ÉXODO 11 - Biblia Guarani Tumpa Iñee

Membɨrɨpɨ kuimbae reta omanota vae oñemoërakua

¹ YandeYa jei yepe Moisés pe: —Metei mbae ikavimbae vae aru ye ñotai räri Faraón re jare Egipto re, jayave ramo jae omaeñota peo kuae güi; jae etei opata pemombo kuae güi.

² Añave ere Israel iñemuña reta pe, metei ñavo kuimbae jare kuña reta toeka jëta-ɨpɨ pegua reta pe mbae jepɨ vae korepoti pegua jare oro pegua.

³ Jare yandeYa ombopɨakavi Egiptoɨgua reta, Israel iñemuña reta kotɨ. Echa opaete Egiptoɨgua reta jare tembiokuai reta Egipto pegua omboete yae reve omae Moisés re.

⁴ Jare Moisés jei ye Faraón pe: —CheYa jei körai: “Pɨare mbɨte yave che aëta aguata opaete Egipto rupi,

⁵ jare omanota opaete membɨrɨpɨ kuimbae ñavo ɨvɨ Egipto pe, Faraón taɨrɨpɨ oguapɨ oï mburuvicharä vae güive, tembiokuai kuña ombaeso vae imembɨrɨpɨ kuimbae ave, jare vi opaete mɨmba reta imembɨrɨpɨ kuimbae.

⁶ Jare oimeta yaeo tätagüe opaete ɨvɨ Egipto rupi; arakae güive mbaetɨi kuae nunga ou jare ngaraai ou ye vae.”

⁷ Ërei opaete Israel iñemuña reta güi, kuimbae reta jare mɨmba, ngaraa metei yaɨmba ave iñaro oyeendu; peikuaa vaerä ambuaeyee ko cheYa, pe Egiptoɨgua reta Israel iñemuña reta güi vae.

⁸ Jare yogüeruta opaete ndemborɨa reta cheróvai, jare oyetavatɨkata cheróvai jei reve: “Ekua, jare eraja opaete kuae tëta oï ndepo igüɨ pe vae.” Kuae jaɨkue rupi ramo aëta. Jare Moisés iyarasɨ yae oë ojo Faraón jóvai güi.

⁹ Jayave yandeYa jei Moisés pe: —Faraón ngaraa oendu peve, jökorai jetata mɨakañɨ reta ayapogüe kuae ɨvɨ Egipto pe.

¹⁰ Moisés jare Aarón oyapo opaete kuae mɨakañɨ reta Faraón iɨvɨ pe; echa yandeYa omotäta Faraón ipɨa, jare mbaetɨ omaeño yogüɨraja Israel iñemuña reta ɨvɨ Egipto güi.