ÉXODO 28 - Biblia Guarani Tumpa Iñee

Temimonde sacerdote reta peguarä

¹ Israel iñemuña reta güi toyogüɨreko ndeɨ́vɨri Aarón jare taɨ reta Nadab, Abiú, Eleazar jare Itamar, yogüɨreko vaerä chesacerdoterä.

² Jare toyapo reta temimonde ikavi yae vae nderɨkeɨ Aarón pe, oyemboete kavi jare ipöra yae oyekuaa vaerä.

³ Emomiari opaete ipoki ombaapo vae, arakuaa amee chupe vae reta, oyapo reta vaerä temimonde Aarón peguarä, jökorai oñeñono tee vaerä chesacerdoterä.

⁴ Toyapo reta kuae nunga temimonde reta: Pɨtía regua, temimonde iyɨvambae, ñeapevaka, temimonde oyekuatiagüe, äka-ɨru jare kuakuaa. Körai toyapo reta jókuae temimonde reta ikavi yae vae nderɨkeɨ Aarón peguarä jare taɨ reta peguarä, yogüɨreko vaerä chesacerdoterä.

⁵ Temimonde iyapoa reta toiporu oro, vecharaagüe inimbo jovɨ vae, pɨ̈taü vae, pɨ̈taasɨ vae jare lino oñepövagüe pegua.

⁶ Toyapo reta temimonde iyɨvambae oro pegua, vecharaagüe inimbo jovɨ vae, pɨ̈taü vae, pɨ̈taasɨ vae jare lino oñepövagüe pegua, ipoki ombaapo vae jembiapo,

⁷ jare iyatiɨ ñavo togüɨnoi iïcha, pɨpe toyemboya oyoe,

⁸ jare temimonde iyɨvambae re kuakuaa oï vae ipoki ombaapo vae jembiapo, toyeapo vi chugüiño, oro pegua, vecharaagüe inimbo jovɨ vae, pɨ̈taü vae, pɨ̈taasɨ vae jare lino oñepövagüe pegua.

⁹ Jare toikuatía reta mókoi ita ónice jee vae re Israel taɨ reta jee;

¹⁰ ova tee metei ita re, jare ïru ita re ova vi ïru tee reta, tenondegua güive taɨkuegua kotɨ,

¹¹ oikatu ita oikuatía vae pe, sello oyeapo rami eikuatiauka mókoi ita reta re Israel taɨ reta jee, jare jembeɨ rupi toñova reta oro pe.

¹² Jare toñono reta temimonde iyɨvambae iïcha reta re, ita yemomaendúa pegua Israel taɨ reta re, jare Aarón togüɨraja Israel taɨ reta jee che peYa jóvai, jemimonde iïcha iyatiɨ regua re, yemomaendúa peguarä,

¹³ toyapo reta iyatiɨ reguarä argolla oro pegua;

¹⁴ jare mókoi iïcharä oro oyeambae pegua, kuae toñope reta jare toësɨvo reta jókuae iïcha jendarä oïa rupi.

¹⁵ Jökorai vi toyapo reta pɨtía regua morojäa pegua, ipoki ombaapo vae jembiapo; temimonde iyɨvambae oyeapo rami toyapo reta vi oro pegua, vecharaagüe inimbo jovɨ vae, pɨ̈taü vae, pɨ̈taasɨ vae jare lino oñepövagüe pegua,

¹⁶ jókuae pɨtía regua irundɨ iyɨke toyovake päve, jare toyoarambo, togüɨnoi veinticinco centímetro ipɨgüe.

¹⁷ Jare toñono reta jese irundɨ ñesɨro ita ipöra yae vae reta, metei ñesɨro pe toï metei ita sárdica jee vae, metei topacio jee vae jare metei carbunclo jee vae;

¹⁸ jare mokoía ñesɨro pe toï metei ita esmeralda jee vae, metei zafiro jee vae jare metei diamante jee vae;

¹⁹ mboapɨa ñesɨro pe toï metei ita jacinto jee vae, metei ágata jee vae jare metei amatista jee vae;

²⁰ jare irundɨa ñesɨro pe toï metei ita berilo jee vae, metei ónice jee vae jare metei jaspe jee vae. Opaete kuae ita reta toyemoembeɨ oro pe,

²¹ jare opaete reve doce ita reta, echa doce ko Israel taɨ reta; ita ñavo re toyekuatía jee reta, doce ñemuña vae reta jee ñavo.

²² Pɨtía regua re toyapo reta vi iïcharä oñeopegüe oro pegua.

