ÉXODO 15 - Biblia Guarani Tumpa Iñee

Moisés jare María itairari

¹ Jayave Moisés jare Israel iñemuña reta otairari yandeYa pe körai: “Che tatairari yandeYa pe, echa oyemboyekuaa kërai jae tuicha yae ete ko; opa omopɨ̈tupa ɨguasu pe kavayu jare kavayu regua reta.

² Chetairari yandeYa kotɨño ko, jae ko chepɨ̈rata jare cheyemboasa. Jae ko cheTumpa, amboeteta ko, cheru iTumpa ko, ambotuichata ko.

³ YandeYa jae ko ñeraro regua. YandeYa, ¡jae ko jee!

⁴ Ɨguasu pe opa omopɨ̈tupa Faraón isundaro reta ikäretou ndive. ¡Isundaro ruvicha reta jëia vae reta opa ipɨ̈tupa Ɨguasu Pɨ̈ta vae pe!

⁵ Ɨ rugua tɨpɨ yae vae pe oa reta ita rami; ɨguasu opa oyasoi reta.

⁶ CheYa, ndepo ndeakatu kotɨgua omboyekuaa ndembaepuere, ndepo ndeakatu kotɨgua omoamɨri tovaicho reta.

⁷ Ndembaepuere yae ete pe remoamɨri oyovaicho ndekotɨ vae reta; ndearasɨ rembou jare jae reta opa ókai, ɨtɨ ókai rami.

⁸ Nepɨ̈túe rupi oyemboatɨ ɨ; ɨaparúa reta oyemboatɨ meteia pe ovapetea rami; ɨguasu tɨpɨ yae vae opa ñasusu iyɨvɨte rupi.

⁹ Tovaicho jei: ‘Taɨkuemoña aupitɨ regua, jare opa tamboyao apɨ̈ro chugüigüe chepɨakatu apɨta regua. Tanoe chekɨsepuku, jare chepo tomboai reta.’

¹⁰ Ërei reipeyu ndeɨvɨtu pe, jare ɨguasu opa oyasoi reta; opa opɨta ɨ rugua yavaete yae vae pe, jiero oa ɨ rugua pe rami.

¹¹ CheYa, ¿kia pa nde rami ïru tumpa reta güi? ¿Kia pa nde rami tuicha yae jare iyoambae, mɨakañɨ tuichagüe jare yavaetegüe iyapoa? ¡Jupi ko reyemboeteuka vaerä!

¹² ¡Remopüa ndepo ndeakatu kotɨgua; jare ɨvɨ opa omókoi reta!

¹³ Ndeporoparareko rupi reroata kuae tëta reyora vae; reraja ndembaepuere rupi nerëta oñeñono tee vae pe.

¹⁴ Opaete tëta reta oendu yave orɨrɨi retata; mbae jasɨ güi oyeetepokata filisteo reta,

¹⁵ jayave Edom pegua sundaro ruvicha reta opata ipɨajopa; Moab pegua jëia yae vae reta orɨrɨita okɨɨye güi; ipɨtuta opaete Canaán pe yogüɨreko vae reta.

¹⁶ ¡Toa jese reta ñeiämondo jare kɨɨye! ¡Ndeyɨva imbaepuere jeko pegua topɨta reta kïrii ita rami, opa regua oasa ndembae vae reta, cheYa, opa regua oasa ndembae vae reta reyora vae!

¹⁷ Nde reroiketa reñono reta, ɨvɨ nde remee chupe reta vae pe, nde reikoa pe, nde reyapo kavía pe, cheYa, o mbaemboete renda nde reiparavoa pe, cheYa.

¹⁸ ¡YandeYa oporookuaita iyapɨmbae jare jekuae avei!”

María itairari

¹⁹ Faraón oike kavayu re opo reve ikäretou reta ndive, jare isundaro reta kavayu re oike reta ɨguasu pe yave, yandeYa opa ye ɨguasu omboyerova jese reta; ërei Israel iñemuña reta oasa ɨvɨ otinía rupi, ɨguasu ipäu rupi.

²⁰ Jare ñeemombeúa María, Aarón jeindɨ oipɨɨ metei angúa raɨ, jare opaete kuña reta oë jaɨkue angúa raɨ ndive ochüke reve,

²¹ jare María jei chupe reta: “Petairari yandeYa pe, echa oyembotuicha yae ete, opa omopɨ̈tupa ɨguasu pe kavayu jare kavayu regua reta.”

Ɨ iro yae vae

²² Moisés jei Israel iñemuña reta pe yogüɨraja vaerä Ɨguasu Pɨ̈ta vae güi, jare ñogüɨnoe ñuu Shur jee vae kotɨ, jare mboapɨ ara ma oguata reta yave mbaetɨño oväe ɨ.

²³ Opa yogüɨraja oväe Mara pe, jare mbaetɨ ipuere jou reta ɨ Mara pegua, echa iro yae; jáeramo ombojee reta Mara.

²⁴ Jayave iñeenguru reta Moisés kotɨ, jei reta: “¿Mbae pa añave routa?”

²⁵ Jare Moisés oyerure yandeYa pe, jare yandeYa oechauka chupe metei ɨvɨra; jókuae oitɨ ɨ pe, jare ombokavi ɨ. Jare joko pe yandeYa omee chupe reta mborookuai reta, joko pe ojäa jae reta iporogüɨrovia;

²⁶ jei körai: “Peendu kavi yave che peYa Tumpa iñee, jare peyapo yave jupi vae cheresa róvai, peendu jare peyapo yave opaete cheporookuai, ngaraa ambou peve metei ave mbaerasɨ reta Egiptoɨgua reta pe ambou vae; echa che ko jae peYa pepoanoa.”

²⁷ Jare opa yogüɨraja oväe Elim jee vae pe, doce ɨ jesaɨ vae oimea pe, jare setenta karandaɨ reta; jare joko pe opɨta reta oyembojeyupa ɨ iyɨpɨ pe.