ÉXODO 31 - Biblia Guarani Tumpa Iñee

Bezaleel jare Aholiab oñeenɨi vae

¹ YandeYa jei Moisés pe:

² “Mase, Judá iñemuña pegua güi che aiparavo Bezaleel, Uri taɨ, Ur jɨmɨmino,

³ jare amee chupe Tumpa iEspíritu, arakuaa katu, oikuaa katu yae vaerä mbaembae jare ipoki yae vaerä opaete mbaembae oyapo,

⁴ oikatu yae vaerä mbae ojäa kavi oyapo, oro pegua, korepoti pegua, jare jiero iyu vae pegua,

⁵ oikatu vaerä oñopa ita jepɨ vae mbae omopöra vaerä, oikatu yae ɨvɨra güi mbae oyapo vae, oikatu vaerä oyapo oipotagüe mbaravɨkɨ.

⁶ Jare amee imborɨarä Aholiab, Ahisamac taɨ, Dan iñemuña pegua jare opaete yarakuaa vae reta pe amee kɨ̈reɨ ngatu oyapo reta vaerä che royókuai vae:

⁷ Tupao guakapi pegua, käjou yemomaendúa pegua jare ñɨ̈ro renda käjou itapa, opaete tembiporu reta tupao guakapi pegua,

⁸ mesa jare jembiporu reta, mechero renda oro oyeambae pegua jare opaete jembiporu reta, ikäti kavi vae incienso oyeapɨ jese vae,

⁹ mɨmba oyeyukagüe opaetei oyeapɨ jese vae jare opaete jembiporu ndive, ɨrɨru jare iguapɨka,

¹⁰ temimonde oñeñono tee vae sacerdote Aarón peguarä jare taɨ reta peguarä, mbaravɨkɨ sacerdote pegua oyapo reta yave omonde vaerä,

¹¹ asaite yeparavo pegua jare incienso ikäti kavi yae vae o mbaemboetea peguarä. Kuae kuimbae reta toyapo che royókuai rami etei.”

Ara mbutuu regua

¹² YandeYa jei ye Moisés pe:

¹³ “Nde ere Israel iñemuña reta pe: ‘Pemboete ara reta mbutuu pegua cheveguarä oyeapo vae; echa jae ko ikañɨmaa vaerä cheve, jare peve jekuae avei rupi, peikuaa vaerä che ko peYa poñono tee vae.

¹⁴ Jayave pemboete ara mbutuu pegua oñeñono tee ko peveguarä; kuae ara omboetembae tomano. Echa oipotagüe oyapo yave mbaravɨkɨ kuae ara, jókuae nunga toyemombo ete kavi Israel iñemuña reta ipɨte güi.

¹⁵ Ova ara toyeparavɨkɨ, ërei chiúa ara pe, ara mbutuu pegua ko oñeñono tee che peYa pe. Oipotagüe oparavɨkɨ kuae ara mbutuu pegua pe yave, tomano.’

¹⁶ Jayave Israel iñemuña reta tomboete kuae ara mbutuu pegua, morogüɨrökuavee päve opambae rami.

¹⁷ Toiko ikañɨmaa vaerä Israel iñemuña reta pe jare cheve, jekuae avei pegua.” Echa ova ara pe yandeYa opa oyapo ara jare ɨvɨ, jare chiúa ara pe oeya iparavɨkɨ jare oputuu.

Toro taɨrusu vae iä oro pegua

¹⁸ Opa ma Tumpa imiari Moisés ndive ɨvɨtɨ Sinaí re yave, omee chupe mókoi ita yemomaendúa pegua, jókuae mókoi ita ipe vae, Tumpa ipoäka pe etei mborookuai reta oikuatía jese vae.