²³ Jare pɨtía regua re toyapo reta mókoi argolla oro pegua, jare toñono reta jembeɨ mbeɨ re;

²⁴ jare toñono reta jókuae mókoi iïcha jókuae argolla reta re, pɨtía regua jembeɨ mbeɨ ɨvategua re,

²⁵ jare jókuae mókoi iïcha iyapɨ yapɨ toñono reta mókoi atiɨ regua iïcha renda re, jare toñono reta temimonde iyɨvambae iïcha jenondegua re.

²⁶ Toyapo reta vi mókoi argolla oro pegua, jókuae toñono reta pɨtía regua jembeɨ mbeɨ ɨvɨkotɨgua re, temimonde iyɨvambae kotɨ oï vae re, japɨpe kotɨ.

²⁷ Jökoraiño vi toyapo reta mókoi argolla oro pegua, jókuae toñono reta temimonde iyɨvambae iyatiɨ iïcha reta jenondegua re, igüɨ rupi oyembovɨvɨa jenonde, kuakuaa iárambo rupi.

²⁸ Jare pɨtía regua re mókoi argolla ñogüɨnoi vae toya oyoe mókoi argolla temimonde iyɨvambae re ñogüɨnoi vae rupi metei iïcha pe, pɨtía regua opɨta vaerä temimonde iyɨvambae re kuakuaa oï vae iárambo, agüɨye vaerä oyeekɨ chugüi.

²⁹ Jare Aarón togüɨraja pɨtía regua morojäa pegua re Israel taɨ reta jee yemomaendúa peguarä, oike yave o mbaemboete renda cheróvai jekuae avei rupi.

³⁰ Jare toñono reta pɨtía regua morojäa pegua re Urim jare Tumim, Aarón güɨraja vaerä ipɨtía re oike yave che peYa jóvai; jökorai Aarón togüɨraja avei ipɨtía re Israel taɨ reta jee cheróvai.

³¹ Toyapo reta ñeapevaka temimonde iyɨvambae iaramboguarä, vecharaagüe inimbo jovɨ katuai,

³² jare jókuae ñeapevaka temimonde iyɨvambae iarambogua togüɨnoi iñäkagua, jare toyemboyeapa kavi tombovɨvɨ reta jembeɨ rupi, agüɨye vaerä osoro.

³³ Jare jembeɨ rupi toyapo reta temitɨ granada jee vae ia iägüe, vecharaagüe inimbo jovɨ vae, pɨ̈taü vae jare pɨ̈taasɨ vae pegua jare jókuae ipäu rupi toï kapana raɨ oro pegua;

³⁴ toï metei kapana raɨ oro pegua jare jaɨkue temitɨ granada jee vae ia iä, jökorai toñopäu päu toyere ñeapevaka jembeɨ rupi.

³⁵ Körai sacerdote Aarón toyemonde iparavɨkɨ oyapo yave, jare toyeendu ipu, oike yave cheróvai o mbaemboetea pe, jare oë ye yave, agüɨye vaerä omano.

³⁶ Tomboipeasɨ reta vi oro oyeambae äka-ɨru jesɨva reguarä, jare toikuatía reta jese kuae ñee reta: “ÑEÑONO TEE YANDEYA PE.”

³⁷ Jare vecharaagüe inimbo jovɨ vae pe tomoïcha reta toñono äka-ɨru jesɨva re.

³⁸ Jare toï Aarón jesɨva re, jare Israel iñemuña reta oyapo yave mbaepɨ̈chɨi ani omee reta yave mbota, jae togüɨraja opaete mbaembae oñeñono teea pe, jare togüɨnoi jesɨva re jekuae avei pegua, chepɨakatu vaerä amae jese oike yave che peYa aïa pe.

³⁹ Toikuatía reta metei temimonde lino pegua jare toyapo reta metei äka-ɨru lino pegua jare toyapo reta vi metei kuakuaa ipoki ombaapo vae jembiapo.

⁴⁰ Jare toyapo reta vi temimonde Aarón taɨ reta peguarä kuakuaa jare äka-ɨru, oyemboete kavi jare ipöra yae oyekuaa reta vaerä.

⁴¹ Kuae temimonde reta pe emboemimonde nderɨkeɨ Aarón jare taɨ reta; javoi epɨyere jese reta asaite jare eñono tee reta yogüɨreko vaerä chesacerdote retarä.

⁴² Jare toyapo reta chupe reta jemimonde igüɨ peguarä lino pegua, agüɨye vaerä iu oyekuaa,

⁴³ jare Aarón jare taɨ reta tomonde togüɨraja oike reta yave tupao guakapi pegua pe, ani oya reta yave mɨmba oyeyuka oyeapɨ jese vae re oyeokuai vaerä tupao guakapi pegua pe, agüɨye vaerä iyoa reta jare omano reta. Mborookuai opambae ko kuae chupegua jare iñemuña reta peguarä.