ÉXODO 29 - Biblia Guarani Tumpa Iñee

Aarón jare taɨ reta oñeñono tee vae

¹ Kuae eyapo, reñono tee vaerä chesacerdote retarä: Eipɨɨ metei toro taɨrusu vae jare mókoi vecha kuimbae jete kavi vae;

² jare eyapo mbɨyape oyembovumbae, jare mbɨyape oyembovumbae olivo iasaite pe oyemómbɨu vae, jare mbɨyape oyembovumbae ipïreriasɨ vae, asaite oñeñono jese vae; kuae reta eyapo trigokúi ipɨuasɨ kavi yae vae pegua,

³ jare eñono metei kanata raɨ pe, jare jókuae kanata raɨ pe emee cheve toro taɨrusu vae jare mókoi vecha kuimbae ndive.

⁴ Javoi eraja Aarón jare taɨ reta tupao guakapi pegua jöke pe, jare toyau reta joko pe;

⁵ javoi eipɨɨ temimonde reta sacerdote pegua, jare emondeuka Aarón pe temimonde, ñeapevaka temimonde iyɨvambae iarambogua, temimonde iyɨvambae jare pɨtía regua jare eikuakua temimonde iyɨvambae ikuakuaa pe;

⁶ jare äka-ɨru eñono iñäka re, jare jókuae äka-ɨru re, jesɨva regua ñeñono tee pegua.

⁷ Javoi eipɨɨ olivo iasaite ñeñono tee pegua, epɨyere iñäka re, jökorai eñono tee.

⁸ Jare eenɨi vi taɨ reta jare emondeuka chupe reta temimonde reta,

⁹ eñono kuakuaa Aarón ikúa re jare taɨ reta ikúa re, jare eñono kavi jese reta äka-ɨru, jökorai yogüɨreko vaerä chesacerdoterä jekuae avei pegua. Körai eñono tee Aarón jare taɨ reta.

¹⁰ Jaɨkue rupi eraja toro taɨrusu vae, tupao guakapi pegua jóvai, jare Aarón jare taɨ reta toñono ipo jókuae toro taɨrusu vae iñäka re.

¹¹ Jare eyuka toro taɨrusu vae che peYa jóvai, tupao guakapi pegua jöke pe.

¹² Emboɨru toro taɨrusu vae jugüɨgüe; jare nepoäka pe eipichɨ mɨmba oyeyuka oyeapɨ jese vae re guakarätiecha ñogüɨnoi vae re, jare jembɨregüe epɨyere mɨmba oyeyuka oyeapɨ jese vae iyɨpɨ re.

¹³ Eekɨ vi opaete ikɨra ichuri oñova vae, ipɨa jare ipɨ̈rɨkɨti reta ikɨra, jare eapɨ mɨmba oyeyuka oyeapɨ jese vae re;

¹⁴ ërei isoo, ipire jare jepoti, eapɨ teyupa güi ikatu pe; jae ko mbota mbaeyoa regua.

¹⁵ Jökoraiño vi eipɨɨ jókuae mókoi vecha kuimbae güi metei; jare Aarón jare taɨ reta toñono ipo jókuae vecha kuimbae iñäka re.

¹⁶ Javoi eyuka jókuae vecha kuimbae, jare jugüɨgüe pe eñapiramo mɨmba oyeyuka oyeapɨ jese vae re eroyere.

¹⁷ Jare opa vecha kuimbae eyasɨa sɨa, eyoe ichuri reta jare iu reta, javoi eñono metei ramiño iñäka ndive.

¹⁸ Jare opaetei eapɨ vecha kuimbae mɨmba oyeyuka oyeapɨ jese vae re; mɨmba oyeyukagüe opaetei oyeapɨ vae ipiche katu vae ko peYa peguarä; jae ko che peYa peguarä mbota oyeapɨ vae.

¹⁹ Javoi eipɨɨ vi ïru vecha kuimbae, jare Aarón jare taɨ reta toñono ipo jókuae vecha kuimbae iñäka re.

²⁰ Jare eyuka vecha kuimbae, jare emboɨru jugüɨgüe jare eipichɨ Aarón inambi iyakatu kotɨgua jembeɨ re, ipoäka guasu jare ipɨ̈sa guasu iyakatu kotɨgua re; jökorai vi eyapo taɨ reta, jare jókuae tugüɨ jembɨregüe pe eñapiramo mɨmba oyeyuka oyeapɨ jese vae iyɨke yɨke re.

²¹ Jare mɨmba oyeyuka oyeapɨ jese vae re tugüɨ oïta vae jare asaite ñeñono tee pegua, eñapiramo Aarón re jare jemimonde reta re; taɨ reta re jare jemimonde reta re. Körai jae jare taɨ reta oñeñono teeta opɨta, jökoraiño vi jemimonde reta.

²² Jaɨkue rupi eekɨ vecha kuimbae ikɨragüe, juguaigüe, ikɨra ichuri oñova vae, ipɨa ikɨragüe, jare ipɨ̈rɨkɨti mókoi reve ikɨra ndive jare iugüe iyakatu kotɨgua; echa jae ko vecha kuimbae ñeñono tee pegua.

