ÉXODO 26 - Biblia Guarani Tumpa Iñee

Tupao guakapi pegua

¹ Toyapo reta tupao guakapi pegua payandepo asoya güɨnoi vae, lino oñepövagüe pegua, jare vecharaagüe inimbo jovɨ vae, pɨ̈taü vae, pɨ̈taasɨ vae pegua; jare toyapo reta jese ipoki rupi kavi araɨgua reta iä.

² Metei asoya ipukugüe togüɨnoi doce metro y medio, jare ipɨgüe mókoi metro; opaete kuae asoya reta togüɨnoi metei ramiño ipukugüe jare ipɨgüe.

³ Pandepo asoya tombovɨvɨ reta oyoe, jökoraiño vi ïru pandepo asoya.

⁴ Jare tomoïcha reta jembeɨ rupi vecharaagüe inimbo jovɨ vae pe, pandepo reta güi iyapɨ pe oï vae, jökoraiño vi ïru pandepo reta iyapɨ pegua.

⁵ Toyapo reta cincuenta iïcha pandepo asoya güi iyapɨ pe oï vae jembeɨ rupi, jökoraiño vi ïru pandepo reta iyapɨ pegua, iïcha reta toyóvai yóvai toñogüɨnoi.

⁶ Toyapo reta vi cincuenta tɨ̈ai raɨecha vae oro pegua, kuae reta pe tomboya reta oyoe asoya reta; jökorai toyeapo metei tupao guakapi pegua.

⁷ Toyapo reta vi once asoya kavara jaa pegua, oyeapo vaerä tupao guakapi pegua iaramboguarä.

⁸ Kuae once asoya togüɨnoi metei ramiño pukugüe jare ipɨgüe; asoya ñavo togüɨnoi trece metro y medio pukugüe jare mókoi metro ipɨgüe.

⁹ Tombovɨvɨ reta oyoe pandepo asoya vae, jare ïru ova asoya vae tombovɨvɨ reta vi oyoe, jare jókuae ova asoya iyapɨ pe oï vae tomboyeapa reta tupao guakapi pegua jenonde kotɨ rupi.

¹⁰ Toyapo reta cincuenta iïcha asoya jembeɨ rupi, tenondegua yemboyao iyapɨ pegua re, jökoraiño vi ïru yemboyao iyapɨ pegua.

¹¹ Jökoraiño vi toyapo reta cincuenta tɨ̈ai raɨecha vae jiero iyu vae pegua, jare kuae reta pe tomboya reta oyoe; jökorai tomboyoapɨ reta oyoe, opɨta vaerä metei ramiño.

¹² Jare asoya reta güi jembɨregüe, mbɨte tosagüɨu tupao guakapi pegua ikupe kotɨ.

¹³ Jökorai tupao guakapi pegua toyeasoi topɨta asoya jembɨregüe pe, cuarenta y cinco centímetro toasa iyɨke kotɨ jare jovaicho kotɨ.

¹⁴ Toyapo reta vi tupao guakapi pegua iaramboguarä, vecha kuimbae pire oñemopɨ̈tagüe, jare mɨmbapire ikavi yae vae pegua toï iárambo ete.

¹⁵ Toñopa reta ɨvɨra käti, tupao guakapi pegua reguarä jare tomboyemboɨ kavi reta.

¹⁶ Ɨvɨra oñeopa vae ñavo togüɨnoi irundɨ metro y medio pukugüe jare sesenta y cinco centímetro ipɨgüe;

¹⁷ ɨvɨra ñavo mókoi toñemoañɨka, oyoɨke vaerä ïru ɨvɨra ndive, körai toyapo reta opaete ɨvɨra reta tupao guakapi pegua reguarä.

¹⁸ Toñopa reta vi veinte ɨvɨra tupao guakapi pegua joguambɨrä, arayevɨ kotɨguarä.

¹⁹ Toyapo reta vi cuarenta korepoti pegua, jókuae veinte ɨvɨra oñeopagüe iguapɨkarä; mókoi guapɨka toï metei ɨvɨra oñeopagüe igüɨ pe, jókuae ɨvɨra ñavo güɨnoi mókoi itɨma vae reguarä.

