ÉXODO 30 - Biblia Guarani Tumpa Iñee

Ikäti kavi vae incienso oyeapɨ jese vae

¹ Toyapo reta vi ikäti kavi vae incienso oyeapɨ jese vaerä, ɨvɨra käti pegua,

² Ipɨgüe togüɨnoi cuarenta y cinco centímetro päve irundɨ reve iyɨke jare noventa centímetro ɨvategüe, jare guakarätiecha vae reta toyeapo metei güiño mɨmba oyeyuka oyeapɨ jese vae ndive.

³ Jare toñova reta oro oyeambae pe iarambogua, iyɨke yɨke jare guakarätiecha vae reta, jare iárambo jembeɨ rupi omopöra vae, toyapo reta oro pegua togüɨroyere jese.

⁴ Toyapo reta mókoi argolla toñono jembeɨ rupi oñemopöra vae igüɨ rupi, mókoi ekina iyɨke ñavo ñogüɨnoi vae re, oñeësɨvo vaerä jokoropi ɨvɨra reta, pɨpe oyereraja vaerä.

⁵ Ɨvɨra käti toñopa reta jókuae ɨvɨra oyepɨasa vae retarä, jare toñova reta oro pe.

⁶ Toñono reta asoya o imboyaoa jenonde, käjou yemomaendúa pegua jóvai oï vae, ñɨ̈ro renda käjou yemomaendúa pegua iárambo jóvai oï vae jenonde, che añoväeta nde ndivea pe.

⁷ Jare Aarón toapɨ jese incienso ikäti kavi yae vae, ara ñavo toapɨ, oyapo kavi yave mechero reta.

⁸ Jare pɨ̈tuta ma yave omoendɨ mechero reta yave, toapɨ ikäti kavi vae incienso; kuae mborookuai toyapo avei peñemuña reta che peYa pe.

⁹ Agüɨye tomee reta jese ambuae ikäti kavi vae incienso, mɨmba oyeyukagüe opaetei oyeapɨ vae, mbota temitɨ iagüe reta, vino mbota oyepɨyere vae ave.

¹⁰ Jare guakarätiecha vae reta re Aarón toñono mɨmba oyeyukagüe mbaeyoa oyemboai vaerä vae jugüɨgüe, año pe metei vese oyeyuka vae; metei vese año pe peñemuña reta tomee avei jese mbaeyoa oyemboai vaerä. Kuae mɨmba oyeyuka oyeapɨ jese vae, oñeñono tee kavi yae vae ko che peYa peguarä.”

Korepoti tekove regua

¹¹ YandeYa jei vi Moisés pe:

¹² “Reipapa yave Israel iñemuña reta, metei ñavo tomee korepoti che peYa pe jekove re, reipapa reta yave, agüɨye vaerä oparapiti mbaerasɨ pɨ̈chɨi yae vae.

¹³ Tomee opaete oyepapa vae cinco gramo korepoti cheve, o mbaemboete renda pe korepoti oñejäa rami. Cinco gramo korepoti ko jae mbota che peYa peguarä.

¹⁴ Opaete oyepapagüe reta veinte año güi kutɨ, tomee mbota cheve.

¹⁵ Omee reta yave mbota che peYa pe jekove re, oikokatu vae ave agüɨye tomoïru, jare paravete vae agüɨye toata tomee jókuae cinco gramo korepoti vae, omee reta yave mbaeyoa oyemboai vaerä.

¹⁶ Jayave, eipɨɨ Israel iñemuña reta güi korepoti omee mbaeyoa oyemboai vaerä vae, jare emee tupao guakapi pegua pe mbaravɨkɨ oyeapo vaerä. Mbaeyoa oyemboai vaerä omee reta jekove re vae, toiko chemomaendúa vaerä Israel iñemuña reta re.”

Ɨrɨru jiero iyu vae pegua

¹⁷ YandeYa jei ye Moisés pe:

¹⁸ “Toyapo reta vi metei ɨrɨru jiero iyu vae pegua, iguapɨka jiero iyu vae pegua, yeyoekarä jare toñono reta tupao guakapi pegua jare mɨmba oyeyuka oyeapɨ jese vae ipäu pe, jare toñono reta pɨpe ɨ.

