ÉXODO 4 - Biblia Guarani Tumpa Iñee

¹ Jayave Moisés jei: —Mase, jae reta ngaraa etei chererovia, jare ngaraa oyeapɨsaka reta cheñee re, echa jei retata: “Mbaetɨ ko ndeYa oyekuaa ndeve.”

² Jayave yandeYa jei chupe: —¿Mbae pa ko jókuae ndepo pe renoi vae? Moisés jei: —Metei popoka.

³ YandeYa jei chupe: —Emombo ɨvɨ re. Jae omombo ɨvɨ re, jare oyeapo metei mboirä; jare Moisés osɨi chugüi.

⁴ Jayave yandeYa jei ye Moisés pe: —Ndepóyai jare eipɨɨ juguai pe. Jae ipóyai oipɨɨ juguai pe, jare oyeapo ye popokarä ipo pe.

⁵ —Kuae rupi ndererovia retata che ndeYa Tumpa ko oyekuaa ndeve vae, neñemuñagüe Abraham, Isaac jare Jacob iTumpa.

⁶ YandeYa jei vi chupe: —Añave ndepo emoinge nderendapɨgüɨ pe. Jare Moisés omoinge ipo jendapɨgüɨ pe; jare güɨnoe ye yave, oecha ipo ipire ókui imbaerasɨ, morotï iroɨ rami.

⁷ Jare Tumpa jei ye chupe: —Emoinge ye nderendapɨgüɨ pe ndepo. Jare Moisés omoinge ipo jendapɨgüɨ pe, jare güɨnoe ye yave, oecha opa ye okuera tenonde yave ipire rami.

⁸ Javoi yandeYa jei chupe: —Mbaetɨ yave ndererovia ani mbaetɨ yave ndemboete reta kuae tenondegua mɨakañɨ rupi, ndererovia retata taɨkuegua mɨakañɨ rupi.

⁹ Jare mbaetɨñoi ndererovia reta kuae mókoi mɨakañɨ reta rupi yave, ani neñee ave mbaetɨ oendu reta yave, eyara ɨ̈aka pegua ɨ jare epɨyere ɨvɨ pe; jare jókuae ɨ ɨ̈aka güi reyarata vae oyepoepɨta tugüɨrä ɨvɨ pe.

¹⁰ Jayave Moisés jei yandeYa pe: —¡Atataɨ cheYa! Mbaetɨi ko che kuimbae iñee ngatu vae tenonde güive, ani nde nemiari che nderembiokuai ndive yave ramoä ko; echa ɨma ɨma yave aväe cheñeerä jare chekü ipoɨ.

¹¹ Jare yandeYa omboyevɨ ñee chupe: —¿Kia pa omee kuimbae iyururä? ¿Kia pa oyapo iñeembae jare iyapɨsambae? ¿Kia pa oyapo jesa vae jare jesambae? ¿Cheä pa ayapo?

¹² Añave ekua jare che ameeta neñeerä jare romboeta kërai nemiari vaerä.

¹³ Moisés jei ye: —¡Atataɨ cheYa, romoñera remondo vaerä ïru vaeño!

¹⁴ Jayave yandeYa iyarasɨ Moisés kotɨ, jare jei chupe: —¡Joko oï nderɨkeɨ Aarón, Leví iñemuña! Jae oikatu imiari, jae oëta nerövaiti jare ndereecha yave, oyerovia yaeta omae nderé.

¹⁵ Nde nemiarita chupe opaete ñee reta; che ameeta peve peñeerä, pomboeta mbae ko peyapota vae re.

¹⁶ Jare jae oikota neñee omombeu vaerä, nde nemiari chupe vae jae omombeuta opaete vae pe, jare nde reïta chupe Tumpa rami.

¹⁷ Eraja ndeyeupe kuae popoka, pɨpe reyapota mɨakañɨ reta.

Moisés oyerova ye Egipto kotɨ

¹⁸ Körai Moisés oyerova ye jovaya Jetro jëta pe, jare jei chupe: —Aja yeta cherëtara reta Egipto pe ñogüɨnoi vae pɨri, aikuaa vaerä oimeño ra yogüɨreko vae. Jare Jetro jei Moisés pe: —Ekua mbɨakatu reve.

¹⁹ Moisés oï vɨteri Madián pe yave yandeYa jei vi chupe: —Eyerova ye Egipto kotɨ, echa opa ma omano oipota tëi ndeyuka vae reta.

²⁰ Jayave Moisés ombopo jembireko jare taɨ reta mburika re, jare oyerova ye ɨvɨ Egipto kotɨ. Jare Moisés güɨraja ipo pe popoka Tumpa omee chupe vae.

²¹ Jare yandeYa jei Moisés pe: —Reo reväe Egipto pe yave, eyapo Faraón jóvai opaete mɨakañɨ reta amee reyapo vaerä vae; ërei che amotätata ipɨa agüɨye vaerä omaeño yogüɨraja Israel iñemuña reta.

²² Jare rereta Faraón pe: “Körai jei cheYa: Israel jae ko cheraɨrɨpɨ.

²³ Che jae ma ndeve remaeño vaerä yogüɨraja chemboete; ërei mbaetɨ ramo remaeño yogüɨraja, che ayukata nderaɨrɨpɨ.”

²⁴ Jare tape rupi yogüɨraja ma yogüɨreko yave, opɨta ñogüɨnoia pe yandeYa oë japerä pe jare oipota oyuka.

²⁵ Jayave Séfora oipɨɨ ita jaimbe kɨse rami vae, jare ombocircuncida imembɨ jare oipichɨ Moisés ipɨ re, jei reve: “Añetete chemenda ïru ete kavi ko nde metei tugüɨ pe.”

²⁶ Körai jaɨkue rupi omaeño ojo Moisés. Jare Séfora jei, Moisés jae ko imenda ïru metei tugüɨ pegua vae, imichia ombocircuncida jeko pegua.

²⁷ Jökorai ramboeve yandeYa jei vi Aarón pe: “Ekua ñuu kotɨ eövaiti Moisés.” Jayave Aarón ojo ñuu kotɨ, jare oväe chupe Moisés, Tumpa iɨvɨtɨ pe. Joko pe maraetei oyapo chupe oovapɨte reve.

²⁸ Jayave Moisés imiari Aarón pe opaete ñee reta yandeYa oyókuai vae, jare opaete mɨakañɨ reta omee oyapo vaerä vae.

²⁹ Yogüɨraja Moisés jare Aarón, jare omboatɨ Israel iñemuña reta güi opaete tenondegua reta,

³⁰ jare Aarón imiari opaete mbaembae yandeYa jei Moisés pe vae, jare oyapo mɨakañɨ opaete vae jesa róvai.

³¹ Jare opaete vae güɨrovia; oendu reta yandeYa ou ko Israel iñemuña reta omborɨ vae, jare oikuaa reta Tumpa oecha kërai oiporara yae reta ko vae yave, itɨndɨ reta omboete.