²³ Eipɨɨ vi metei mbɨyape tuicha vae, jare metei mbɨyape asaite pe oyeapo vae jare metei mbɨyape ipïreriasɨ vae, mbɨyape reta oyembovumbae che peYa pe oñemee vae güi;

²⁴ jare opaete eñono Aarón ipo pe jare taɨ reta ipo pe, jare erökuavee emee cheróvai mbota.

²⁵ Jaɨkue rupi eekɨ ipo reta güi jare eapɨ mɨmba oyeyuka oyeapɨ jese vae re, mɨmba oyeyukagüe opaetei oyeapɨ vae ndive, ipiche katu vaerä otimbo cheróvai. Jae ko mbota oyeapɨ che peYa pe vae.

²⁶ Jare eekɨ vecha kuimbae ipɨtiagüe ñeñono tee pegua güi, Aarón imbae, jare erökuavee emee cheve mbota; jare toiko ndembaerä.

²⁷ Embosɨrɨ ipɨtiagüe jare iugüe oñererökuavee oñemeegüe; jókuae vecha kuimbae güi oñererökuavee oñemeegüe, Aarón jare taɨ reta pe oñeñono tee vae.

²⁸ Toiko Aarón jare taɨ reta peguarä, jare Israel iñemuña reta pe mborookuai jekuae avei pegua, echa mbota oñererökuavee oñemee vae ko; jae kuae Israel iñemuña reta omee vaerä, mɨmba oyeyukagüe mbɨakatu pegua güi, jae reta imbaerä vae güi tomee mbotarä che peYa pe.

²⁹ Jare temimonde reta ñeñono tee pegua Aarón imbae topɨta kuri iñemuña reta peguarä; oyeparavo yave oñeñono tee reta vaerä pɨpe.

³⁰ Jare Aarón jekoviarä opɨta sacerdoterä vae pe emondeuka chiu ara regua, omboɨpɨta yave oyeokuai tupao guakapi pegua pe.

³¹ Jare eipɨɨ vecha kuimbae ñeñono tee pegua isoo jare emboyɨ jae kotɨ oñeñono teea pe.

³² Aarón jare taɨ reta tou vecha kuimbae isoogüe jare mbɨyape kanata raɨ pe oïta vae, tupao guakapi pegua jöke pe.

³³ Tou reta jókuae mɨmba oyeyukagüe mbaeyoa oyemboai vaerä oyeapo vae, oñeñono tee reta sacerdoterä yave oyapo reta vae; ërei agüɨye ambuae vae tou, echa oñeñono tee vae ko.

³⁴ Jembɨre pɨareve regua soo jare mbɨyape ñeñono tee pegua yave, eapɨ jókuae jembɨregüe, agüɨye kia tou, echa oñeñono tee vae ko.

³⁵ Körai eyapo Aarón jare taɨ reta, opaete che royókuai rami; chiu ara eñono tee reta omboɨpɨ yave sacerdoterä oyeokuai.

³⁶ Ara ñavo emee toro taɨrusu vae mbaeyoa regua, mɨmba oyeyukagüe mbaeyoa oyemboai vaerä, jare eitɨo mɨmba oyeyuka oyeapɨ jese vae, mɨmba oyeyukagüe mbaeyoa oyemboai vae pe jare epɨyere jese asaite reñono tee vaerä.

³⁷ Chiu ara emee mɨmba oyeyukagüe mbaeyoa oyemboai vaerä vae mɨmba oyeyuka oyeapɨ jese vae re, jare eñono tee jare toiko mɨmba oyeyuka oyeapɨ jese vae oñeñono tee kavi yae vaerä: Oipotagüe mbae oñátai mɨmba oyeyuka oyeapɨ jese vae, toñeñono tee topɨta.

Ara ñavo mbota oñemee vae

³⁸ Ara ñavo emee avei mɨmba oyeyuka oyeapɨ jese vae re, mókoi vecha kuimbae taɨrusu vae metei año vae.

³⁹ Metei emee ndeimbove yave, jare ïru emee kaaru yave.

⁴⁰ Tenondegua vecha kuimbae taɨrusu vae, emee mókoi kilo trigokúi ipɨuasɨ kavi yae vae asaite olivo ia oyeapasogüe ndive oyemómbɨu vae, jare metei litro vino mbota oyepɨyere vae.

⁴¹ Jare ïru vecha kuimbae taɨrusu vae emee kaaru yave, ndeimbove yave mbota remee rami, jare vino mbota oyepɨyere rami; mbota oyeapɨgüe ipiche katu che peYa pe vae.

⁴² Kuae mɨmba oyeyukagüe opaetei oyeapɨ vae tomee avei peñemuña reta tupao guakapi pegua jöke pe, che peYa jóvai, joko pe che pomomiarita.

⁴³ Joko pe aïta Israel iñemuña reta ndive; jókuae o oñeñono teeta cheyemboetea rupi.

⁴⁴ Jare añono teeta tupao guakapi pegua jare mɨmba oyeyuka oyeapɨ jese vae; jökoraiño vi añono teeta Aarón jare taɨ reta, yogüɨreko vaerä chesacerdoterä.

⁴⁵ Aikota Israel iñemuña reta ipɨte pe, aikota jae reta iTumparä.

⁴⁶ Jare oikuaa retata che ko jae peYa, jae reta iTumpa, ɨvɨ Egipto güi güɨnoe vae, aiko vaerä jae reta ipɨte pe. Che ko jae peYa Tumpa.