɨreko vae reta ikavimbae oyapo vae jeko pegua.

²⁰ Opaete tëta guasu reta oyemboaita jare ɨvɨ opɨtata ipombae; jayave pe reta chekuaata, che ko jae peYa.’ ”

²¹ YandeYa jei cheve:

²² “Nde kuimbae, ¿mbae pa oipota jei Israel iñemuña reta jei yave: ‘Jeta ma oasa ara reta jare mbaetɨño oyembopo ñeemombeúa reta oechagüe re omoërakua vae’?

²³ Jáeramo ere chupe reta: ‘Körai jei yandeYa: Che amboapɨta Israel pe jókuae ñee reta.’ Jare emombeu vi chupe reta köiño yae ma oyembopo vaerä Tumpa oechauka iñeemombeúa reta pe vae.

²⁴ Mbaetɨ yeta ma Israel iñemuña reta ipɨte pe mbae oecha raangaiño vae, ani imbaekuaa rupi maratuta vae re añetegüe nunga omombeu vae.

²⁵ Echa che chemiarita, jare jae vae oyembopota jupivei. Pe tëta ipɨapochɨ vae reta, pe etei ko peechata oyembopo vae. Che peYa ko jae kuae.”

²⁶ YandeYa jei cheve:

²⁷ “Nde kuimbae, Israel iñemuña reta jei, reechagüe remombeu vae, ɨma pe oyembopo vaerä ko.

²⁸ Jáeramo ere chupe reta: ‘Körai jei yandeYa Tumpa: Cheñee jarembae voi oyembopota; jae vae oyembopota. Che peYa jae kuae.’ ”