ÉXODO 16 - Biblia Guarani Tumpa Iñee

Tumpa omee maná

¹ Jare opa yogüɨraja opaete Israel iñemuña reta Elim güi, jare yogüɨraja oväe ñuu Sin pe, kuae oï Elim jare Sinaí ipäu pe, jae ko metei yasɨ quince araa pe Egipto güi ñogüɨnoe güire.

² Opaete Israel iñemuña reta iñeenguru Moisés jare Aarón kotɨ kuae ñuu pe.

³ Körai jei Israel iñemuña reta chupe reta: —¡Maera ra romano voiä yandeYa ipo pe ɨvɨ Egipto pe! Roguapɨse yave yapepo soo ndive jare mbɨyape rou orerɨ̈vɨata regua; ërei pe orerenoe kuae ñuu rupi oreyukauka vaerä yɨmbɨaɨ pe opaete kuae roiko vae.

⁴ YandeYa jei Moisés pe: —Mase, che ambouta ara güi mbɨyape ama okɨ rami; toë tomonoo reta ara ñavo jókuae ara jou vaeräño, aikuaa vaerä oyapo ra ko cheporookuai vae ani mbaetɨ ra vae.

⁵ Ërei ovaa ara pe toyupavo reta oñovatu vaerä mókoi ara peguarä.

⁶ Jayave Moisés jare Aarón jei opaete Israel iñemuña reta pe: —Kaaru yave peikuaata yandeYa ko perenoe ɨvɨ Egipto güi vae,

⁷ jare ndeimbove yave peechata yandeYa iyemboetea; echa jae oendu peñeenguru ikotɨ vae. ¿Kia pa ore peñeenguru vaerä orekotɨ?

⁸ Jei ye vi Moisés: —YandeYa omeeta kaaru yave peve soo peu vaerä, jare ndeimbove yave mbɨyape perɨ̈vɨata regua; echa yandeYa oendu peñeenguru ikotɨ vae; echa ore, ¿kia pa ko? Orekotɨä ko peñeenguru, yandeYa kotɨ etei ko.

⁹ Jare Moisés jei Aarón pe: —Ere opaete Israel iñemuña reta pe: Peyu yandeYa oïa pe, echa jae oendu peñeenguru vae.

¹⁰ Aarón imiari ramboeve Israel iñemuña reta ndive, omae reta ñuu kotɨ jare oecha reta yandeYa iyemboetea jembipe oyekuaa amapɨtu re.

¹¹ YandeYa jei Moisés pe:

¹² —Che aendu Israel iñemuña reta iñeenguru vae; nemiari chupe reta körai: Kaaru yave peuta soo, jare ndeimbove yave perɨ̈vɨatata mbɨyape re. Jayave peikuaata che ko jae peYa Tumpa vae.

¹³ Jare kaaru ma yave ou jetagüe inambu, jare opa omotɨnɨe jae reta ñogüɨnoia; jare ndeimbove yave oa ɨsápɨi opaete teyupa iyɨ́vɨri rupi.

¹⁴ Jare mbaetɨ ma ɨsápɨi oa yave, ko oecha reta ñuu rupi mbae michi jare yapúa vae, iroɨ ɨvɨ re oa vae rami.

¹⁵ Jare Israel iñemuña reta oecha yave jei reta oyoupe: “¿Mbae ra kuae?” Echa mbaetɨ oikuaa reta mbae ra ko vae. Jayave Moisés jei chupe reta: —Jae ko mbɨyape, yandeYa omee peu vaerä vae.

¹⁶ Kuae ko jae peYa ombou vae: Pemonoo metei ñavo peyeupe pepuereta peu rupi; metei ñavo vae tomonoo mókoi kilo rupi jo pegua ñavo jou vaerä.

¹⁷ Jare jökorai oyapo Israel iñemuña reta; amogüe jeta omonoo, ïru mbovɨño omonoo.

¹⁸ Metei ñavo vae ojäa kavi iyeupe, mbaetɨ jembɨre jeta omonoo vae pe, jare mbaetɨ vi oata mbovɨño omonoo vae pe. Metei ñavo vae omonoo opata jou vaerä eteiño.

¹⁹ Jare Moisés jei chupe reta: —Agüɨye metei ave toñovatu pɨareve peguarä.

²⁰ Ërei ngatu jae reta mbaetɨ güɨrovia Moisés, echa amogüe oñovatu pɨareve peguarä, jare jókuae nunga jaso jare iine; jare Moisés iyarasɨ ikotɨ reta.

²¹ Jare omonoo reta ara ñavo, metei vae ñavo jókuae jouta vae; jare kuaraɨ jaku ma yave opa tɨkui jókuae oñemonoombae.

²² Ërei ovaa ara pe omonoo reta mókoi ara pegua voi, jókuae ara ñavo omonoo reta vae güi; jare opaete vae itenondegua reta yogüeru jókuae oikuaauka Moisés pe,

²³ Jare Moisés jei chupe reta: —Körai ko yandeYa jei. Pɨareve ko jae ara mbutuu pegua, mbutuu oñeñono tee yandeYa peguarä vae, pemboyɨ añave pemboyɨta vae, jare pembopupu añave pembopuputa vae, jare peñovatu pɨareve peguarä opaete jembɨre peve vae.

²⁴ Jae reta oñovatu pɨareve peguarä, Moisés oyókuai reta rami jare mbaetɨ jaso, mbaetɨ vi iine.

²⁵ Jayave Moisés jei: —Peu añave, echa jae ko ara mbutuu pegua yandeYa peguarä; añave ngaraa peväe maná ñuu rupi.

²⁶ Ova ara pemonoota, ërei chiúa ara jae ko ara mbutuu pegua, jókuae ara mbaetɨta maná.

²⁷ Amogüe reta oë chiúa ara pe oeka vaerä maná, ërei mbaetɨ etei oväe chupe reta.

²⁸ Jayave yandeYa jei Moisés pe: —¿Kërai yave regua pa mbaetɨta perovia cheporookuai reta?

²⁹ Mase, che peYa amee peve ara mbutuu pegua; jáeramo ovaa ara pe amee peve tembíu mókoi ara peguarä. Jayave, metei ñavo toï jo ae rupi, agüɨye metei ave toë chiúa ara pe.

³⁰ Körai opaete vae oputuu chiúa ara pe.

³¹ Jare Israel iñemuña reta ombojee maná; temitɨ culantro jäɨ rami, tïi jare ipiche mbɨyape ei ndive oyea vae rami.

³² Jare Moisés jei: —Körai yandeYa jei: “Pemonoo mókoi kilo rupi, jare peñovatu peñemuña reta peguarä, oecha reta vaerä mbɨyape che amee peu ñuu rupi vae, ɨvɨ Egipto güi che pogüɨnoe yave.”

³³ Jare Moisés jei Aarón pe: —Eñono maná mókoi kilo rupi metei mbaerɨru pe, jare eñono yandeYa jóvai, jare toñeñovatu peñemuña reta peguarä.

³⁴ Jare Aarón omboɨru oñono käjou yemomaendúa pegua jóvai oñeñovatu vaerä yandeYa oyókuai Moisés vae rami.

³⁵ Jökorai Israel iñemuña reta jou maná cuarenta año rupi, opa yogüɨraja oväe regua ɨvɨ kia oime yogüɨrekoa pe; maná jou reta yogüɨreko, opa regua yogüɨraja oväe reta ɨvɨ Canaán jembeɨ pe.

³⁶ Gomer jae ko güɨnoi mókoi kilo rupi.