ÉXODO 24 - Biblia Guarani Tumpa Iñee

Moisés jare Israel iñemuña itenondegua reta ɨvɨtɨ Sinaí re

¹ YandeYa jei Moisés pe: —Peyeupi che aïa pe, nde jare Aarón, Nadab, Abiú jare setenta Israel iñemuña itenondegua reta; jare chemboete mombɨrɨ güiño.

² Ërei ndeño eya cheré; jare opaete Israel iñemuña reta agüɨye toya, agüɨye toyeupi nde ndive.

³ Jare Moisés ou omombeu Israel iñemuña reta pe, opaete yandeYa iñee reta jare opaete mborookuai reta; jare opaete reve metei rami jei reta Moisés pe: —¡Toroyapo opaete yandeYa jei vae!

⁴ Moisés oikuatía opaete yandeYa iñee reta, jare opüa pɨareve ndeimbove yave, jare omopüa metei mɨmba oyeyuka oyeapɨ jese vae ɨvɨtɨ igüɨ pe, jare oñono doce ita, Israel doce taɨ iñemuña peguarä ñavo.

⁵ Omondo Israel iñemuña reta güi, taɨrusu vae reta omee vaerä yandeYa pe mɨmba reta oyeyukagüe opaetei oyeapɨ vae jare toro taɨrusu vae reta, mɨmba oyeyukagüe mbɨakatu pegua.

⁶ Jare Moisés omboɨru jugüɨgüe, mbɨte rupi oñono tasa guasu pe, jare mbɨte rupi vi opa oñapiramo pɨpe mɨmba oyeyuka oyeapɨ jese vae.

⁷ Jare oipɨɨ tembikuatía morogüɨrökuavee päve regua oï pɨpe vae, jare omongeta opaete vae reta pe, jare jae reta jei: —Toroendu jare toroyapo opaete mbae yandeYa jei vae.

⁸ Jayave Moisés oipɨɨ tugüɨ jare oñapiramo opaete Israel iñemuña reta iárambo, jei reve: —Kuae ko jae tugüɨ morogüɨrökuavee päve regua, yandeYa oyapo pe reta ndive, opaete kuae mbaembae reta regua vae.

⁹ Jare oyeupi Moisés, Aarón, Nadab, Abiú jare setenta Israel iñemuña itenondegua reta;

¹⁰ jare joko pe oecha reta Israel iTumpa; oecha reta ipɨ igüɨ pe ipe kavi, ita zafiro jee vae jembipeasɨ rami vae, ara jembipeasɨ oï rami etei vae.

¹¹ Ërei Tumpa mbaetɨ mbae oyapo Israel iñemuña juvicha reta kotɨ; oecha reta Tumpa jare mbaetɨ omano reta.

¹² Jayave yandeYa jei Moisés pe: —Eyeupi eyu chekotɨ ɨvɨtɨ re, cheräro joko pe, ameeta ndeve ita ipe vae; mborookuai reta aikuatía amboe reta vaerä.

¹³ Moisés opüa ojo jembiokuai Josué ndive. Jare Moisés oyeupi Tumpa iɨvɨtɨ re.

¹⁴ Jare jei tenondegua reta pe: —Oreräro kuae pe, royu ye pekotɨ regua; Aarón jare Hur oï pe reta ndive; oime yave maratu, pekua jae reta pɨri.

¹⁵ Jayave Moisés oyeupi ojo ɨvɨtɨ re, jare amapɨtu opa oyasoi ɨvɨtɨ.

¹⁶ Javoi yandeYa iyemboetea ogüeyɨ ɨvɨtɨ Sinaí re, jare amapɨtu opa oyasoi ova ara rupi; jare chiúa ara pe Tumpa oenɨi Moisés amapɨtu iyɨvɨte güi.

¹⁷ YandeYa iyemboetea oyekuaa tata tuicha yae vae rami ɨvɨtɨ iyapɨte re, opaete Israel iñemuña reta jovake.

¹⁸ Jare Moisés oike amapɨtu iyɨvɨte pe, oyeupi ɨvɨtɨ re; Moisés oiko ɨvɨtɨ re cuarenta ara jare cuarenta pɨ̈tu.