ÉXODO 34 - Biblia Guarani Tumpa Iñee

Morogüɨrökuavee päve oyeapo pɨau ye

¹ YandeYa jei Moisés pe: —Emoïchɨi ndeyeupe mókoi ita ipe vae, tenondegua reta rami, jare che aikuatía vaerä jese jókuae opa reyoka vae reta re oyekuatía ñee reta oï vae.

² Eyupavo, pɨareve ndeimbove reyeupi vaerä ɨvɨtɨ Sinaí re, jare ekua eñeñono cheróvai ɨvɨtɨ iyapɨte re.

³ Agüɨye metei kuimbae ave toyeupi nde ndive, agüɨye metei ave toyekuaa opaete ɨvɨtɨ rupi, vecha ani güeye ave agüɨye tokaru ɨvɨtɨ jóvai rupi.

⁴ Jayave Moisés omoïchɨi mókoi ita ipe vae, tenondegua reta rami, jare opüa ndeimboveasɨ oyeupi ɨvɨtɨ Sinaí re, yandeYa oyókuai rami, jare ipo pe güɨraja jókuae mókoi ita ipe vae.

⁵ Jare yandeYa ogüeyɨ metei amapɨtu re, jare oï joko pe Moisés ndive, oñeenɨi reve jee ae pe.

⁶ YandeYa oasa jae jóvai rupi, oñeenɨi reve jee ae pe: —¡NdeYa! ¡NdeYa! ¡Tuicha yae vae, iporoparareko vae; iyarasɨ raivimbae, iporoparareko tuicha yae ete jare añetete vae!

⁷ Jeta ñemuña reta re iporoparareko vae, iñɨ̈ro ikavimbae iyapoa pe, ipɨarai vae pe, mbaeyoa iyapoa pe, ërei mbaetɨ oeya jekombae rami mbae pɨ̈chɨi iyapoa, echa ko iñemuñagüe reta imbaeyavɨ oiporarata taɨ reta, jɨmɨmino reta, jɨmɨmino taɨ reta jare jɨmɨmino reta jɨmɨmino.

⁸ Jayave Moisés jarembae pegua oyetavatɨka itindɨasɨ ɨvɨ re, jare omboete yandeYa.

⁹ Jare jei: —Añave cheYa, ndepɨakatu ko chekotɨ yave, ekua orerupíe añave; echa kuae reta ipɨa täta yae vae ko, neɨ̈ro oreve orembaeyavɨ re, oreyoa re jare toroiko ndembaerä.

¹⁰ Tumpa jei chupe: “Mase, che ayapo morogüɨrökuavee päve opaete vae jovake, jare ayapota mɨakañɨ reta mbaetɨ oyeapo ɨvɨ pe vae, metei tëtaguasu pe ave mbaetɨ oyeapo vae, jare che peYa jembiapo oechata opaete vae, nde reï ipɨte pe vae reta, echa mɨakañɨ tuicha yae ete vae ko che ayapota nde ndive.

Yeandu Canaán pegua tumpa-raanga reta güi

¹¹ Peyapo che poyókuai añave vae; mase, che amoëta amombo perenonde güi amorreo reta, cananeo reta, heteo reta, ferezeo reta, heveo reta jare jebuseo reta.

¹² Agüɨye peyapo ñemoïru jókuae ɨvɨ peiketa pɨpe vae pe yogüɨreko vae reta ndive, agüɨye vaerä pemomoe jae reta jeko.

¹³ Jɨmba oyuka oapɨ jese vae reta opa pemboai chugüi, opa peyoka mbae iä reta jare Asera iä reta.

¹⁴ Agüɨye pemboete ïru tumpa, echa che peYa, jee ko Jägüɨro vae, Tumpa jägüɨro vae ko.

¹⁵ Jáeramo agüɨye peyapo ñemoïru jókuae ɨvɨ pe yogüɨreko vae reta ndive, agüɨye vaerä pemboete itumpa reta, echa omee reta yave itumpa reta pe mbota, opareata peve peu vaerä mɨmba oyeyukagüe, itumpa reta pe omee vae;

¹⁶ ani tayɨ reta omomenda yave peraɨ reta ndive, jókuae kuña reta omboete yave itumpa reta, omboeteukata vi ko peraɨ reta pe jae reta itumpa reta.

