ÉXODO 12 - Biblia Guarani Tumpa Iñee

Pascua regua

¹ YandeYa omomiari Moisés jare Aarón ɨvɨ Egipto pe körai:

² “Kuae yasɨ toï peve tenondegua yasɨrä; kuae yasɨ pe toyemboɨpɨ año pevegua.

³ Nemiari opaete Israel iñemuña reta pe körai: ‘Kuae yasɨ, payandepo araa pe, metei ñavo toipɨɨ metei vecha kuimbae taɨrusu vae, metei tëtara metei o pe yogüɨreko vae ñavo metei vecha kuimbae taɨrusu vae.

⁴ Ërei metei tu vae mbovɨ yae yave jare mbaetɨta ipuere opa jou reta jókuae vecha kuimbae taɨrusu vae yave, jayave toyomboatɨ jëta-ɨpɨ pegua ndive jare tomboyao kavi oyoupe jou reta vaerä jókuae vecha kuimbae taɨrusu vae.

⁵ Toipɨɨ reta mɨmba jete kavi vae, metei año güɨnoi vae; toipɨɨ reta vecha reta güi ani kavara reta güi.

⁶ Jare toñapɨti reta ara catorce oväe regua kuae yasɨ re, jare jókuae kaaru opaete vae Israel iñemuña reta toyuka.

⁷ Jare tomboɨru reta jugüɨ, jare toipichɨ reta jöke iyɨke re ɨvɨra oï yoyavi vae re jare vi ɨvɨra öke iárambo rupi oyepɨasa oï vae re, jókuae o pe okaru retataa pe.

⁸ Jare jókuae pɨ̈tu tou reta soo oyeapegüe jare mbɨyape oyembovumbae; ñana iro vae ndive tou reta.

⁹ Agüɨye tou reta mbae oyɨmbae chugüi, jare agüɨye tou reta oñemoigüe ave, jaeño tou reta oyeapegüe; iñäkagüe, ipɨgüe, jare ipɨagüe toyeape.

¹⁰ Agüɨye etei mbae tomoembɨre reta pɨareve peguarä, jembɨregüe pɨareve pe topa toapɨ reta.

¹¹ Körai toñogüɨnoi jou reta vaerä: Toyupavo kavi toñogüɨnoi reta jare ipɨapaa tomonde reta, jare ipopoka ipo pe; jare tou reta jaɨai reve, echa che peYa iPascua ko.

¹² Echa che aasata jókuae pɨ̈tu opaete ɨvɨ Egipto rupi, jare omanota opaete membɨrɨpɨ kuimbae ɨvɨ Egipto rupi, jökoraita opaete kuimbae reta jare mɨmba reta. Che peYa aitɨta cheporojäa opaete tumpa-raanga reta Egipto pegua re.

¹³ Jare tugüɨ toï ikañɨmaa vaerä opaete o reta peïta pɨpe vae rupi; tugüɨ aecha yave che aasata pegüi, jare mbaetɨta peiporara kuae mbaesusere Egipto re aitɨ aï yave.

¹⁴ Jare kuae ara topɨta peve pemaendúa vaerä, jare peyapo arete tuicha yae vae che peYa peguarä, jare peñemuña reta toyapo vi jekuae avei.

¹⁵ Chiu ara peuta mbɨyape oyembovumbae; jare tenondegua ara güive mbaetɨta peiporu mbɨyape imbovúa pero rupi; echa kuae Israel iñemuña reta ipɨte pe kia nunga vae jou yave mbɨyape oyembovugüe tenondegua ara güive chiúa ara rupi vae toyemombo ete kavi Israel iñemuña reta ipɨte güi.

¹⁶ Tenondegua ara, jökorai vi chiúa ara pe toime yemboatɨ guasu Tumpa peguarä; agüɨye mbae toyeapo jókuae ara rupi; jaeño pepuere peyapo tembíu peyeupeguarä.

¹⁷ Arete mbɨyape oyembovumbae vae peyapo avei, jaeramiño vi opaete peñemuña reta jekuae avei rupi, echa jókuae ara etei che pogüɨnoe ɨvɨ Egipto güi;

¹⁸ tenondegua yasɨ catorce ara güive kaaru yave peu mbɨyape oyembovumbae vae, veintiuno ara kaaru yave oväe regua.

¹⁹ Chiu ara mbaetɨta peiporu mbɨyape imbovúa pero rupi; echa kia nunga vae jou yave mbɨyape oyembovugüe, jökorai metei perëtaɨgua ani ketɨgua vae yave toyemombo ete kavi Israel iñemuña reta ipɨte güi.

²⁰ Agüɨye etei oyembovugüe peu; pero ñavo rupi peu mbɨyape oyembovumbae vaeño.’ ”

²¹ Moisés omboatɨ Israel iñemuña itenondegua reta, jare jei chupe reta: “Peipɨɨ metei vecha kuimbae taɨrusu vae pero ñavo peguarä, jare peyuka Pascua peguarä.

²² Jare peipɨɨ metei yokuaa ñana hisopo jee vae, jare pemoäkɨ mbaerugüɨ ɨvɨñae pe oï vae pe, jare peipichɨ ɨvɨra öke iarambogua re jare öke iyɨke yɨke pe oï vae re; jare agüɨye metei ave toë jo jöke güi köe regua.

²³ Echa yandeYa güeruta mano Egiptoɨgua reta re; jare oecha mbaerugüɨ öke iárambo jare iyɨke yɨke re yave, yandeYa oasata jókuae o jöke güi, jare ngaraa omaeño mano re oike vaerä pero pe oporoyuka.

²⁴ Kuae toiko peve metei mborookuai rami, jare peñemuña reta peguarä vi jekuae avei pegua.

