ÉXODO 39 - Biblia Guarani Tumpa Iñee

Oyeapo temimonde sacerdote reta pegua

¹ Vecharaagüe inimbo jovɨ vae, pɨ̈taü vae, pɨ̈taasɨ vae, oyapo reta temimonde o mbaemboetea pegua mbaravɨkɨ oyeapo yave oyemonde vaerä. Jökoraiño vi oyapo reta temimonde ikavi yae vae Aarón peguarä, yandeYa oyókuai Moisés vae rami.

² Temimonde iyɨvambae peguarä oyeapo vaerä oyeporu, oro, vecharaagüe inimbo jovɨ vae, pɨ̈taü vae, pɨ̈taasɨ vae jare lino oñepövagüe.

³ Jare omboipeasɨ reta oro jare oyasɨa reta inimbo rami, pɨpe omopïra reta vaerä vecharaagüe inimbo jovɨ vae, pɨ̈taü vae, pɨ̈taasɨ vae jare lino, tembiapo ikavi yae vae ndive oyeapo vaerä,

⁴ jare iyatiɨ ñavo re oyapo reta iïcha, pɨpe oyemboya vaerä oyoe.

⁵ Jare jókuae temimonde iyɨvambae re kuakuaa oï vae, oyeapo vi; oro, vecharaagüe inimbo jovɨ vae, pɨ̈taü vae, pɨ̈taasɨ vae, jare lino oñepövagüe pegua, yandeYa oyókuai Moisés vae rami.

⁶ Jare oñopa reta mókoi ita ónice jee vae, jare omoembeɨ reta oro pe, jare Israel taɨ reta jee oyekuatía oï jese.

⁷ Jare Bezaleel oñono temimonde iyɨvambae iyatiɨ ñavo re, ita yemomaendúa pegua Israel taɨ reta re, yandeYa oyókuai Moisés vae rami.

⁸ Oyapo vi temimonde pɨtía regua, ipoki rupi omopöra kavi yae oyapo; temimonde iyɨvambae oyeapo rami, oro, vecharaagüe inimbo jovɨ vae, pɨ̈taü vae, pɨ̈taasɨ vae, jare lino oñepövagüe pegua.

⁹ Kuae pɨtía regua oyoarambo jare irundɨ iyɨke oyovake päve, ipɨgüe güɨnoi veintidó centímetro oyemboyeapa yave.

¹⁰ Jare oñono reta jese irundɨ ñesɨro ita ipöra yae vae. Tenondegua ñesɨro pe oï metei ita sardio jee vae, metei topacio jee vae jare metei carbunclo jee vae;

¹¹ mókoi ñesɨro pe oï metei ita esmeralda jee vae, metei zafiro jee vae jare metei diamante jee vae;

¹² mboapɨa ñesɨro pe oï metei ita jacinto jee vae, metei ágata jee vae jare metei amatista jee vae;

¹³ jare irundɨa ñesɨro pe oï metei ita berilo jee vae, metei ónice jee vae jare metei jaspe jee vae. Opaete kuae ita reta oyemoembeɨ oro pe,

¹⁴ jare opaete reve doce ita reta, echa doce ko Israel taɨ reta, ita ñavo re oyekuatía jee reta, doce ñemuña vae reta jee ñavo.

¹⁵ Oyapo reta vi pɨtía regua re jopea oñeope vae, oro oyeambae pegua.

¹⁶ Oyapo reta vi pɨtía regua mókoi iïcha renda, jare mókoi argolla oro pegua, jare oñono reta jembeɨ mbeɨ re,

¹⁷ jare oñapɨti reta jókuae mókoi iïcha reta, jókuae argolla oro pegua pɨtía regua jembeɨ mbeɨ re jenondegua re.

¹⁸ Jare jókuae mókoi iïcha reta iyapɨ yapɨ oñapɨti reta, temimonde iyɨvambae iïcha iyatiɨ regua jenondegua re.

¹⁹ Jare oyapo reta ye ïru mókoi argolla oro pegua, jare oñono reta pɨtía regua jembeɨ mbeɨ ɨvɨkotɨgua re, japɨpe kotɨ, temimonde iyɨvambae kotɨ oï vae re.

²⁰ Oyapo reta ye vi mókoi argolla oro pegua, jare oñono reta temimonde iyɨvambae iyatiɨ iïcha reta jenondegua re, ɨ́vɨkotɨ rupi oyembovɨvɨa re katu, temimonde iyɨvambae re kuakuaa oï vae iárambo rupi.

²¹ Jare pɨtía regua re mókoi argolla ñogüɨnoi vae, oñapɨti reta temimonde iyɨvambae re mókoi argolla ñogüɨnoi vae re, vecharaagüe inimbo jovɨ vae pe, pɨtía regua opɨta vaerä temimonde iyɨvambae re kuakuaa oï vae iárambo, agüɨye vaerä pɨtía regua oyeekɨ temimonde iyɨvambae güi.