²⁰ Jare tupao guakapi pegua joguambɨ jovaicho ɨvɨtuguasu kotɨguarä, toï veinte ɨvɨra oñeopagüe,

²¹ jare cuarenta iguapɨka korepoti pegua, toï mókoi guapɨka metei ɨvɨra oñeopagüe ñavo igüɨ pe, jökorai vi toï ïru ɨvɨra oñeopagüe ñavo igüɨ pe.

²² Jare tupao guakapi pegua joguambɨ kuaraɨ oikea kotɨguarä, toñopa reta ova ɨvɨra,

²³ toñopa reta vi mókoi ɨvɨra, tupao guakapi pegua ikupe kotɨgua iekina reguarä.

²⁴ Kuae ɨvɨra reta toya oyoe igüɨ kotɨ güive, jökoraiño vi ɨvategua reta toya oyoe ivisagra reta rupi; jökorai vi toyeapo ïru mókoi ekina reta ndive.

²⁵ Jayave opaete reve toyeapo juri ɨvɨra oñeopagüe, jare diecisei iguapɨka korepoti pegua, mókoi guapɨka metei ɨvɨra ñavo igüɨ pe.

²⁶ Toñopa reta vi pandepo ɨvɨra käti, ɨvɨra oyepɨasa vae retarä, tupao guakapi pegua iyɨke rupiguarä;

²⁷ jare pandepo ɨvɨra vi jovaicho kotɨguarä; jökorai vi jaɨkue kotɨguarä, kuaraɨ oikea kotɨ oï vae.

²⁸ Jare mbɨte pegua ɨvɨra oyepɨasa vae toasa ïru ɨvɨra reta ikúa rupi, ïru jembeɨ güi oasa jembeɨ kotɨ vae.

²⁹ Toñova reta oro pe ɨvɨra oñeopagüe reta, jare toyapo reta chupe argolla oro pegua, omboasa reta vaerä jokoropi ɨvɨra oyepɨasa vae reta, jare toñova reta vi oro pe jókuae ɨvɨra oyepɨasa vae reta.

³⁰ Jare tomopüa reta tupao guakapi pegua, aechauka iä ɨvɨtɨ re ndeve rami etei.

³¹ Toyapo reta vi o imboyaoa asoya, vecharaagüe jovɨ vae, pɨ̈taü vae, pɨ̈taasɨ vae jare lino oñepövagüe pegua; toyeapo jese mboki rupi kavi araɨgua reta iä.

³² Jare toñono reta irundɨ okɨta ɨvɨra käti pegua oro pe oñeovagüe re; jókuae okɨta reta iyapɨte regua omopöra vae oro pegua vi, jare iguapɨka reta korepoti pegua.

³³ Jare toñono reta asoya o imboyaoa jókuae tɨ̈ai reta re, jare jókuae japɨpe toñono reta, käjou yemomaendúa pegua jare jókuae asoya o imboyaoa, tomboyao oyougüi o yemboatɨa japɨpe oñeñono tee vae, oñeñono tee kavi yae vae güi.

³⁴ Jare ñɨ̈ro renda toñono reta, käjou yemomaendúa pegua iárambo tupao guakapi pegua japɨpe oñeñono tee kavi yae vae pe.

³⁵ Jare mesa toñono reta asoya o imboyaoa güi ikatu pe, jare mechero renda toï mesa jóvai arayevɨ kotɨ, jare mesa toñono reta ɨvɨtuguasu kotɨ.

³⁶ Tupao guakapi pegua jökerä toyapo reta asoya vecharaagüe jovɨ vae, pɨ̈taü vae, pɨ̈taasɨ vae jare lino oñepövagüe pegua, ipoki ombaapo vae reta jembiapo.

³⁷ Toñopa reta vi pandepo ɨvɨra käti, oguambɨta asoya jendarä, kuae reta toñova reta oro pe, jare jökoraiño vi iyapɨte regua imopöraka reta, jare toyapo reta pandepo iguapɨkarä jiero iyu vae pegua.