²⁵ Jare peike ma jókuae ɨvɨ pe yave, peyapo avei kuae mborookuai; jókuae ɨvɨ yandeYa omeeta peve vae pe, arakae güɨrökuavee rami.

²⁶ Jare peraɨ reta oparandu yave peve, körai: ‘¿Mbae pa kuae peyapo vae?’

²⁷ Pe pereta chupe reta: ‘Kuae ko oyeyuka Pascua pe yandeYa pe vae, jae oasa güɨraveño Israel iñemuña reta ñogüɨnoia iárambo rupi Egipto pe yave, yandeYa güeru yave mano Egiptoɨgua reta re jare omboasayepe yandero pegua reta.’ ” Jayave Israel iñemuña reta oyetavatɨka jare omboete yandeYa.

²⁸ Jare Israel iñemuña reta opa yogüɨraja oyapo, yandeYa oyókuai Moisés jare Aarón rami.

Membɨrɨpɨ kuimbae reta imano

²⁹ Pɨare mbɨte rupi yandeYa güeru mano opaete membɨrɨpɨ kuimbae re ɨvɨ Egipto pe, Faraón taɨrɨpɨ oï mburuvicharä vae güive tembipɨɨ tembipɨɨrɨru pe oï vae taɨrɨpɨ ave, jare opaete mɨmba reta imembɨrɨpɨ kuimbae.

³⁰ Jókuae pɨ̈tu opüa Faraón jare opaete jembiokuai reta, jare opaete Egiptoɨgua reta; jare täta yae jäse oyaeo reta opaete Egipto pe, echa o ñavo rupi oime tëogüe.

³¹ Jare jókuae pɨ̈tu Faraón oenɨiuka Moisés jare Aarón, jare jei chupe reta: —Peë cherëta güi, pe reta jare opaete Israel iñemuña reta, pekua pemboete peYa, pe pere rami.

³² Peraja vi pevecha jare peguaka reta peipota rami, pekua jare peyerure vi cheré.

³³ Jare Egiptoɨgua reta omoangeko opa reta vaerä omoë iɨvɨ güi, echa jei reta: “¡Opata ñamano!”

³⁴ Jare güɨraja reta imbɨyaperä vae oyembovumbaeño, jare oyapɨkua reta oñono ikupe re.

³⁵ Israel iñemuña reta oyapo Moisés oyókuai rami, oeka Egiptoɨgua reta pe mbae jepɨ vae korepoti pegua, oro pegua jare temimonde vi.

³⁶ Jare yandeYa ombopɨakavi Egiptoɨgua reta omee vaerä mbae oaɨumbae reve Israel iñemuña reta pe; jare jae reta omee oeka chupegüe; jökorai opa oitɨvɨro oeya Egiptoɨgua reta.

Israel iñemuña reta oë Egipto güi

³⁷ Ñogüɨnoe Israel iñemuña reta tëta Ramesés güi Sucot kotɨ, seisciento mil kuimbae, oyepapambae reve kuña reta jare michia reta.

³⁸ Yogüɨraja vi jae reta ndive jeta oipotagüe kuimbae, vecha reta jare jeta yeyé mɨmba.

³⁹ Jare omboyɨ reta mbɨyape oyembovumbaeño güeru reta Egipto güi vae, echa Egiptoɨgua reta opa ramboeve omoë iɨvɨ güi, mbaetɨ oyupavo reta oyapo vaerä tembíu iyeupe.

⁴⁰ Cuatrociento treinta año etei Israel iñemuña reta yogüɨreko Egipto pe,

⁴¹ jare cuatrociento treinta año oasa yave, jókuae ara etei yandeYa imbae reta jeta yae vae opa ñogüɨnoe ɨvɨ Egipto güi.

⁴² Jókuae pɨ̈tu jae ko oñeñono tee vaerä yandeYa pe, Israel iñemuña reta oñerenoe jókuae pɨ̈tu Egipto güi jeko pegua. Israel iñemuña reta toñono tee yandeYa peguarä jókuae pɨ̈tu jekuae avei pegua.

Mborookuai reta Pascua regua

⁴³ YandeYa jei Moisés jare Aarón pe: “Kuae ko jae mborookuai reta Pascua regua: Agüɨye metei ave ketɨgua tou mɨmba oyeyukagüe isoo,

⁴⁴ ërei opaete tembiokuai korepoti re oyeguagüe tou jókuae mɨmba isoo, oyembocircuncidauka ko yave.

⁴⁵ Ketɨgua jare ara ñavo iparavɨkɨ jepɨ chupe vae agüɨye tou jókuae mɨmba isoo,

⁴⁶ jókuae soo ipuere oyeu metei o peño, agüɨye toyereraja ikatu pe kuae soo, ikägüegüe ave agüɨye toyeakɨo.

⁴⁷ Kuae toyapo opaete Israel iñemuña reta.

⁴⁸ Ërei oime ketɨgua oiko pepɨte pe vae oipota yave, oyapo Pascua che peYa peguarä, toyembocircuncidauka opaete kuimbae jo pegua reta ndive, jayave ramo toyapo Pascua jare toiko jókuae perëtaɨgua ete pegua rami; ërei metei ave oyembocircuncidambae agüɨye tou jókuae mɨmba oyeyukagüe isoo.

⁴⁹ Kuae mborookuai eteiño vi toï kuae ɨvɨ pegua reta pe jare ketɨgua reta pepɨte pe yogüɨreko vae pe.”

⁵⁰ Körai oyapo opaete Israel iñemuña reta; yandeYa oyókuai Moisés jare Aarón rami, jökorai oyapo reta.

⁵¹ Jókuae ara etei yandeYa güɨnoe ɨvɨ Egipto güi Israel iñemuña reta, ñemuña ñavo rupi kavi.