ÉXODO 18 - Biblia Guarani Tumpa Iñee

Jetro opou Moisés pɨri

¹ Jetro, sacerdote Madián pegua Moisés jovaya oendu opaete mbaembae Tumpa oyapo Moisés ndive vae, jare Israel iñemuña reta ndive vae re, jare yandeYa kërai güɨnoe Egipto güi vae.

² Moisés omondo ye jëta kotɨ jembireko Séfora; jare jovaya Jetro omboresive, mbaetɨ mbae jei tayɨ pe,

³ jare mókoi reve imembɨ reta pe. Metei jee Gersón, echa jei: “Ketɨgua che ɨvɨ ambuae pe,”

⁴ jare ïru jee Eliezer, echa jei: “Cheru iTumpa chemborɨ, jare chereroasayepe Faraón ikɨsepuku güi.”

⁵ Jare Jetro ou Moisés jembireko jare taɨ reta ndive Moisés oyembojeyupa oïa pe, Tumpa iɨvɨtɨ jóvai;

⁶ jare jei Moisés pe: —Che nderovaya Jetro, ayu roecha vaerä nderembireko ndive, jare kuae mókoi nderaɨ reta ndive.

⁷ Jare Moisés oë oapependo jovaya, itindɨ jóvai jare oovapɨte jare oparandu oyoupe kërai ra yogüɨreko vae, javoi oike reta küaraɨa guakapi pegua pe.

⁸ Joko pe Moisés imiari jovaya pe yandeYa oyapo opaete mbaembae Faraón pe jare Egiptoɨgua reta pe vae re, Israel iñemuña reta oaɨu jeko pegua, jare opaete mbaemboavai oasa jae reta ndive tape rupi vae re, kërai yandeYa güɨroasayepe vae re.

⁹ Jare Jetro oyerovia opaete ikavi vae yandeYa oyapo Israel iñemuña reta pe vae re, Egiptoɨgua reta ipo güi güɨroasayepe jeko pegua,

¹⁰ jare jei: —Toyemboete yandeYa, Faraón jare Egiptoɨgua reta ipo güi pereepɨ vae jare oepɨ opaete vae Egiptoɨgua reta ipo güi vae,

¹¹ añave aikuaa yandeYa tuicha yae ete ko opaete ïru tumpa reta güi vae; echa ipɨayemboete pekotɨ vae reta re oechauka imbaepuere.

¹² Jare Jetro, Moisés jovaya omee mɨmba oyeyukagüe opaetei oyeapɨ vae jare mɨmba oyeyukagüe Tumpa peguarä. Javoi Aarón jare opaete Israel iñemuña itenondegua reta ndive yogüeru okaru vaerä Moisés jovaya ndive Tumpa jóvai.

Moisés oiparavo ïru oporojäa vae reta

¹³ Pɨareve pe Moisés oguapɨ ojäa opaete vae; jare ndeimbove güive kaaru regua ñogüɨnoi Moisés jóvai.

¹⁴ Jovaya oecha yave Moisés oyapo oï vae, jei chupe: —¿Maera pa körai reyapo kuae tëta? ¿Maera pa ndeño reguapɨ jare opaete vae ñogüɨnoi nderóvai ndeimbove güive kaaru regua?

¹⁵ Jare Moisés jei jovaya pe: —Echa yogüeru chépɨri oparandu vaerä Tumpa pe.

¹⁶ Oime yave maratu oyokotɨ, yogüeru chépɨri jare ajäa metei metei rupi jare amombeu chupe reta Tumpa iporookuai reta.

¹⁷ Jayave Moisés jovaya jei chupe: —Mbaetɨ ko ikavi reyapo vae,

¹⁸ ndekangɨta jare opaete vae reta ikangɨta vi; echa jeta yae ko mbaravɨkɨ ndeveguarä, ngaraa ndepuere ndeño opa reyapo.

¹⁹ Añave, eyeapɨsaka jaeta ndeve vae re, Tumpa toï nde ndive. Nde ekua Tumpa jóvai opaete vae jekovia pe, jare emombeu chupe mbaemboavai jae reta güɨnoi vae.

²⁰ Jare emboe reta mborookuai reta re, jare eechauka kavi chupe reta kërai yogüɨreko vaerä jare mbae ra oyapo retata vae.

²¹ Jare eiparavo opaete vae güi, kuimbae oikatuta tëta güɨroata vae, Tumpa güi oipoɨu vae, kuimbae jupi vae, imbaepotaraimbae; jare eñono mil vae reta juvicharä, cien, cincuenta jare payandepo kuimbae reta juvicharä.

²² Kuae reta tojäa opaete vae ara ñavo; jare opaete teko yavai yae ete vae togüeru reta ndekotɨ, jare jae reta tojäa teko mbaetɨ yavai mbatee vae. Körai rembovevɨita ndeyeugüi ndeparavɨkɨ, jare kuae reta ndemborɨta jese.

²³ Kuae reyapo yave, jare Tumpa körai ndeokuai yave, ngaraa ndekangɨ, jare opaete kuae reta yogüɨrajata mbɨakatu reve ñogüɨnoia rupi.

²⁴ Jare Moisés oendu jovaya jei chupe vae, oyapo opaete jei chupe rami:

²⁵ Moisés oiparavo kuimbae oikatuta tëta güɨroata vae reta Israel iñemuña reta güi, jare oñono opaete vae juvicharä, mil kuimbae vae reta re, cien, cincuenta jare payandepo kuimbae reta re.

²⁶ Jare kuae reta oporojäa tëta re ara ñavo; teko yavai yae ete vae güeru reta Moisés kotɨ, jare kuae reta oñono kavi teko mbaetɨ yavai mbatee vae.

²⁷ Jaɨkue rupi Moisés omboyupavo jovaya, jare ojo ye jëta kotɨ.