ÉXODO 9 - Biblia Guarani Tumpa Iñee

Mɨmba reta imano

¹ Jayave yandeYa jei Moisés pe: —Eike Faraón oïa pe jare ere chupe: “OreYa, hebreo reta iTumpa jei körai: ‘Emaeño toyogüɨraja tëta chembae oyeokuai vaerä cheve.

² Echa mbaetɨ remaeño yogüɨraja reta yave, jare jekuaeño remombɨta reta ye yave,

³ aitɨta chembaepuere opaete nderɨmba ñana pe ñogüɨnoi vae re: Kavayu reta, mburika reta, camello reta, guaka reta jare vecha reta re ambouta mbaerasɨ pɨ̈chɨi yae ete vae.

⁴ Jare che amboyaota Israel iñemuña reta jɨmba Egiptoɨgua reta jɨmba güi; jökorai mbaetɨta omano Israel iñemuña reta jɨmba.’ ”

⁵ Jare yandeYa oñono iyemongeta oyapo vaerä, jei körai: —Kuae ayapota pɨareve kuae ɨvɨ pe.

⁶ Jare pɨareve pe yandeYa oyapo. Jare jeta omano mɨmba Egipto pegua; ërei Israel iñemuña reta jɨmba mbaetɨ metei ave omano.

⁷ Jayave Faraón omondo omae vaerä Israel iñemuña reta jɨmba re, jare oecha reta mbaetɨ etei metei ave omano. Ërei Faraón ipɨa oñemotäta, jare mbaetɨ omaeño yogüɨraja Israel iñemuña reta.

Kuru mbaerasɨ

⁸ YandeYa jei Moisés jare Aarón pe: —Pepoagua penoe tanimbu horno güi, jare Moisés tomombo ara kotɨ Faraón jóvai;

⁹ jare oyeapota ɨvɨtimborä oñemoaita opaete ɨvɨ Egipto rupi, jare ipire omojemɨita ipere reve kuimbae reta jare mɨmba reta, opaete tëta guasu Egipto pe.

¹⁰ Javoi güɨnoe reta tanimbu horno güi jare yogüɨraja Faraón jóvai, jare Moisés omombo tanimbu ara kotɨ; jare oyekuaa kuru oporombopere vae kuimbae reta jare mɨmba reta re.

¹¹ Jare imbaekuaa vae reta mbaetɨ ipuere yogüeru oyovaicho Moisés kotɨ kuru jeko pegua, echa ikuru imbaekuaa vae reta jare opaete Egiptoɨgua reta.

¹² Ërei yandeYa omotäta Faraón ipɨa, jare mbaetɨ oendu jae reta iñee, yandeYa jei Moisés pe rami.

Amandau regua

¹³ Jayave yandeYa jei Moisés pe: —Epüa ekua ndeimbove ere Faraón pe: “Körai jei cheYa, hebreo reta iTumpa: ‘Emaeño toyogüɨraja tëta chembae, chemboete vaerä;

¹⁴ echa añave opaete mbaerasɨ reta amondota nderé, nderembiokuai reta re, nerëta pegua reta re, reikuaa vaerä mbaetɨ ye ïru Tumpa che rami opaete kuae ɨvɨ pe vae.

¹⁵ Echa, añave ambouta ndeve, reiporara vaerä jare nerëta pegua reta re, metei mbaerasɨ pɨ̈chɨi vae jare rekañɨteita ɨvɨ güi;

¹⁶ che, añetete roñono aechauka vaerä nderé chembaepuere, oñemoërakua vaerä cheree opaete ɨvɨ rupi.

¹⁷ Körai reve jekuaeñoi nde reyembopɨapochɨ tëta chembae kotɨ, mbaetɨ remaeño yogüɨraja reta.

¹⁸ Mase, pɨareve koyave ambouta yavaetegüe amandau, Egipto arakae oikoɨpɨ ramo güive añave rupi mbaetɨi oime kuae nunga vae.

¹⁹ Añave, emondo emboatɨuka nderɨmba reta jo rupi jare opaete ñana rupi renoi vae; echa opaete kuimbae ani mɨmba ikatu rupi ñogüɨnoi vae mbaetɨ oñeñono o japɨpe vae reta, amandau oa jese yave opata omano.’ ”

²⁰ Faraón jembiokuai reta, yandeYa jei vae güi okɨɨye vae opa güeru jo rupi jembiokuai reta jare jɨmba reta;

²¹ ërei, yandeYa iñee mbaetɨ güɨrovia vae reta, oeyaño ñana rupi jembiokuai reta jare jɨmba reta.

²² YandeYa jei Moisés pe: —Emopüa ndepo ara kotɨ oa vaerä amandau opaete ɨvɨ Egipto pe, kuimbae reta re jare mɨmba reta re jare opaete ñana reta re ɨvɨ Egipto pe.

²³ Jare Moisés güɨropövee ipopoka ara kotɨ, jayave yandeYa ombojɨapu ara jare ombou amandau, jare ama-tiriri yavaetegüe oa ɨvɨ re; jökorai yandeYa oitɨ amandau ɨvɨ Egipto pe.

²⁴ Jökorai oa jeta yae amandau, ama-tiriri ndive vae; mbaetɨi oa jókuae nunga opaetei ɨvɨ Egipto re arakae oikoɨpɨ güive.

²⁵ Jókuae amandau opaetei güɨrokomegua ɨvɨ Egipto; opaete ñana rupi ñogüɨnoi vae reta, oyuka kuimbae reta jare mɨmba reta; jaeramiño vi opa güɨrokomegua ñana reta, jare opa oakɨo ɨvɨra reta jäka opaete ɨvɨ Egipto rupi.

²⁶ Jaeño ete ɨvɨ Gosén pe, Israel iñemuña reta yogüɨrekoa pe mbaetɨ oa amandau.

²⁷ Jayave Faraón omondo oenɨiuka Moisés jare Aarón, jare jei chupe: —Añave cheyoa aipo, peYa jupi ko; che jare cherëtaɨgua reta oreyoa vae reta ko.

²⁸ Peyerure peYa pe kuae ararɨapu jare amandau osondo vaerä, jare che amaeñota ma peo, jare ngaraa ye ma omombɨta.

²⁹ Jare Moisés jei chupe: —Kuae tëta güi aë ñoete aupita chepo ayerure oreYa kotɨ, jare ararɨapu jare amandau osondo vaerä; reikuaa vaerä oreYa ko jae ɨvɨ iya vae.

³⁰ Ërei che aikuaa ko nde jare nderembiokuai reta ndeiño pekɨɨye oreYa Tumpa güi vae.

³¹ Lino jare cebada opaetei oikomegua, echa cebada jäɨ tëi ma oï jare lino iɨ tëi ma oï.

³² Ërei trigo jare centeno mbaetɨ opa oikomegua, echa jeñɨi raivimbae reta ko.

³³ Moisés oë Faraón jóvai güi ñoete, tëta guasu güi ikatu pe yave omopüa ipo, jare oyerure yandeYa pe, jare osondo ararɨapu jare amandau, jare mbaetɨ ye okɨ ɨvɨ iárambo.

³⁴ Jare Faraón oecha ma osondo ama, amandau jare ararɨapu yave, ipɨayemboete reve iyoa, jare jae omotäta ipɨa jare jembiokuai reta.

³⁵ Faraón ipɨa oñemotäta, jare mbaetɨ omaeño yogüɨraja Israel iñemuña reta, yandeYa jei Moisés rupi rami.