¹⁷ Agüɨye peyapo peyeupe tumpa reta jiero oyemondɨkui oyeapo vae pegua.

Arete reta año ñavo vae

¹⁸ Peyapo arete mbɨyape oyembovumbae pegua; chiu ara peu mbɨyape oyembovumbae, che poyókuai rami, yasɨ Abib pe che amombeu pevea pe, echa yasɨ Abib pe peë Egipto güi.

¹⁹ Opaete tenonde oa vae, chembae ko; jare opaete peguaka, jare vecha imembɨrɨpɨ reta kuimbae ko yave.

²⁰ Ërei pemboepɨ metei vecha kuimbae taɨrusu vae pe mburika imembɨrɨpɨ kuimbae, mbaetɨ ko yave peiyayu rakɨo. Pemboepɨ vi opaete peraɨrɨpɨ ñavo. Agüɨye metei ave tipogüɨrai tou cheróvai.

²¹ Ova ara peparavɨkɨ, ërei chiúa ara pe peputuu, yepe tëi maetɨ ara ani mbaarɨvo ara, peputuuta ko.

²² Peyapo vi arete reta semana vae, trigo yagüɨyerɨpɨ vae regua, jare arete mbaarɨvo regua año opata ma yave oyeapo vae.

²³ Mboapɨ ye año pe, kuimbae reta nde ndive ñogüɨnoi vae toñeñono che peYa, Israel iTumpa jóvai.

²⁴ Echa che amoëta amombo tëtaguasu reta pepɨte güi, jare ambotuichata peɨvɨ; jare ngaraa metei ave opɨ̈ro peɨvɨ, peo yave peñeñono peYa Tumpa jóvai mboapɨ ye año pe.

²⁵ Agüɨye pemee mbɨyape oyembovugüe mɨmba oyeyukagüe jugüɨ ndive, agüɨye jembɨregüe peñovatu pɨareve peguarä mɨmba oyeyuka arete Pascua pe vae.

²⁶ Pembaagüɨyerɨpɨ ikavigüe peraja che peYa Tumpa jo pe. Agüɨye kavara raɨ isoo pemboyɨ ichɨ ineche pe.”

Moisés oikuatía mborookuai

²⁷ YandeYa jei Moisés pe: “Eikuatía kuae ñee reta, echa kuae ñee reta jei vae rupi, ayapo morogüɨrökuavee päve nde ndive jare Israel iñemuña reta ndive.”

²⁸ Moisés opɨta yandeYa ndive joko pe cuarenta ara jare cuarenta pɨ̈tu, okarumbae jare oɨumbae; jare oikuatía ita ipe vae re ñee reta morogüɨrökuavee päve pegua, payandepo mborookuai reta.

²⁹ Javoi Moisés ogüeyɨ ɨvɨtɨ Sinaí güi, güeru reve ipo pe jókuae mókoi ita ipe vae, mborookuai reta oyekuatía oï jese vae; ërei ɨvɨtɨ güi ogüeyɨ ou yave, Moisés mbaetɨ oikuaa jova jembipe ko vae, imiari güire Tumpa ndive.

³⁰ Aarón jare opaete Israel iñemuña reta omae yave Moisés re, oecha reta jova jembipe, jare okɨɨye reta oya jese.

³¹ Jayave Moisés oenɨi reta; Aarón jare opaete Israel iñemuña juvicha reta oya jese, jare Moisés omomiari reta.

³² Taɨkue rupi opaete Israel iñemuña reta oya jese, jare Moisés oyókuai reta opaete yandeYa jei chupe ɨvɨtɨ Sinaí re vae.

³³ Moisés opa yave imiari jae reta ndive, oyasoi jova äka-soya pe.

³⁴ Moisés ojo yave yandeYa ndive imiari vaerä, oekɨ iyeugüi jova iyasoía, oë ye regua. Oë ye yave omombeu Israel iñemuña reta pe yandeYa oyókuai vae.

³⁵ Israel iñemuña reta omae yave Moisés re, oecha reta jova jembipe, jare Moisés jekuae oñono ye jova re jókuae äka-soya, oike ye regua imiari Tumpa ndive.