ÉXODO 20 - Biblia Guarani Tumpa Iñee

Payandepo mborookuai reta

¹ Tumpa imiari opaete kuae ñee reta, körai:

² “Che ko jae peYa Tumpa, perenoe ɨvɨ Egipto güi vae, yeokuaiasɨ katu güi.

³ Agüɨye pereko ïru tumpa reta chegüi.

⁴ Agüɨye peyapo peyeupe mbae iägüe pemboete vaerä, ani mbae iägüe ɨvate ara pe oï vae ave, ani ɨvɨ pe oï vae ave, ani ɨ pe ɨvɨgüɨ pe oï vae ave.

⁵ Agüɨye peyetavatɨka yepe jóvai, agüɨye vi pemboete, echa che ko jae peYa Tumpa, imbaepuere yae vae, jägüɨro vae, aiporarauka peñemuñagüe reta imbaeyoa re vae: Taɨ reta pe, jɨmɨmino reta pe jare vi jɨmɨmino reta jɨmɨmino pe, chemotareɨ vae reta,

⁶ jare opaete cheraɨu vae jare oyapo cheporookuai reta vae re cheporoparareko.

⁷ Agüɨye peenɨi raangaiño peYa Tumpa jee. Echa ngaraa aeya jekombae rami, jókuae nunga chereenɨi raangaiño vae.

⁸ Pemaendúa ara mbutuu pegua re peñono tee vaerä.

⁹ Ova ara peparavɨkɨ, peyapo opaete peparavɨkɨ reta;

¹⁰ ërei chiúa ara, mbutuu pegua ko, che peYa Tumpa peguarä; jókuae ara agüɨye peyapo mbae nunga mbaravɨkɨ, jaeramiño vi peraɨ, perayɨ, perembiokuai kuimbae, perembiokuai kuña, ani perɨmba yepe, ani ketɨgua pero pe pereko vae yepe.

¹¹ Echa ova ara pe ko, che peYa ayapo ara jare ɨvɨ, ɨguasu, jare opaete mbae reta oime pɨpe vae, jare aputuu chiúa ara pe; jáeramo cheporerekua ara mbutuu pegua re jare añono tee.

¹² Pemboete peru jare pesɨ, peikopuku vaerä che peYa Tumpa amee peve ɨvɨ vae pe.

¹³ Agüɨye peporoyuka.

¹⁴ Agüɨye peyapo aguasa.

¹⁵ Agüɨye pemaeñomi.

¹⁶ Agüɨye pemiari añetembae perapicha kotɨ.

¹⁷ Agüɨye peipotarai perapicha jo, agüɨye peipotarai perapicha jembireko, ani jembiokuai kuimbae, ani jembiokuai kuña, ani igüeye, ani imburika, ani oipotagüe mbae nunga güɨnoi perapicha vae.”

Israel iñemuña reta okɨɨye yae

¹⁸ Opaete Israel iñemuña omae jare oendu reta ararɨapu, ama-vera, jare mimbɨ vecha kuimbae-räti pegua oñee vae, jare ɨvɨtɨ jätati vae; kuae oecha reta yave, orɨrɨi okɨɨye güi, jare osɨrɨ reta mombɨrɨ.

¹⁹ Jare jei reta Moisés pe: —Ndeño nemiari oreve, jare ore toroendu; ërei agüɨye Tumpa timiari ore ndive, agüɨye vaerä romano.

²⁰ Jare Moisés jei chupe reta: —Agüɨye pekɨɨye; echa pekuaa vaerä ou Tumpa, peipoɨu vaerä chugüi, agüɨye vaerä peyoa.

²¹ Jayave Israel iñemuña reta omae ñogüɨnoi mombɨrɨ güiño, jayave Moisés oya amapɨtu pɨtumimbi oï vae re, echa joko pe Tumpa oï.

Mɨmba oyeyuka oyeapɨ jese vae regua mborookuai

²² YandeYa jei Moisés pe: —Körai ere Israel iñemuña reta pe: “Pe reta peecha chemiari ara güi pe reta ndive vae.

²³ Agüɨye peyapo tumpa oro pegua ani korepoti pegua, pemboete vaerä che chemboete rami.

²⁴ Peyapo cheve mɨmba oyeyuka oyeapɨ jese vae ɨvɨ pegua, jare pemee jese cheve mɨmba oyeyukagüe opaetei oyeapɨ vae jare mbota mbɨakatu pegua, pevecha reta jare peguaka reta, opaete oïa rupi, che aipota cheree oï avei jesea rupi, che ayuta pekotɨ, jare cheporerekuata peré.

²⁵ Peyapo yave cheve mɨmba oyeyuka oyeapɨ jese vae ita pegua, agüɨye jókuae ita peñopa, echa peñopa tembiporu pe yave, mbaetɨ ma ko ikavi.

²⁶ Agüɨye toyeapo yeupika mɨmba oyeyuka oyeapɨ jese vae re, agüɨye vaerä oyekuaa peu peyeupi jese yave.”