ÉXODO 23 - Biblia Guarani Tumpa Iñee

Mborookuai reta morojäa regua

¹ Agüɨye pemoërakua ndaye, agüɨye peñemoïru iyoa vae ndive, pemiari vaerä teko añetembae re.

² Agüɨye peyeko jeta vae reta iyemongeta reño, ikavimbae oyeapo vaerä. Teko peñono kavi yave, agüɨye peyererajauka jeta vae reta jeia re, peepɨ vaerä jeko jupimbae;

³ ërei paravete vae oñeapo yave, agüɨye pemborɨ paravete güiño.

⁴ Peväe yave, güeye ani mburika perovaicho reta güi okañɨgüe, pemboyevɨ ye chupe.

⁵ Peecha yave, pemotareɨ omae peré vae imburika ogüɨapi ivoɨta ndive, pemborɨ pembogüeyɨ voɨta mburika güi.

⁶ Agüɨye perova paravete vae iñeapo chugüi.

⁷ Peyembosɨrɨ apu reta güi, agüɨye peyuka jekombae vae jare jupi vae, echa che mbaetɨta ambojupi jeko vae.

⁸ Agüɨye peipɨɨ vɨari mbota teko iya güi; echa jókuae mbota güɨrokomegua oporojäa vae reta jare jupi vae reta.

⁹ Agüɨye pembopɨatɨtɨ ketɨgua; echa pe reta peikuaa, kërai ko ketɨgua reta ipɨa vae, echa pe reta peikose ketɨgua ɨvɨ Egipto pe.

Mbutuu regua

¹⁰ Ova año pemaetɨ jare pemboɨru pembaagüɨye,

¹¹ ërei chiúa año pe pemombutuu peɨvɨ, perëtaɨgua paravete vae reta jou vaerä, jare jembɨregüe tou mɨmba ñana rupigua, jökorai vi peyapo peuvarupa jare peremitɨ olivorupa ndive.

¹² Ova ara peparavɨkɨ, jare chiúa ara pe peputuu, oputuu vaerä pegüeye jare pemburika, jökorai oputuu vaerä perembiokuai jare ketɨgua.

¹³ Peyapo opaete kuae jae peve vae, agüɨye toyeendu peyuru pe ïru tumpa reta jee.

Año ñavo mboapɨ arete vae

¹⁴ Año pe mboapɨ arete toyeapo cheve.

¹⁵ Toyeapo cheve arete mbɨyape oyembovumbae regua; chiu ara peuta mbɨyape oyembovumbae, che poyókuai rami, jae ko yasɨ Abib pe, echa kuae yasɨ pe peë Egipto güi; jare agüɨye metei ave ipogüɨrai tou cheróvai.

¹⁶ Jökoraiño vi arete mbaagüɨye regua; pembaagüɨyerɨpɨ kó pe peñotɨ vae, jare arete mbaarɨvo regua año opata ma yave vae; pemboɨru ma yave peremitɨ yagüɨyegüe.

¹⁷ Año pe mboapɨ ye toyogüeru opaete kuimbae, che peYa jóvai.

¹⁸ Agüɨye pemee cheve mbɨyape oyembovugüe ndive mɨmba oyeyuka vae jugüɨgüe, mɨmba oyeyuka vae ikɨragüe ave agüɨye peñovatu pɨareve peguarä.

¹⁹ Pembaagüɨyerɨpɨ ikavigüe peru che peYa Tumpa jo pe. Agüɨye kavara raɨ isoogüe pemboyɨ ichɨ ineche pe.

YandeYa iaraɨgua güɨroata Israel iñemuña reta

²⁰ Mase, ko che amondo chearaɨgua, peangareko vaerä tape rupi, jare pereroike vaerä ɨvɨ amokätɨro pevea pe.

²¹ Agüɨye pesɨrɨ chugüi, peendu iñee; agüɨye pepɨarai chupe, echa jae ngaraa iñɨ̈ro peve pepɨarai vae re, echa cherekovia pe jae oï.

²² Ërei añetete perovia iñee jare peyapo opaete che jae peve vae yave, aikota perovaicho reta jovaichorä jare ambopɨatɨtɨta pembopɨatɨtɨ vae reta.

²³ Echa chearaɨgua ojota perenonde, jare pererajata amorreo, heteo, ferezeo, cananeo, heveo jare jebuseo reta iɨvɨ pe; kuae reta che opata amboaiuka.

²⁴ Agüɨye petindɨ jae reta itumpa jóvai, agüɨye peyeokuai chupe reta, agüɨye ave peyapo jae reta oyapo rami, opa pemboai chugüi reta, opaetei peyoka chugüi reta mbae iä oyapogüe.

²⁵ PeYa Tumpa peño peyeokuai, jae pemboyekouta tembíu pe jare ɨ pe. Jare che ambosɨrɨta pegüi opaete mbaerasɨ reta,

²⁶ ngaraa oime peɨvɨ pe kuña imembɨ okua vae ani kuña imembɨmbae vae; che ameeta peikopuku vaerä.

²⁷ Che amondota perenonde kɨɨye; amongɨɨyeta pegüi opaete tëta peikea rupi, ambotekuaraita opaete perovaicho reta perenonde güi.

²⁸ Amondota perenonde kɨɨye, omoë vaerä ombotekuarai; heveo, cananeo jare heteo reta perenonde güi.

²⁹ Mbaetɨta metei año peño amoë amombo perenonde güi, agüɨye vaerä ɨvɨ opɨta ipombae, agüɨye vaerä mbaeporou reta oñemuña peve kaa rupi.

³⁰ Mbegüe mbegüe pe opata amoë amombo perenonde güi, peñemuña regua jare pepɨ̈ro regua peiko vaerä jókuae ɨvɨ pe.

³¹ Ambojaanga peɨvɨ iyapɨ Ɨguasu Pɨ̈ta vae güive filisteo reta iɨguasu kotɨ, jare ñuu güive ɨ̈aka Éufrates kotɨ, echa añono pepo pe opaete jókuae ɨvɨ pe yogüɨreko vae reta, jare pe opata pemoë pemombo peyeugüi.

³² “Agüɨye peñemoïru jae reta ndive, ani itumpa reta ndive ave,

³³ agüɨye peɨvɨ pe ave toyogüɨreko, agüɨye vaerä oyavɨuka peve chekotɨ, jare peyeokuai itumpa reta pe, echa pererokomeguata ko.”