ÉXODO 32 - Biblia Guarani Tumpa Iñee

¹ Israel iñemuña reta oecha Moisés ogüeyɨ raiviä ma ɨvɨtɨ güi yave, oyomboatɨ reta Aarón oïa pe jare jei reta chupe: —Eyapo oreve tumpa orereroata vaerä; echa Moisés orerenoe ɨvɨ Egipto güi vae, mbaetɨ roikuaa mbae ra oasa vae.

² Jare Aarón jei chupe reta: —Peekɨ namicha oro pegua perembireko reta güi, peraɨ reta, perayɨ reta inambi re güɨnoi vae, jare peru cheve.

³ Jayave opaete vae oekɨ iyeugüi namicha oro pegua, jare güɨraja reta Aarón pe;

⁴ Aarón oipɨɨ chugüi reta, jare omondɨkui oro, jare oyasɨa jiero iyasɨaa pe, oyapo kavi regua metei toro taɨrusu vae iä. Jayave opaete reve jei reta. —¡Israel iñemuña reta, kuae ko jae petumpa, ɨvɨ Egipto güi perenoe vae!

⁵ Aarón oecha kuae yave, oyapo metei mɨmba oyeyuka oyeapɨ jese vae, toro taɨrusu vae iä jóvai, jare osapúkai jei reve: —¡Pɨareve yayapo arete yandeYa peguarä!

⁶ Pɨareve pe opüa reta ndeimboveasɨ, jare omee reta mɨmba oyeyukagüe opaetei oyeapɨ vae jare mbota mbɨakatu pegua, javoi oguapɨ reta okaru, okau, jare opüa reta güɨropo.

⁷ Jayave yandeYa jei Moisés pe: —Ekua, egüeyɨ ekua, echa ɨvɨ Egipto güi renoe vae reta, opa oikomegua.

⁸ Jarembae yae opia reta che ayókuai reta vae güi, oyapo reta iyeupe toro taɨrusu vae iä oro pegua, oyemondɨkui oyeapo vae, omboete reta jare omee reta chupe mɨmba oyeyukagüe, jare jei reta: “¡Israel iñemuña reta, kuae ko jae petumpa, ɨvɨ Egipto güi perenoe vae!”

⁹ YandeYa jei ye Moisés pe: —Che aecha kuae tëta, jare aikuaa ipɨa täta yae reta ko vae.

¹⁰ ¡Añave, emaeño tachearasɨ ikotɨ reta, jare opata amboai reta! Ërei ndegüi ayapota metei tëtaguasu tuicha yae vae.

¹¹ Jayave Moisés oyerure yandeYa Tumpa pe, jei: —CheYa, ¿maera pa ndearasɨta ndembae vae reta kotɨ, nde renoe ɨvɨ Egipto güi ndembaepuere yae rupi vae?

¹² ¿Remaeñota pa Egiptoɨgua reta jei: “Ikavimbae oyapo chupe reta vaeräño opa güɨnoe, opa vaerä oyuka ɨvɨtɨ re, opa vaerä omboai ɨvɨ iárambo güi”? Agüɨye ndearasɨ, eipoepɨ ndeyemongeta, ikavimbae reyapota ndembae vae reta pe vae.

¹³ Nemaendúa nderembiokuai Abraham, Isaac jare Israel re, kuae reta pe nde etei reñererökuavee nderee re, jare rere chupe reta: “Che amoñemuñata peñemuña reta yasɨtata rami, jare ameeta peñemuña reta pe opaete kuae ɨvɨ chemiari jese peve vae, jare oikota jae reta imbaerä jekuae avei pegua.”

¹⁴ Jayave yandeYa oipoepɨ ye iyemongeta, ikavimbae oyapota tëi imbae vae reta pe vae güi.

¹⁵ Jayave Moisés ogüeyɨ ye ɨvɨtɨ güi, güeru reve ipo pe mókoi ita ipe vae, mborookuai oyekuatía oï jese vae, jova yoyavi reve oyekuatía vae.

¹⁶ Jare jókuae ita ipe vae reta Tumpa jembiapo ko, jare oyekuatía vae Tumpa jembikuatía ko oï jese.

