ÉXODO 13 - Biblia Guarani Tumpa Iñee

Membɨrɨpɨ kuimbae reta oñeñono tee

¹ YandeYa jei Moisés pe:

² “Peñono tee cheve opaete membɨrɨpɨ kuimbae, echa opaete Israel iñemuña reta taɨrɨpɨ chembae ko, jökorai vi opaete mɨmba reta imembɨrɨpɨ kuimbae.”

³ Jare Moisés jei opaete vae pe: “Pemaendúa kuae ara peñerenoe Egipto güi vae re, yeokuaiasɨ katu güi, echa yandeYa perenoe kuae güi imbaepuere rupi. Jáeramo agüɨye peu mbɨyape oyembovugüe.

⁴ Pe reta peë kuae ara, yasɨ Abib pe,

⁵ kuae yasɨ pe etei peyapota arete, yandeYa pereraja ma peñono jókuae ɨvɨ kavi yae vae pe yave, jae ko cananeo, heteo, amorreo, heveo, jare jebuseo reta iɨvɨ, peñemuñagüe reta pe jae oñererökuavee omee vaerä peve vae pe.

⁶ Chiu ara peu mbɨyape oyembovumbae jare chiúa ara pe toiko arete yandeYa peguarä.

⁷ Chiu ara toyeu mbɨyape oyembovumbae, agüɨye etei toime mbɨyape oyembovugüe, mbɨyape imbovúa ave agüɨye peiporu opaete peɨvɨ rupi.

⁸ Jókuae ara pemiarita peraɨ reta pe: ‘Oyeapo ko kuae, yandeYa oyapo oreve Egipto güi orerenoe yave vae jeko pegua.

⁹ Kuae toiko pepoapɨ re ani peresɨva re mbae ikañɨmaa vae rami, pemaendúa avei vaerä yandeYa iporookuai re; jae perenoe imbaepuere yae ete rupi Egipto güi vae jeko pegua.

¹⁰ Jáeramo, kuae mborookuai peyapo avei año ñavo.’

¹¹ YandeYa pereraja ma yave Canaán iñemuña reta iɨvɨ pe, peñemuñagüe reta pe jae güɨrökuavee vae omee ma peve yave,

¹² peñono tee opaete peraɨrɨpɨ reta, jökorai vi opaete perɨmba reta imembɨrɨpɨ kuimbae reta; echa yandeYa imbae ko.

¹³ Ërei opaete mburika imembɨrɨpɨ kuimbae; toyepoepɨ metei vecha kuimbae taɨrusu vae ndive, jare mbaetɨ yave jökorai, toyeakɨo mburika iñatuäti. Jökorai vi toyepoepɨ peraɨrɨpɨ ñavo,

¹⁴ jare ïru ara rupi peraɨ reta oparandu yave peve: ‘¿Mbae pa ko kuae?’ Pe pereta chupe reta: ‘YandeYa orerenoe imbaepuere yae ete rupi Egipto güi, yeokuaiasɨ katu güi.

¹⁵ Jare Faraón omotäta ipɨa, omaeñoä roë yave yandeYa opa oyukauka ɨvɨ Egipto pe opaete membɨrɨpɨ kuimbae, kuimbae taɨrɨpɨ güive jare mɨmba imembɨrɨpɨ kuimbae; kuae jeko pegua ore royuka yandeYa peguarä opaete mɨmba imembɨrɨpɨ kuimbae, jare romee ko mbota oreraɨrɨpɨ reta jekovia pe.

¹⁶ Añave toiko pepoapɨ re ani peresɨva re mbae ikañɨmaa vae rami, yandeYa orerenoe imbaepuere yae ete rupi Egipto güi vae jeko pegua.’ ”

Amapɨtu jare tata

¹⁷ Faraón omaeño yogüɨraja Israel iñemuña reta güire, Tumpa mbaetɨ güɨraja tape köi vae rupi, filisteo reta iɨvɨ rupi oasa vae rupi; echa Tumpa oyemongeta agüɨye vaerä ipɨtu kuae tëta oecha yave ñeraro, jare oyerova reta ye Egipto kotɨ.

¹⁸ Jáeramo Tumpa güɨraja ñuu rupi tape ojo Ɨguasu Pɨ̈ta vae kotɨ vae rupi, jokoropi oyere reta vaerä yogüɨraja. Jare ñogüɨnoe Israel iñemuña reta Egipto güi jembiporu ñeraro pegua reve reve.

¹⁹ Jayave Moisés güɨraja José jetegüe, jae güɨrökuaveeuka Israel iñemuña reta pe güɨraja vaerä jetegüe, jei reve: “Añetete Tumpa outa perenoe, jare perajata kuri jetegüe perupíe.”

²⁰ Jare yogüɨraja reta Sucot güi, jare opa yogüɨraja reta oyembojeyupa Etam pe, ñuu oyemboɨpɨa pe.

²¹ Jare yandeYa ojo jae reta jenonde metei jɨsɨ amapɨtu re, ara pe omomoe vaerä japerä, jare pɨ̈tu yave metei jɨsɨ tata ara re, omoembipe vaerä chupe reta; ipuere vaerä oguata reta ara pe jare pɨ̈tu yave.

²² Jare ara pe mbaetɨ osɨrɨ Israel iñemuña reta jenonde güi jókuae amapɨtu, jaeramiño vi jókuae tata pɨ̈tu yave omoembipe vae.