¹⁹ Jare joko güi Aarón jare taɨ reta toyepoe jare toyoe ipɨ.

²⁰ Oike reta yave tupao guakapi pegua pe toyeyoe reta ɨ pe, jare oya reta yave mɨmba oyeyuka oyeapɨ jese vae re oyapo vaerä mbaravɨkɨ, oapɨ reta vaerä mbota oyeapɨ vae che peYa pe agüɨye vaerä omano reta.

²¹ Toyoe reta ipo jare ipɨ, agüɨye vaerä omano reta. Kuae toiko mborookuai jekuae avei pegua Aarón pe jare iñemuña reta pe.”

Asaite ñeñono tee pegua

²² YandeYa jei ye Moisés pe:

²³ “Toipɨɨ reta mbaembae ikäti kavi yae vae: Ova kilo mirra ikavi vae jare mboapɨ kilo canela ipiche kavi vae, mboapɨ kilo täkuareeecha vae ipiche kavi vae;

²⁴ ova kilo ɨvɨra casia jee vae, o mbaemboete renda pe korepoti oñejäa rami, jare mboapɨ litro oasa mi olivo asaite.

²⁵ Jókuae reta güi toyapo reta asaite ñeñono tee pegua; tikavi yae mbae ikäti kavi vae iyapoa jembiapo rami, jare toiko asaite ñeñono tee peguarä.

²⁶ Pɨpe eñono tee tupao guakapi pegua, käjou yemomaendúa pegua,

²⁷ mesa opaete jembiporu ndive, mechero renda opaete jembiporu ndive, ikäti kavi vae incienso oyeapɨ jese vae,

²⁸ mɨmba oyeyukagüe opaetei oyeapɨ jese vae, opaete jembiporu ndive jare ɨrɨru iguapɨka ndive.

²⁹ Körai eñono tee jare topɨta oñeñono tee kavi yae vae; kuae reta re oipotagüe mbae oñeátai yave, toñeñono tee topɨta.

³⁰ Aarón jare taɨ reta re epɨyere vi kuae asaite, jökorai eñono tee reta yogüɨreko vaerä chesacerdoterä,

³¹ jare ere Israel iñemuña reta pe: ‘Kuae jae cheasaite ñeñono tee pegua, apɨyere vaerä peñemuña reta re jekuae avei rupi.

³² Oipotagüe kuimbae re agüɨye toyepɨyere, agüɨye toyeapo ïru jókuae rami etei vae; echa ikɨambae ko, jare ikɨambae toiko peve.

³³ Kia nunga vae oyapo yave kuae rami etei mbae ikäti kavi vae, jare opɨyere yave oipotagüe kuimbae re, toyemombo ete kavi jëtara reta ipɨte güi.’ ”

Ikäti kavi vae incienso

³⁴ YandeYa jei ye Moisés pe: “Eipɨɨ mbaembae ikäti kavi vae, mirra ikavi yae vae, poäpe ikäti kavi vae, ɨvɨra yaɨsɨ ikäti kavi vae gálbano jee vae jare ikäti kavi vae incienso oyeambae; opaete metei rami päve tipoɨ;

³⁵ kuae reta emboyea reyapo vaerä metei ikäti kavi vae incienso, mbae ikäti kavi vae iyapoa jembiapo rami, emboyea kavi eyapo kuae reta oyeambae jare ikɨambae.

³⁶ Jare kuae reta güi mbovɨ emonguiasɨ jare eñono käjou yemomaendúa pegua jóvai, tupao guakapi pegua pe, che ayeechaukata ndevea pe. Kuae toiko peveguarä oñeñono tee kavi yae vae,

³⁷ kuae ikäti kavi vae incienso reyapo rami, agüɨye toyapo reta ïru vae kuae oyeapo rami etei, che peYa pe oñeñono tee vae toiko ndeveguarä.

³⁸ Kia nunga vae oyapo yave kuae rami etei oëtu vaerä, toyemombo ete kavi jëtara reta ipɨte güi.”