¹⁷ Josué oendu yave opaete vae reta isapúkai, jei Moisés pe: —Ñeraro pegua sapúkai oyeendu teyupa pe.

¹⁸ Jare Moisés jei chupe: —Mbaetɨ ko oporomoamɨri vae reta isapúkai, ani ñamɨri vae reta isapukaiä vi; yerovia pegua tairari ko che aendu.

¹⁹ Jare Moisés ou ma oväe teyupa pe yave, oecha toro taɨrusu vae iä, jare güɨropo ñogüɨnoi vae, jare Moisés ou iyarasɨ jare oitɨ ɨvɨ re mókoi ita ipe vae güerugüe, opa oyoka ɨvɨtɨ igüɨ pe;

²⁰ oipɨɨ jókuae toro taɨrusu vae iä jare oitɨ tata pe, jare opa omongúi omombɨuasɨ regua jare oitɨ ɨ pe, jare jókuae ɨ jouuka Israel iñemuña reta pe.

²¹ Jare jei Aarón pe: —¿Mbae pa kuae reta oyapo ndeve, reyapouka vaerä chupe reta mbaeyoa ikavimbae yae ete vae?

²² Jare Aarón jei: —Agüɨye ndearasɨ cheya, nde reikuaa kuae reta ikavimbae kotɨño ipɨa reta vae.

²³ Jae reta ko jei cheve: “Eyapo oreve tumpa orereroata vaerä, echa Moisés orerenoe ɨvɨ Egipto güi vae, mbaetɨ roikuaa mbae ra oasa vae.”

²⁴ Che jae chupe reta: “Oro güɨnoi vae tombosɨrɨ.” Jare omee reta cheve, jare aitɨ tata pe, ¡jare oë kuae toro taɨrusu vae iä!

²⁵ Jare Moisés oecha opaete vae mbaetɨ etei oipoɨu, echa Aarón omaeño jese reta, yogüɨreko vaerä ñemomarai rupi jovaicho reta ipɨte rupi,

²⁶ jayave oyemboɨ teyupa jöke pe jare jei: —YandeYa reño güɨrovia vae reta toyogüeru che ndive. Jayave opaete Leví iñemuña reta yatɨ jese.

²⁷ Javoi Moisés jei chupe reta: —YandeYa, Israel iTumpa jei körai: “Metei ñavo toñono ikɨsepuku ikúa re, jare toyogüɨraja teyupa pe toasa öke ñavo rupi jare pegüi reta metei ñavo toyuka tɨkeɨ ani tɨvɨ, ivɨa-ïru jare jëtara.”

²⁸ Leví iñemuña reta oyapo Moisés jei chupe reta rami, jókuae ara omano tres mil kuimbae.

²⁹ Jayave Moisés jei: —Añave penoi mbaepuere yandeYa jóvai, echa metei ñavo peyuka peraɨ ae, perɨkeɨ ani perɨvɨ ae. Jáeramo omee peve kuae ara mborerekua.

³⁰ Jare pɨareve pe Moisés jei opaete vae pe: —Pe reta peyapo mbaeyoa ikavimbae yae ete vae, ërei añave che ajata yandeYa pɨri, güɨramoi amoɨ̈ro peve peyoa re.

³¹ Jayave Moisés ojo ye yandeYa oïa pe, jare jei chupe: —Kuae reta oyapo mbaeyoa ikavimbae yae ete vae, echa oyapo reta iyeupe tumpa-raanga oro pegua.

³² Añave romoñera, neɨ̈ro chupe reta iyoa re, jare mbaetɨ yave neɨ̈ro, ¡emboai cheree tembikuatía pe reikuatía vae güi!

³³ Ërei yandeYa jei Moisés pe: —Chekotɨ oyapo mbaeyoa vaeño amboaita cherembikuatía güi.

³⁴ Añave, ekua eraja opaete vae reta, che jae ndevea pe, chearaɨgua ojota nderenonde; ërei ñenupa ara oväe yave, che aiporaraukata chupe reta iyoa re.

³⁵ Jare yandeYa ombou mbaerasɨ opaete vae re, echa omboete reta toro taɨrusu vae iä, Aarón oyapo chupe reta vae.