ÉXODO 6 - Biblia Guarani Tumpa Iñee

¹ YandeYa jei Moisés pe: —Añave reechata Faraón ndive ayapota vae; echa chembaepuere rupiño omaeñota peo, chembaepuere rupiño jae etei pemoëta iɨvɨ güi.

Tumpa oenɨi ye Moisés

² Tumpa jekuae omomiari ye Moisés jare jei chupe: —Che ko jae peYa.

³ Abraham, Isaac jare Jacob pe ayekuaauka, Tumpa Opaete mbaepuere güɨnoi vae ramiño; ërei mbaetɨ ayekuaauka chupe reta cheree peYa rupi.

⁴ Ayapo vi morogüɨrökuavee päve jae reta ndive, añererökuavee amee vaerä chupe reta ɨvɨ Canaán, ketɨgua rami yogüɨreko pɨpe vae.

⁵ Jökoraiño vi, aendu Israel iñemuña reta jäse vae, Egiptoɨgua reta omombaravɨkɨ vae reta, jare chemaendúa cheporogüɨrökuavee päve re.

⁶ Jáeramo, rereta Israel iñemuña reta pe: —Che ko peYa; che pogüɨnoeta mbaravɨkɨ ipoɨgüe peyapo Egipto pe vae güi, poyorata yeokuaiasɨ katu güi, che poepɨta morojäa tuichagüe rupi.

⁷ Jare poapota tëta chembaerä jare che aikota peTumparä; jare pe reta peikuaata che ko jae peYa Tumpa vae, pogüɨnoe mbaravɨkɨasɨ katu peyapo Egipto pe vae güi.

⁸ Pogüɨrajata poñono Abraham, Isaac jare Jacob pe chepo amopüa reve añererökuavee amee vaerä ɨvɨ chupe reta vae pe, che ameeta peve pembaerä. Che ko peYa.

⁹ Körai Moisés imiari Israel iñemuña reta pe, ërei jae reta mbaetɨ oyeapɨsaka Moisés iñee re, ipɨa yemoambeko reta jare yeokuaiasɨ katu jeko pegua.

¹⁰ Jare yandeYa jei Moisés pe:

¹¹ —Eike emomiari Faraón mburuvicha guasu Egipto pegua, tomaeño toyogüɨraja Egipto güi Israel iñemuña reta.

¹² Ërei Moisés omboyevɨ ñee yandeYa pe: —Mase, Israel iñemuña reta viña pa mbaetɨ oyeapɨsaka cheñee re. ¿Këraita pa Faraón oyeapɨsaka cheñee re?, echa chemiari vaerä chekü ipoɨ yoapɨ.

¹³ Jayave yandeYa oyókuai Moisés jare Aarón jei vaerä Israel iñemuña reta pe jare Faraón mburuvicha guasu Egipto pe, jae reta güɨnoe vaerä Israel iñemuña reta ɨvɨ Egipto güi.

Aarón jare Moisés iñemuñagüe reta jee

¹⁴ Kuae reta jae ko tëtara ñavo vae reta juvicha, metei tu vae güi: Rubén, Israel taɨrɨpɨ taɨ reta, jae ko: Hanoc, Falú, Hezrón jare Carmi. Jae ko kuae Rubén iñemuña reta.

¹⁵ Simeón taɨ reta jae ko: Jemuel, Jamín, Ohad, Jaquín, Zohar, jare Saúl. Saúl jae ko metei kuña Canaán pegua imembɨ. Jae ko kuae Simeón iñemuña reta.

¹⁶ Kuae reta jae ko Leví taɨ reta jee; tenondegua güi taɨkuegua kotɨ: Gersón, Coat jare Merari. Jare Leví oiko ciento treinta y siete año.

¹⁷ Gersón taɨ reta jae ko: Libni jare Simei, tenondegua güi taɨkuegua kotɨ.

¹⁸ Coat taɨ reta jae ko: Amram, Izhar, Hebrón jare Uziel. Jare Coat oiko ciento treinta y tres año.

¹⁹ Merari taɨ reta jae ko: Mahli jare Musi, tenondegua güi taɨkuegua kotɨ. Jae ko kuae Leví iñemuña reta.

²⁰ Jare Amram güɨreko jembirekorä iyaiche Jocabed, kuae imembɨ chupe, jare ombojee Aarón jare Moisés. Jare Amram oiko ciento treinta y siete año.

²¹ Izhar taɨ reta jae ko: Coré, Nefeg jare Zicri.

²² Uziel taɨ reta jae ko: Misael, Elzafán jare Sitri.

²³ Aarón güɨreko Elisabet, Aminadab tayɨ, Naasón jeindɨ; kuae imembɨ chupe jare ombojee: Nadab, Abiú, Eleazar jare Itamar.

²⁴ Coré taɨ reta jae ko: Asir, Elcana jare Abiasaf. Jae ko kuae Coré iñemuña reta.

²⁵ Jare Eleazar, Aarón taɨ, güɨreko jembirekorä Futiel tayɨ, kuae imembɨ chupe jare ombojee Finees. Jae ko kuae Leví iñemuña reta jëtara ñavo rupi ñogüɨnoi mburuvicharä vae.

²⁶ Kuae reta jae ko, jókuae Aarón jare Moisés; kuae reta pe yandeYa jei: —Penoe Israel iñemuña reta ɨvɨ Egipto güi oyoaɨkue yoaɨkue reve kavi.

²⁷ Jae ko Faraón mburuvicha guasu Egipto pegua omomiari vae reta, güɨnoe vaerä Egipto güi Israel iñemuña reta. Jae ko Moisés jare Aarón.

²⁸ YandeYa omomiari yave Moisés ɨvɨ Egipto pe,

²⁹ körai jei chupe: —Che ko peYa. Ere Faraón mburuvicha guasu Egipto pegua pe, opaete mbaembae reta che jae ndeve vae.

³⁰ Ërei Moisés omboyevɨ ñee yandeYa pe: —Mase, chekü ipoɨ yae ko chemiari vaerä. ¿Oyeapɨsakata pa Faraón cheñee re?