ÉXODO 36 - Biblia Guarani Tumpa Iñee

¹ Jayave, Bezaleel jare Aholiab, jare opaete kuimbae ipɨa arakuaa vae reta, yandeYa omee arakuaa katu chupe vae reta, oikatu vaerä oyapo opaete mbaravɨkɨ o mbaemboetea pegua vae toyapo, opaete mbaembae yandeYa oporookuai jese vae.”

Moisés oyopia mbota Israel iñemuña reta güi

² Jare Moisés oenɨi Bezaleel jare Aholiab, jare opaete kuimbae ipɨa arakuaa vae reta, yandeYa omee arakuaa katu chupe vae reta, oyandu ipɨa pe kɨ̈reɨ ngatu yogüeru oporomborɨ vaerä mbaravɨkɨ pe vae reta.

³ Jare oipɨɨ reta mbota Moisés güi Israel iñemuña reta güerugüe, o mbaemboetea pegua mbaravɨkɨ oyeapo vaerä vae. Jare Israel iñemuña reta jekuaeñoi ara ñavo güeru mbota, ipɨakavi reve omee reta vae.

⁴ Jayave opaete mbaravɨkɨ o mbaemboetea pegua oyapo ñogüɨnoi vae reta,

⁵ yogüeru omomiari Moisés, jei reta chupe: “Israel iñemuña reta jeta yae ete ma güeru mbota, mbaravɨkɨ pe oyeporuta vae yandeYa oporookuai jese vae oyeapo vaerä.”

⁶ Jayave Moisés omondo iñee teyupa rupi, agüɨye vaerä ma metei ave kuimbae ani kuña omee mbota o mbaemboetea peguarä. Jökorai Israel iñemuña reta oyeopia agüɨye vaerä ma omee reta mbota;

⁷ echa oupitɨ kavi yae ma mbaembae oyeapo vaerä, opaete mbaravɨkɨ jare jembɨre ye.

Tupao guakapi pegua oyeapo

⁸ Opaete jókuae oparavɨkɨ vae reta güi ipɨa arakuaa vae reta oyapo tupao guakapi pegua, payandepo asoya güɨnoi vae jare lino oñepövagüe pegua, vecharaagüe inimbo jovɨ vae, pɨ̈taü vae, pɨ̈taasɨ vae, oyapo reta vi jese ipoki rupi araɨgua reta iä.

⁹ Metei asoya ipukugüe güɨnoi doce metro y medio jare ipɨgüe mókoi metro; opaete kuae asoya reta güɨnoi metei ramiño ipukugüe jare ipɨgüe.

¹⁰ Pandepo asoya ombovɨvɨ reta oyoe, jökoraiño vi ïru pandepo asoya;

¹¹ jare omoïcha reta jembeɨ rupi vecharaagüe inimbo jovɨ vae pe, pandepo reta güi iyapɨ pe oï vae, jökoraiño vi ïru pandepo reta iyapɨ pegua.

¹² Jökorai oyapo reta cincuenta iïcha asoya tenondegua jembeɨ rupi, jare ïru pandepo asoya reta güi iyapɨ pe oï vae re, iïcha reta oyóvai yóvai ñogüɨnoi.

¹³ Oyapo reta vi cincuenta tɨ̈ai oro pegua, kuae reta rupi oësɨvo reta asoya oyoe, jare körai oyeapo metei tupao guakapi pegua.

¹⁴ Oyapo reta vi once asoya kavara jaa pegua, tupao guakapi pegua iaramboguarä.

¹⁵ Kuae once asoya vae güɨnoi metei ramiño ipukugüe jare ipɨgüe, metei ñavo asoya güɨnoi trece metro y medio pukugüe jare mókoi metro ipɨgüe.

¹⁶ Jare ombovɨvɨ oyoe pandepo asoya vae, jare ïru yemboyao pe ova asoya vae ombovɨvɨ vi oyoe.

¹⁷ Jare oyapo reta cincuenta iïcha asoya jembeɨ rupi, pandepo asoya güi iyapɨ pe oï vae re, jökoraiño vi ïru ova asoya güi iyapɨ pe oï vae re.

¹⁸ Oyapo reta vi cincuenta tɨ̈ai jiero iyu vae pegua, omboya vaerä oyoe küaraɨa, jökorai opɨta vaerä metei ramiño.

