ÉXODO 3 - Biblia Guarani Tumpa Iñee

Tumpa oenɨi Moisés

¹ Moisés omongaru oiko jovaya Jetro, sacerdote Madián pegua ivecha reta yave, güɨraja vecha reta ñuu rupi, jare ojo oväe Horeb pe, Tumpa iɨvɨtɨ pe.

² Joko pe oyekuaa chupe yandeYa iAraɨgua metei yai jendɨ oï vae güi; jare omae yai jendɨ vae re, ërei jókuae yai mbaetɨ ókai.

³ Jayave Moisés jei: “¡Taja tamae, jare taecha kuae mɨakañɨ guasu oyekuaa vae, maera ra mbaetɨ ókai kuae yai!”

⁴ YandeYa oecha ojo omae vaerä jese yave, oenɨi jókuae yai jendɨ oï vae mbɨte güi, jei körai: —¡Moisés! ¡Moisés! Jare jae jei: —Ko aï.

⁵ Jare jei chupe: —Agüɨye eya kuae kotɨ; eekɨ ndepɨapaa ndepɨ güi, echa kuae ɨvɨ reï pɨpe vae, ɨvɨ oñeñono tee vae ko.

⁶ Che ko jae neñemuñagüe Abraham, Isaac jare Jacob iTumpa. Jayave Moisés oñomi jova, echa okɨɨye omae vaerä Tumpa re.

⁷ Jaɨkue rupi yandeYa jei ye: —Aecha kavi ko Egipto pe tëta chembae oï vae, jare aendu iyerure mbɨatɨtɨ reve vae, oiporara yae mbaravɨkɨ iyangarekoa reta güi jeko pegua; aikuaa katu ko jembiporara reta.

⁸ Jare ayu ayora vaerä Egiptoɨgua reta ipo güi, anoe reta vaerä jókuae ɨvɨ güi metei ɨvɨ ikavi jare ipɨguasu vae pe, ɨvɨ kavi pe; cananeo reta, heteo reta, amorreo reta, ferezeo reta, heveo reta jare jebuseo reta ñogüɨnoia pe.

⁹ Israel iñemuña reta iyerure ou aendu, jare aecha vi Egiptoɨgua reta oiporarauka chupe vae.

¹⁰ Jáeramo añave eyu, romondota Faraón oïa pe, renoe vaerä Egipto güi tëta chembae, Israel iñemuña reta.

¹¹ Jayave Moisés jei Tumpa pe: —¿Kia pa ko che aja vaerä Faraón jóvai, jare anoe vaerä Egipto güi Israel iñemuña reta?

¹² Jare Tumpa jei: —Ekua, echa che aïta nde ndive; jare kuae toï ikañɨmaa vaerä che etei ko romondo vae: Renoe ma Egipto güi tëta chembae yave, chemboeteta kuae ɨvɨtɨ re.

¹³ Jare Moisés jei Tumpa pe: —Mase, aja aväe yave Israel iñemuña reta pɨri, jare jaeta chupe reta: “Peñemuñagüe reta iTumpa chembou pekotɨ,” jare jae reta oparandu yave cheve: “¿Mbae pa jee?” ¿Che pa, mbae jaeta chupe reta?

¹⁴ Jare Tumpa jei Moisés pe: —CHE KO JAE CHE. Jare jei: Köraita rere Israel iñemuña reta pe: “CHE KO jee vae chembou pekotɨ.”

¹⁵ Tumpa jei ye Moisés pe: —Köraita rere Israel iñemuña reta pe: “YandeYa, peñemuñagüe Abraham, Isaac jare Jacob iTumpa chembou pekotɨ.” Kuae ko jae cheree jekuae avei pegua, kuae tee rupi pemaenduata cheré jekuae avei.

¹⁶ Ekua, jare emboatɨ Israel iñemuña reta itenondegua reta, jare ere chupe reta: “YandeYa, peñemuñagüe Abraham, Isaac jare Jacob iTumpa oyekuaa cheve jare jei añetete outa ko pemborɨ vae, oecha ko opaete Egiptoɨgua reta oyapo pekotɨ vae.

¹⁷ Jare perenoeta mbɨatɨtɨ güi, Egipto güi metei ɨvɨ kavi pe, cananeo reta, heteo reta, amorreo reta, ferezeo reta, heveo reta jare jebuseo reta iɨvɨ pe.”

¹⁸ Oendu retata neñee; jare reota nde jare Israel iñemuña itenondegua reta ndive mburuvicha guasu Egipto pegua pɨri, jare pereta chupe: “OreYa, hebreo reta iTumpa oyekuaa oreve; jáeramo, añave rojota ñuu kotɨ, mboapɨ ara roguatata romee vaerä mɨmba oyeyukagüe oreYa Tumpa pe.”

¹⁹ Ërei che aikuaa katu ko mburuvicha guasu Egipto pegua ngaraa omaeño peo vaerä, jaeño chembaepuere rupi omaeñota peo.

²⁰ Ërei che amopüata chepo; jare aiporaraukata Egipto pe, opaete mɨakañɨ ayapota joko pe vae rupi, jayaveño omaeñota peo.

²¹ Jare che ameeta Egiptoɨgua reta pe güɨnoi vaerä mboroparareko kuae tëta chembae kotɨ, jökorai peë joko güi yave, mbaetɨta peo pepogüɨrai;

²² metei ñavo kuña toeka jëta-ɨpɨ pegua pe, jare imboupa pe mbae jepɨ vae korepoti pegua, oro pegua jare temimonde reta, pɨpe pemboemimondeta peraɨ reta jare perayɨ reta; jökorai peitɨvɨrota Egipto peeya.