²² Oyapo reta vi ñeapevaka temimonde iyɨvambae iaramboguarä, vecharaagüe inimbo jovɨ vae katuai, ipoki ombaapo vae jembiapo.

²³ Jókuae ñeapevaka temimonde iyɨvambae iarambogua güɨnoi iñäkagua, oyemboyeapa kavi ombovɨvɨ reta jembeɨ rupi, agüɨye vaerä osoro.

²⁴ Jókuae ñeapevaka jembeɨ rupi oyapo reta temitɨ granada jee vae ia iägüe, vecharaagüe inimbo jovɨ vae, pɨ̈taü vae, pɨ̈taasɨ vae, jare lino oñepövagüe pegua.

²⁵ Oyapo reta vi kapana raɨ reta oro oyeambae pegua, jare oñono reta temitɨ granada jee vae ia iägüe ipäu rupi ñeapevaka jembeɨ rupi, jökorai omoñopäu päu güɨroyere reta opaete jembeɨ rupi;

²⁶ oï metei kapana raɨ oro pegua, jare jaɨkue oï temitɨ granada jee vae ia iä; jökorai oñopäu päu oyere ñeapevaka jembeɨ rupi, sacerdote oparavɨkɨ yave omonde vaerä, yandeYa oyókuai Moisés vae rami.

²⁷ Oyapo reta vi temimonde ikavi yae vae lino oñepövagüe pegua, ipoki ombaapo vae jembiapo, Aarón peguarä jare taɨ reta peguarä.

²⁸ Oyapo reta vi äka-ɨru lino oyeambae pegua, jare ïru äka-ɨru reta omopöra vae lino oyeambae pegua vi, jare temimonde igüɨ pegua reta lino oñepövagüe pegua.

²⁹ Jökorai vi kuakuaa lino oñepövagüe pegua, vecharaagüe inimbo jovɨ vae, pɨ̈taü vae jare pɨ̈taasɨ vae pegua, ipoki ombaapo vae jembiapo, yandeYa oyókuai Moisés vae rami.

³⁰ Omboipeasɨ reta oro oyeambae jare oikuatía reta jese: “ÑEÑONO TEE YANDEYA PE.”

³¹ Jare omoïcha reta vecharaagüe inimbo jovɨ vae pe, oñono reta vaerä äka-ɨru jesɨva re, yandeYa oyókuai Moisés vae rami.

Opa oyeapo tupao guakapi peguarä jare mbaembae pɨpeguarä

³² Körai opa oyeapo tupao guakapi peguarä vae, jare opaete mbaembae pɨpeguarä vae. Israel iñemuña reta oyapo yandeYa oyókuai Moisés rami kavi.

³³ Javoi güeru reta Moisés pe, tupao guakapi peguarä vae, jare opaete mbaembae, tɨ̈ai reta, ɨvɨra oñeopa vae reta, ɨvɨra oyepɨasa vaerä vae reta, okɨta reta jare iguapɨka reta;

³⁴ o iarambogua vecha kuimbae pire oñemopɨ̈tagüe reta pegua, jare mɨmbapire ikavi yae vae pegua, jare asoya o imboyaoa;

³⁵ käjou yemomaendúa pegua, jare iɨvɨra oyepɨasa vae reta, jare ñɨ̈ro renda käjou itapa;

³⁶ mesa jare opaete ivaso reta, jare mbɨyape mbaemboete pegua;

³⁷ mechero renda oro oyeambae pegua jare mechero reta; jókuae mechero reta jese oñesɨrota vae, jare opaete jembiporu reta, jare asaite mechero peguarä;

³⁸ ikäti kavi vae incienso oyeapɨ jese vae oro pegua, asaite yeparavo pegua, incienso ikäti kavi yae vae, asoya tupao guakapi pegua jöke reguarä;

³⁹ mɨmba oyeyuka oyeapɨ jese vae jiero iyu vae pegua, jare japɨpegua güɨrapembɨecha vae ndive jiero iyu vae pegua, jare opaete jembiporu reta, ɨrɨru jare iguapɨka;

⁴⁰ asoya reta oka ikësea, poste reta jare iguapɨka reta, asoya oka jöke reguarä, itɨmasa reta jare ietaka reta jare opaete tembiporu reta tupao guakapi pegua peguarä;

⁴¹ temimonde reta o mbaemboetea pegua pe mbaravɨkɨ oyeapo yave oyemonde vaerä, temimonde ikavi yae ete vae sacerdote Aarón peguarä jare taɨ reta jemimonderä.

⁴² Opaete mbaembae reta yandeYa oyókuai Moisés rami kavi, Israel iñemuña reta oyapo opaete mbaravɨkɨ.

⁴³ Jare Moisés omae opaete mbaembae re, jare oecha oyapo reta yandeYa oyókuai rami, jare jei ñee kavi chupe reta.