¹⁹ Oyapo reta vi tupao guakapi pegua iküaraɨa iaramboguarä, vecha kuimbae pire oñemopɨ̈tagüe jare oyapo reta vi iarambogua eterä mɨmbapire ikavi yae vae.

²⁰ Oñopa reta vi ɨvɨra käti tupao guakapi pegua reguarä, jare omboyemboɨ kavi reta.

²¹ Ɨvɨra oñeopagüe ñavo güɨnoi irundɨ metro oasa pukugüe jare sesenta y cinco centímetro ipɨgüe,

²² mókoi añɨka güɨnoi ɨvɨra ñavo, oyoɨke vaerä ïru ɨvɨra ndive, körai oyapo opaete ɨvɨra reta tupao guakapi pegua reguarä.

²³ Oñopa reta vi veinte ɨvɨra tupao guakapi pegua joguambɨ reguarä, arayevɨ kotɨguarä.

²⁴ Oyapo reta vi cuarenta korepoti pegua, jókuae veinte ɨvɨra oñeopagüe iguapɨkarä, mókoi guapɨka oï metei ɨvɨra oñeopagüe itɨma igüɨ pe, jökorai vi ïru ɨvɨra ñavo.

²⁵ Jare tupao guakapi pegua joguambɨ jovaicho ɨvɨtuguasu kotɨguarä, oyapo reta vi veinte ɨvɨra oñeopagüe,

²⁶ cuarenta iguapɨka korepoti pegua ndive, mókoi guapɨka oï metei ɨvɨra oñeopagüe itɨma igüɨ pe, jökorai vi ïru ɨvɨra ñavo.

²⁷ Jare tupao guakapi pegua joguambɨ kuaraɨ oikea kotɨguarä, oñopa reta ova ɨvɨra,

²⁸ oñopa reta vi mókoi ɨvɨra tupao guakapi pegua, mókoi iekina reguarä.

²⁹ Kuae ɨvɨra reta oya oyoe igüɨ kotɨ güive, jökoraiño vi ɨvategua reta oya oyoe ivisagra reta rupi; jökorai vi oyeapo ïru mókoi ekina reta ndive.

³⁰ Jayave opaete reve oyeapo juri ɨvɨra oñeopagüe, jare diecisei iguapɨka korepoti pegua, mókoi guapɨka oï metei ɨvɨra oñeopagüe ñavo igüɨ pe.

³¹ Oñopa reta vi pandepo ɨvɨra käti, ɨvɨra oyepɨasa vaerä tupao guakapi pegua iyɨke rupi,

³² jare pandepo ɨvɨra vi jovaicho kotɨguarä, jökorai vi jaɨkue kotɨguarä, kuaraɨ oikea kotɨ.

³³ Jare mbɨte pegua ɨvɨra oyepɨasa vae omboasa reta ïru ɨvɨra reta ikúa rupi, ïru jembeɨ güi oasa jovaicho kotɨ.

³⁴ Jare oñova reta oro pe ɨvɨra oñeopagüe reta, jare oyapo reta chupe argolla reta oro pegua, jokoropi oasa vaerä ɨvɨra oyepɨasa vae, opa vi oñova reta oro pe ɨvɨra oyepɨasa vae reta.

³⁵ Oyapo reta vi asoya o imboyaoa vecharaagüe inimbo jovɨ vae, pɨ̈taü vae, pɨ̈taasɨ vae jare lino oñepövagüe pegua, jare oyapo reta jese ipoki rupi kavi araɨgua reta iä,

³⁶ ombosagüɨu jese vaerä oyapo reta irundɨ okɨta ɨvɨra käti pegua, iyapɨte regua tɨ̈ai oro pegua jare irundɨ iguapɨka korepoti pegua.

³⁷ Oyapo reta vi asoya tupao guakapi pegua jökerä vecharaagüe inimbo jovɨ vae, pɨ̈taü vae, pɨ̈taasɨ vae jare lino oñepövagüe, ipoki ipo pe ombaapo vae reta jembiapo rami.

³⁸ Jare pandepo okɨta ɨvɨra käti pegua, iyapɨte regua tɨ̈ai reta ndive, kuae tɨ̈ai reta oñeova oro pe jare pandepo iguapɨkarä oyeapo jiero iyu vae pegua.