ÉXODO 1 - Biblia Guarani Tumpa Iñee

Israel iñemuña reta oiporara Egipto pe

¹ Israel jae ko Jacob. Kuae jae Israel taɨ reta jee, Jacob ndive oike reta Egipto pe vae; metei metei ñavo yogüɨraja imichia reta ndive:

² Rubén, Simeón, Judá,

³ Isacar, Zabulón, Benjamín,

⁴ Dan, Neftalí, Gad jare Aser.

⁵ Opaete Jacob iñemuña reta oa chupe vae jae ko setenta. Ërei José oime ma oï Egipto pe.

⁶ Jare omano José jare opaete tɨkeɨ reta, tɨvɨ, jare vi opaete iyaveigua reta.

⁷ Jare Israel taɨ reta jeta yae oñemuña, jeiete okuakuaa reta jare imbaepuere yae reta, jökorai jae reta omotɨnɨe jókuae ɨvɨ.

⁸ Jayave opüa ïru mburuvicha guasu Egipto pe mbaetɨ oikuaa José regua vae; jare jei jëtaɨgua reta pe:

⁹ “Mase, kuae tëta Israel iñemuña reta jeta yae ma jare imbaepuere yae reta ma yandegüi.

¹⁰ Añave yandearakuaa yandeyeupe ikotɨ reta, agüɨye vaerä jekuae oñemuña reta; güɨramoi oime yave ñeraro oñemoïruta yanderovaicho reta ndive oñeraro reta vaerä yande ndive, jare opata yogüɨraja yandegüi.”

¹¹ Jáeramo, oñono reta iárambo mbaravɨkɨ re oyangareko vae reta, oyapouka vaerä chupe reta mbaravɨkɨ ipoɨ vae; jare oyapo reta mburuvicha guasu pembaagüɨye jɨrurä, tëta Pitón pe jare Ramesés pe.

¹² Ërei jeiete oiporarauka chupe reta reve, jekuaeñoi oñemuña jare okuakuaa reta; jáeramo Egiptoɨgua reta okɨɨye Israel iñemuña reta güi.

¹³ Jare Egiptoɨgua reta güɨrekoasɨ katu yae Israel iñemuña reta.

¹⁴ Oiporarauka yae chupe reta mbaravɨkɨ rupi, oyapouka chupe reta tuyuapo jare ladrillo jare opaete mbaravɨkɨ kó rupigua rupi; jare opaete mbaembae oyapouka chupe reta vae rupi omombaravɨkɨasɨ katu yae.

¹⁵ Jare mburuvicha guasu Egipto pegua imiari Sifra jare Fúa ndive, hebrea reta omboyekuaku vae reta, körai jei chupe reta:

¹⁶ —Pemborɨ hebrea reta imembɨ oa vaerä yave, pemae jese; kuimbae yave ¡peyuka!, ërei kuña yave pemaeño toikove.

¹⁷ Ërei oporomboyekuaku vae reta oipoɨu Tumpa güi, jare mbaetɨ oyapo reta mburuvicha guasu Egipto pegua oyókuai rami, omaeño michia kuimbae reta oikove.

¹⁸ Jayave mburuvicha guasu Egipto pegua omondo oenɨiuka kuae oporomboyekuaku vae reta, jare jei chupe reta: —¿Maera pa peyapo kuae, pemaeño oikove michia kuimbae reta?

¹⁹ Jare oporomboyekuaku vae reta jei Faraón pe: —Echa hebrea reta mbaetɨ ko kuña Egiptoɨgua reta rami; jae reta jete pɨ̈rata yae ko, ndei ore oporomboyekuaku vae reta rojo mbove jae reta oa ma imembɨ.

²⁰ Jare Tumpa oyapo ikavi vae oporomboyekuaku vae reta pe; jare Israel iñemuña reta jeta yae oñemuña.

²¹ Jare oporomboyekuaku vae reta, Tumpa güi oipoɨu vae jeko pegua, jae iporerekua jo pegua reta re.

²² Jayave Faraón oyókuai opaete jëtaɨgua reta, körai: “Pemombo ɨ pe opaete michia raɨ kuimbae oa vae, ërei kuña ko yave pemaeño toikove.”