ÉXODO 22 - Biblia Guarani Tumpa Iñee

Mbae oyemboekovia ye vae regua mborookuai reta

¹ Kia nunga vae oñomi yave güeye ani vecha, jare oyuka ani omee yave, jókuae güeye re tomboepɨ pandepo güeye, jókuae vecha re tomboepɨ irundɨ vecha.

² Imonda vae oyepokou o oïraro oï yave, oñenupauka jare omano yave, jókuae oporonupa vae agüɨye tijeko imano re.

³ Ërei ara pe ko yave, jókuae oporonupa vae tijeko imano re. Imonda vae tomboepɨ opaetei oñomi vae jepɨgüe, ërei mbaetɨ yave güɨnoi korepoti, jae etei toñemee jókuae oñomigüe jepɨrä.

⁴ Mɨmba oñomigüe oñeväe yave, ipo pe jekove reveño, güeye, mburika ani vecha yave, tomboepɨ metei yoarambo ye.

⁵ Kia nunga vae omongaru yave jɨmba, kó pe ani uvarupa pe jare omoinge yave ïru vae iko pe, tomboepɨ jɨmba ikaru, iko ikavigüe pe ani iuvarupa ikavigüe güi.

⁶ Kia nunga vae omoendɨ yave tata, jare ɨtɨ oapɨta tëi yave jendɨ trigo oyemboatɨ oï vae, ani oyearɨvota oï vae ani opaete kó, jókuae omoendɨ tata vae, tomboepɨ jókuae opa ókai vae.

⁷ Kia nunga vae omee yave japicha pe korepoti ani mbae jepɨ vae, oñovatu vaerä chupe, jare okañɨ yave jókuae kuimbae jo güi, jare jókuae imonda vae oñeväe yave, tomboepɨ metei yoarambo ye;

⁸ ërei mbaetɨ oñeväe yave, jayave o iya toyereraja oporojäa vae reta jóvai, oyekuaa vaerä jae mbaetɨ ra japicha oeya chupe vae re opoko vae.

⁹ Kia nunga vae oyemombae yave mbae okañɨgüe re: Güeye, mburika, vecha, temimonde re, jare kia nunga vae ou jei jae imbae ko yave, kuae reta toyereraja oporojäa vae reta jóvai, jare oporojäa vae reta teko oväe jese vae tomboepɨ metei yoarambo ye japicha pe.

¹⁰ Kia nunga vae omee yave japicha pe mburika, ani güeye, ani vecha ani oipotagüe mɨmba oyangareko vaerä jese chupe, jare kuae mɨmba omano yave, ani japicha maratu oyapo yave, ani oñeomi yave chugüi kia oechambae reve,

¹¹ yandeYa jee re tei jókuae mɨmba iya pe, mbaetɨ ko opoko jese vae, jare mɨmba iya togüɨrovia kuae jei chupe vae, jare agüɨye tomboepɨuka chupe.

¹² Ërei oñeomi yave chugüi jae oikuaa tëi reve, tomboepɨ iya pe.

¹³ Jare mbae pochɨ vae oyuka chugüi yave, togüeru toechauka iya pe, agüɨye vaerä omboepɨ.

¹⁴ Kia nunga vae oiporu yave japicha güi mɨmba, jare maratu ani omano yave iya oechambae reve, oiporu vae tomboepɨ iya pe;

¹⁵ ërei iya jovake jökorai yave, agüɨye tomboepɨ. Jepɨ re oiporuka yave, jokuaeño tomboepɨ chupe.

Mborookuai reta kuimbae reta regua

¹⁶ Kia nunga vae ombotavɨ yave kuñatai ndeiño omenda vae, oke jae ndive yave tomboepɨ jókuae, jare tomenda jae ndive.

¹⁷ Ërei tu mbaetɨ oipota omee chupe yave, tomee korepoti, kuñatai ndeiño kuimbae ndive oasa vae oyemboepɨ rami.

¹⁸ Kuña imbaekuaa vae agüɨye pemaeño toikove.

¹⁹ Kia nunga vae oasa mɨmba ndive vae, tomano.

²⁰ Mɨmba oyuka omee ïru tumpa reta pei yandeYa güi vae, tomano.

²¹ Agüɨye pembotavɨ jare peiporarauka ketɨgua reta pe, echa pe reta ketɨgua ko peikose ɨvɨ Egipto pe.

²² Agüɨye metei ave imemano vae pe jare tɨ̈reɨ pe peiporarauka,

²³ echa peiporarauka chupe reta yave, jare ipɨatɨtɨ reve oyerure reta cheve yave, che aenduta chupe reta jókuae iyerure,

²⁴ jare chearasɨta jare poyukaukata ñeraro rupi, jare perembireko reta yogüɨrekota imemano vae jare peraɨ reta tɨ̈reɨ.

²⁵ Kia nunga paravete vae, tëta chembae vae pegua pepɨte pe oiko vae pe peiporuka korepoti yave, agüɨye peiko chupe reta korepoti jepɨ reve oiporukañoi vae reta rami, agüɨye vi pekovara yoapɨ ye chupe reta.

²⁶ Perapicha ipía jekovia pe omee peve jemimonde yave, pemboyevɨ ye chupe kuaraɨ oike ma ojo yave,

²⁷ echa jaeño ko jókuae jemimonde oyeasoi vaerä pɨpe, echa mbaetɨ ko mbae re oke vaerä, ipɨatɨtɨ reve oyerure cheve yave, che aenduta chupe jókuae iyerure, echa che cheporoparareko yae ko.

²⁸ Agüɨye pere mbae jasɨ katu vae oporojäa vae reta kotɨ, agüɨye ave vi pere ñee ikavimbae perëta ruvicha reta kotɨ.

²⁹ Agüɨye peäro peru vaerä cheve mbota pembaagüɨyerɨpɨ güi jare peuva tɨgüegüe güi. Peraɨrɨpɨ pemeeta cheve,

³⁰ jökoraita vi peyapo peguaka jare pevecha imembɨrɨpɨ kuimbae; chiu ara toñogüɨnoi ichɨ reta ndive jare juría ara pe peñono tee cheve.

³¹ Peñeñono tee cheveguarä. Agüɨye peu mɨmba pochɨ vae ñana rupigua jembiagüe; pemombo yaɨmba reta pe.