ÉXODO 37 - Biblia Guarani Tumpa Iñee

Mbaembae tupao guakapi pegua

¹ Bezaleel oyapo vi käjou ɨvɨra käti pegua, pukugüe güɨnoi metei metro diez centímetro, ipɨ sesenta y cinco centímetro jare ɨvategüe sesenta y cinco centímetro.

² Oñova japɨpe rupi, jare ikupe rupi oro oyeambae pe jare iárambo jembeɨ rupi omopöra vae oyapo oro pegua güɨroyere jese.

³ Oyapo vi chupe irundɨ argolla oro pegua, iyɨke reguarä, metei iyɨke re mókoi jare ïru iyɨke re mókoi vi.

⁴ Oñopa vi chupe ɨvɨra käti, ɨvɨra oyepɨasa vae retarä, jare oñova oro pe.

⁵ Jare oësɨvo jókuae argolla rupi, käjou iyɨke yɨke re ñogüɨnoi vae re oyereraja käjou.

⁶ Oyapo vi ñɨ̈ro renda käjou itapa oro oyeambae pegua, pukugüe güɨnoi metei metro diez centímetro jare ipɨgüe sesenta y cinco centímetro.

⁷ Oyapo vi mókoi araɨgua iä oro pegua; martillo pe oyeapo vae, jókuae ñɨ̈ro renda käjou itapa jembeɨ mbeɨ re.

⁸ Metei araɨgua iä oyapo metei jembeɨ re, jare ïru araɨgua iä oyapo ïru jembeɨ re, ñɨ̈ro renda käjou itapa jare araɨgua iä reta oyapo metei güiño,

⁹ jare araɨgua iä reta ipepo omoata ñogüɨnoi ñɨ̈ro renda käjou itapa iárambo rupi, oyóvai ñogüɨnoi omae reta reve ñɨ̈ro renda käjou itapa re.

Mesa oyeapo mbɨyape mbaemboete pegua jendarä

¹⁰ Bezaleel oyapo vi metei mesa ɨvɨra käti pegua; ipukugüe güɨnoi noventa centímetro, jare ipɨgüe cuarenta y cinco centímetro jare ɨvategüe sesenta y cinco centímetro.

¹¹ Jare oñova oro oyeambae pe, jare ɨvate jembeɨ rupi omopöra vae oyapo oro pegua güɨroyere jese.

¹² Omopüa vi jembeɨ rupigua oyere jese vae siete centímetro ipɨgüe, jare iárambo jembeɨ rupi omopöra vae oyapo oro pegua güɨroyere jese.

¹³ Oyapo vi chupe irundɨ argolla oro pegua, jare oñono itɨma ñavo re,

¹⁴ mesa itɨma oyoapɨa igüɨ pe ñogüɨnoi, kuae reta rupi oñeësɨvo ɨvɨra oyepɨasa vae reta, oyereraja vaerä mesa.

¹⁵ Oñopa vi ɨvɨra käti ɨvɨra oyepɨasa vae reta, mesa oyereraja vaerä, jare oñova oro pe.

¹⁶ Oyapo vi oro oyeambae pegua tembiporu reta mesa pe oïta vae, ñae, kuchara, tasa guasu jare kopa mbota reta oyepɨyere pɨpe vaerä.

Oyeapo mechero renda oro pegua

¹⁷ Oyapo vi mechero renda oro oyeambae pegua, martillo pe oyeapo vae. Iguapɨka, itɨma, mbaepotɨ iä reta, opaete kuae reta oyeapo metei güiño;

¹⁸ opaete reve ova iyɨva; metei iyɨke re oï mboapɨ iyɨva, jovaicho kotɨ oï mboapɨ vi.

¹⁹ Mboapɨ mbaepotɨ temitɨ almendra ipotɨ iä rami vae oï metei iyɨva re, jökorai oï ova iyɨva ñavo re,

²⁰ mechero renda itɨma re oï irundɨ mbaepotɨ temitɨ almendra ipotɨ iä rami vae.

²¹ Mókoi iyɨva ñavo igüɨ pe güɨnoi metei mbaepotɨ iä, jökorai ova iyɨva oë mechero renda güi vae igüɨ pe.

²² Mbaepotɨ iä reta jare iyɨva oyeapo metei güiño, opaete kuae reta oyeapo oro oyeambae pegua, martillo pe oyeapo vae.

²³ Oyapo vi chupe oro oyeambae pegua chiu mechero, itenasa reta jare iñae raɨ raɨ.

²⁴ Mechero renda jare opaete jembiporu reta oyapo vaerä, oiporu treinta y tres kilo oro oyeambae.

Oyeapo ikäti kavi vae incienso oyeapɨ jese vaerä

²⁵ Oyapo vi ɨvɨra käti pegua, ikäti kavi vae incienso oyeapɨ jese vaerä, ipɨgüe güɨnoi cuarenta y cinco centímetro päve irundɨ reve iyɨke, jare noventa centímetro ɨvategüe, jare guakarätiecha vae reta oyeapo metei güiño mɨmba oyeyuka oyeapɨ jese vae ndive.

²⁶ Jare oñova oro oyeambae pe, iárambo rupi, iyɨke yɨke jare guakarätiecha ñogüɨnoi jese vae reta, jare iárambo jembeɨ rupi omopöra vae, oyapo oro pegua güɨroyere jese.

²⁷ Oyapo vi chupe mókoi argolla oro pegua, jembeɨ rupi oñemopöra oï vae igüɨ rupi oñono mókoi ekina iyɨke ñavo oime vae re, iyɨke yɨke kotɨ oï vae re, oñeësɨvo vaerä jokoropi ɨvɨra oyepɨasa vae reta, pɨpe oyereraja vaerä.

²⁸ Oñopa vi ɨvɨra käti ɨvɨra oyepɨasa vae reta, jare oñova oro pe.

Oyeapo asaite yeparavo pegua jare ikäti kavi vae incienso

²⁹ Oyapo vi asaite ikɨambae yeparavo pegua, jare ikäti kavi vae incienso oyeambae, ikäti kavi vae, mbae ikäti kavi vae iyapoa jembiapo rami.