ÉXODO 7 - Biblia Guarani Tumpa Iñee

¹ YandeYa jei Moisés pe: —Mase, roñono cherekovia pe Faraón jóvai, jare nderɨkeɨ Aarón toï neñee omombeu vaerä.

² Nde ere opaete mbaembae reta che royókuai vae, jare nderɨkeɨ Aarón timiari Faraón pe omaeño vaerä yogüɨraja iɨvɨ güi Israel iñemuña reta.

³ Ërei che amotätata Faraón ipɨa, jare ayapota jeta mɨakañɨ reta ɨvɨ Egipto pe.

⁴ Jare Faraón ngaraa oyeapɨsaka peñee re; ërei che aitɨta chembaepuere Egipto re, anoeta chesundaro reta, chembae vae, Israel iñemuña reta ɨvɨ Egipto güi tuichagüe morojäa rupi.

⁵ Jare Egiptoɨgua reta oikuaata che ko jae peYa vae, aitɨ yave chembaepuere Egipto re, Israel iñemuña reta pogüɨnoe jae reta ipɨte güi yave.

⁶ Moisés jare Aarón oyapo yandeYa oyókuai rami;

⁷ Moisés güɨnoi ochenta año jare Aarón güɨnoi ochenta y tres año yave imiari reta Faraón ndive.

Aarón ipopoka

⁸ YandeYa jei Moisés jare Aarón pe:

⁹ —Faraón jei yave peve: “Peechauka mɨakañɨ,” nde rereta Aarón pe: “Eipɨɨ ndepopoka jare eitɨ Faraón jóvai oyeapo vaerä mboirä.”

¹⁰ Jökorai Moisés jare Aarón yogüeru Faraón pɨri jare oyapo reta yandeYa oyókuai rami. Jare Aarón oitɨ ɨvɨ re ipopoka Faraón jóvai jare oyeapo mboirä.

¹¹ Jayave Faraón oenɨi vi imbaekuaa vae reta jare ichoropa vae reta, kuae reta oyapo vi jökorai etei imbaekuaa rupi,

¹² oitɨ reta metei ñavo ipopoka ɨvɨ re, jare metei ñavo vae oyeapo mboirä; ërei Aarón ipopoka opa jou imbaekuaa vae reta ipopoka.

¹³ Ërei jeseve Faraón ipɨa oñemotäta, mbaetɨ oipota oyeapɨsaka jae reta iñee re, yandeYa jei rami.

Tugüɨ regua

¹⁴ Jayave yandeYa jei Moisés pe: —Faraón ipɨa omotäta jare mbaetɨ omaeño yogüɨraja Israel iñemuña reta.

¹⁵ Ndeimbove epüa jare ekua Faraón pɨri, jae ogüeyɨta ɨ̈aka pe jare eñeñono jóvai ɨ̈aka jembeɨ pe jare eraja ndepo pe popoka mboirä oyeapo vae.

¹⁶ Joko pe ere chupe: “OreYa, hebreo reta iTumpa chembou ndekotɨ, jae vaerä ndeve jae jei vae: Emaeño toyogüɨraja tëta chembae, chemboete vaerä ñuu pe; ërei nde jekuaeñoi mbaetɨ reipota reyeapɨsaka cheñee re.

¹⁷ Jáeramo, körai jei oreYa: ‘Kuae rupi reikuaata che ko jae peYa vae. Kuae popoka chepo pe anoi vae aiporu kuae ɨ oï ɨ̈aka pe vae re yave, oyepoepɨta tugüɨrä.

¹⁸ Jare jevae reta ɨ rupigua opata omano, jare iineta ɨ̈aka jare Egiptoɨgua reta oyuguaruta jou ɨ ɨ̈aka rupigua.’ ”

¹⁹ YandeYa jei ye Moisés pe: —Ere Aarón pe: “Eipɨɨ ndepopoka jare eropövee ɨ re kuae Egipto pe, ɨ̈aka kotɨ, ɨ̈aka raɨ kotɨ, ɨupa kotɨ jare opaete ɨrɨru tuicha vae kotɨ oyeapo vaerä tugüɨrä.” Toime tugüɨ opaete ɨvɨ Egipto rupi; jökorai vi vaso reta ɨvɨra pegua jare ita pegua rupi.

²⁰ Moisés jare Aarón oyapo yandeYa oyókuai rami; oiporu ipopoka ɨ ɨ̈aka pegua re, Faraón jovake jare jembiokuai reta jovake, jare opaete ɨ ɨ̈aka rupigua oyeapo tugüɨrä.

²¹ Jökoraiño vi jevae reta ɨ rupigua opa omano; jare ɨ̈aka iine yae otimbo ramo, Egiptoɨgua mbaetɨ ipuere jou ɨ joko güi. ¡Oime tugüɨ opaete ɨvɨ Egipto rupi!

²² Ërei Egipto pegua imbaekuaa vae reta jökorai etei vi oyapo reta imbaekuaa rupi, jare Faraón ipɨa oñemotäta, mbaetɨ oipota oyeapɨsaka jae reta iñee re, yandeYa jei rami.

²³ Jare Faraón oyerova ye jo kotɨ, mbaetɨ etei ipɨakañɨ omae kuae oyeapogüe re.

²⁴ Jare opaete Egipto rupi oyapo reta ɨkua ɨ̈aka jembeɨ rupi güɨnoe reta vaerä ɨ jou, echa mbaetɨ ipuere reta jou ɨ ɨ̈aka rupigua.

Pïte regua

²⁵ Oasa chiu ara, yandeYa oyapo güire kuae mɨakañɨ ɨ̈aka re.