ÉXODO 2 - Biblia Guarani Tumpa Iñee

Moisés oa vae regua

¹ Metei kuimbae Leví iñemuña pegua ojo omenda metei kuñatai Leví iñemuña pegua ndive.

² Jare jókuae kuña ipurúa jare oa imembɨ metei kuimbae; jare oecha ipöra yae ramo, oñomi güɨreko mboapɨ yasɨ rupi.

³ Ërei mbaetɨ ma ipuere oñomi yave, oipɨɨ metei kanata jare oyapeteasɨ mbae ipomoasɨ vae pe jare mbae iyaɨsɨgüe pe, jare pɨpe oñono michia jare güɨraja oeya ɨ jembeɨ pe, käipepe pɨte pe.

⁴ Jare jókuae michia jeindɨ omae oiko jese mombɨrɨ güi maratuta ra oasa vae.

⁵ Jare Faraón tayɨ ogüeyɨ ɨ̈aka pe oyau yave, jembiokuai kuñatai reta oguata ramboeve ɨ jembeɨ rupi, jae oecha kanata käipepe pɨte pe, jare omondo metei jembiokuai kuñatai güeru vaerä chupe.

⁶ Jare oipea yave oecha michia kuimbae; jare kuae michia oyaeo oï, jare oiparareko omae jese, jare jei: —Hebreo reta imichia ko kuae.

⁷ Jayave michia jeindɨ jei Faraón tayɨ pe: —¿Ajata pa aenɨi ndeve metei hebrea michia iyangarekoa, ombokambu vaerä ndeve kuae michia?

⁸ Jare Faraón tayɨ jei chupe: —Ekua. Jayave ojo jókuae kuñatai jare oenɨi michia ichɨ etei.

⁹ Jare Faraón tayɨ jei chupe: —Eraja kuae michia embokambu cheve, jare che amboepɨta ndeve. Jare kuae kuña güɨraja jókuae michia re oyangareko.

¹⁰ Jare michia tuicha ma yave, güeru Faraón tayɨ pɨri, jare jae oipɨɨ imembɨrä, jare ombojee Moisés, echa jei: —Ɨ güi anoegüe ko.

Moisés otekuarai Egipto güi

¹¹ Moisés okuakuaa ma yave, metei ara ojo jëtara reta ñogüɨnoia pe; jare oecha oiporara yae reta mbaravɨkɨ ipoɨ vae, jare oecha vi metei Egiptoɨgua oinupa güɨnoi metei jëtara hebreo.

¹² Jayave omae opaete iyɨ́vɨri rupi, oecha mbaetɨ kia jokoropi yave, oyuka jókuae Egiptoɨgua jare oñotɨ ɨvɨkuitï pe.

¹³ Pɨareve pe oë ye, jare oecha mókoi hebreo reta oñoraro ñogüɨnoi, jayave jei oporonupa oï vae pe: —¿Maera pa rekua nerëtara re?

¹⁴ Jare jae jei chupe: —¿Kia pa neñono oreruvicharä jare orejäa vaerä? ¿Reyemongeta pa cheyuka vaerä Egiptoɨgua reyuka rami? Jayave Moisés ou okɨɨye jare jei: “Kuae reta oikuaa ma yepe ayapogüe.”

¹⁵ Faraón oendu yave kuaekuae regua, oeka kërai oyukauka vaerä Moisés; ërei Moisés otekuarai Faraón güi, jare ojo oiko vaerä ɨvɨ Madián pe.

¹⁶ Jare ɨkua iyɨpɨ pe oguapɨ oï ramboeve, sacerdote Madián pegua chiu tayɨ reta yogüeru güɨnoe ɨ, omotɨnɨe vaerä mɨmba iɨguarɨru reta, omboɨu reta vaerä tu ivecha reta,

¹⁷ Ërei vecha iyangarekoa reta yogüeru opa ombosɨrɨ joko güi; jayave Moisés opüa oepɨ reta, jare omboɨu chupe reta ivecha reta.

¹⁸ Jare yogüeru ye yave, tu Reuel jei chupe reta: —¿Maera yera jarembae mbatee peyu añave?

¹⁹ Jae reta omboyevɨ ñee chupe: —Metei kuimbae Egiptoɨgua orereepɨ vecha iyangarekoa reta güi, güɨnoe vi oreve ɨ jare omboɨu vecha reta.

²⁰ Jayave Reuel jei tayɨ reta pe: —¿Kia pe pa oime oï? ¿Maera pa peeya jókuae kuimbae? ¡Pekua peenɨi ou vaerä okaru!

²¹ Jare Moisés oñemokɨ̈reɨ opɨta vaerä jókuae kuimbae pɨri; jare jae omee tayɨ Séfora Moisés jembirekorä,

²² jókuae kuña imembɨ chupe metei kuimbae; jare Moisés ombojee Gersón, echa jei: “Ketɨgua ko che ɨvɨ ambuae pe.”

²³ Kuae jaɨkue rupi, ɨma ma oasa yave, mburuvicha guasu Egipto pegua omano. Israel iñemuña reta jeieteño güɨroäse yeokuaiasɨ katu, jare ipɨatɨtɨ reve oyerure reta Tumpa pe; jare jae oendu jae reta iyerure yeokuaiasɨ katu jeko pegua.

²⁴ Tumpa oendu jae reta güɨroäse yeokuaiasɨ katu vae, jare imaendúa morogüɨrökuavee päve oyapo Abraham, Isaac jare Jacob ndive vae re.

²⁵ Tumpa omae Israel iñemuña reta re, jare oecha kërai yogüɨreko vae.