ÉXODO 25 - Biblia Guarani Tumpa Iñee

Mbota tupao guakapi pegua oyeapo vaerä

¹ YandeYa jei Moisés pe:

² “Ere Israel iñemuña reta pe tomee cheve mbota; opaete kuimbae ipɨakatu reve kavi tomee reta cheve mbota;

³ kuae mbota tomee reta cheve: Oro, korepoti, jiero iyu vae,

⁴ vecharaagüe inimbo jovɨ vae, pɨ̈taü vae, pɨ̈taasɨ vae jare lino ikavi vae, jare kavara jaagüe,

⁵ vecha kuimbae pire oñemopɨ̈ta vae, mɨmba pire ikavi yae vae, ɨvɨra käti,

⁶ asaite mechero peguarä, jare mbaembae ikäti kavi vae asaite yeparavo peguarä jare incienso ikäti kavi yae vae oyeapo vaerä,

⁷ ita ónice jee vae jare ita oyeapo kavigüe temimonde iyɨvambae reguarä, jare pɨtía regua re oñeñono vaerä.

⁸ Jare toyapo reta cheve metei o ayemboeteuka pɨpe vaerä, aiko vaerä jae reta ipɨte pe.

⁹ Toyapo reta tupao guakapi pegua jare tembiporu reta, che opaete aechauka iä ndeve rami kavi.

Käjou yemomaendúa jɨru

¹⁰ Toyapo reta vi metei käjou ɨvɨra käti pegua; pukugüe togüɨnoi metei metro diez centímetro, jare ipɨgüe sesenta y cinco centímetro jare ɨvategüe sesenta y cinco centímetro.

¹¹ Jare toñova reta japɨpe rupi jare ikupe rupi oro oyeambae pe, jare iárambo jembeɨ rupi omopöra vae, toyapo reta oro pegua togüɨroyere jese.

¹² Toyapo reta vi chupe irundɨ argolla, jare toñono reta iyɨke re, metei iyɨke re mókoi jare ïru iyɨke re mókoi vi.

¹³ Toñopa reta vi chupe ɨvɨra käti, ɨvɨra oyepɨasa vae retarä, jare toñova reta oro pe.

¹⁴ Jare toësɨvo reta jókuae argolla reta rupi, käjou iyɨke yɨke regua rupi, pɨpe oyereraja vaerä käjou.

¹⁵ Jókuae ɨvɨra oyepɨasa vae reta topɨta käjou iargolla reta re, agüɨye toyeekɨ chugüi.

¹⁶ Jare toñono reta käjou pe mborookuai reta, che ameeta ndeve vae.

¹⁷ Jare toyapo reta käjou itaparä oro oyeambae pegua, kuae ko jae ñɨ̈ro renda; togüɨnoi metei metro diez centímetro pukugüe, jare sesenta y cinco centímetro ipɨgüe.

¹⁸ Toyapo reta vi mókoi araɨgua iä oro pegua, martillo pe oyeapo vae, toyapo reta ñɨ̈ro renda jembeɨ mbeɨ re.

¹⁹ Metei araɨgua iä toyapo reta metei jembeɨ re, jare ïru araɨgua iä toyapo reta ïru jembeɨ re; ñɨ̈ro renda jare araɨgua iä reta toyeapo metei güiño.

²⁰ Jare araɨgua iä reta ipepo tomoata toñogüɨnoi ñɨ̈ro renda iárambo, toyóvai toñogüɨnoi, omae reta reve ñɨ̈ro renda re.

²¹ Ñɨ̈ro renda toñono reta käjou iárambo, jare käjou pe toñono reta mborookuai reta che ameeta ndeve vae.

²² Joko pe ayekuaaukata jare chemiarita ndeve, opaete mborookuai reta ameeta Israel iñemuña reta peguarä vae re, jókuae ñɨ̈ro renda iárambo güi, jókuae mókoi araɨgua reta käjou iárambo ñogüɨnoi vae ipäu güi.

Mesa mbɨyape mbaemboete pegua jendarä

²³ Toyapo reta vi metei mesa ɨvɨra käti pegua; ipukugüe togüɨnoi noventa centímetro, jare cuarenta y cinco centímetro ipɨgüe jare ɨvategüe sesenta y cinco centímetro.

²⁴ Toñova reta oro oyeambae pe, jare jembeɨ rupi omopöra vae, toyapo reta oro pegua togüɨroyere jese.

²⁵ Jembeɨ rupi tomopüa reta togüɨroyere jese siete centímetro ipɨgüe, jare iárambo jembeɨ rupigua toyapo reta oro pegua;

²⁶ toyapo reta chupe irundɨ argolla oro pegua, kuae reta eñono irundɨ mesa itɨma ñavo re;

²⁷ jókuae argolla reta toñogüɨnoi jembeɨ regua igüɨ rupi, ɨvɨra reta oñeësɨvo vaerä, mesa oyereraja vaerä.

²⁸ Toñopa reta chupe ɨvɨra käti, ɨvɨra oyepɨasa vae retarä, jare toñova reta oro pe; jókuae ɨvɨra reta re oyereraja vaerä mesa,

²⁹ toyapo reta vi oro oyeambae pegua ñae, kuchara, tasa guasu jare kopa, mbota oyepɨyere pɨpe vaerä.

³⁰ Jare toñono reta cheróvai jekuae avei, mesa iárambo mbɨyape mbaemboete pegua.

Mechero renda oro pegua

³¹ Toyapo reta vi metei mechero renda oro oyeambae pegua, martillo pe oyeapo vae. Iguapɨka, itɨma, mbaepotɨ iä reta, opaete kuae reta toyeapo metei güiño;

³² jare iyɨke yɨke kotɨ güi toë mboapɨ mboapɨ iyɨva; opaete reve ova tiyɨva.

³³ Mboapɨ mbaepotɨ temitɨ almendra ipotɨ iä rami vae toï metei iyɨva re; jökorai toï ova iyɨva ñavo re;

³⁴ mechero renda itɨma re toï irundɨ mbaepotɨ temitɨ almendra ipotɨ iä rami vae.

³⁵ Mókoi iyɨva ñavo igüɨ pe togüɨnoi metei mbaepotɨ iä; jökorai ova iyɨva oë mechero renda güi vae igüɨ pe.

³⁶ Mbaepotɨ iä reta jare iyɨva reta toyeapo metei güiño mechero renda ndive, opaete kuae reta toyeapo oro oyeambae pegua, martillo pe oyeapo vae.

³⁷ Toyapo reta vi chupe chiu mechero. Kuae reta jendɨta omboesape vaerä jenonde kotɨ;

³⁸ itenasa reta jare iñae raɨ reta toyeapo oro oyeambae pegua.

³⁹ Toyeporu treinta y tres kilo oro oyeambae, oyeapo vaerä mechero renda jare opaete jembiporu reta;

⁴⁰ emae kavi, reyapo vaerä ɨvɨtɨ re aechauka ndeve rami kavi.