ESTER 7 - Biblia Guarani Tumpa Iñee

Amán oyeeterasauka

¹ Mburuvicha guasu jare Amán yogüɨraja Ester oyapo arete okaru reta vaerä vae pe.

² Jare mokoía ara ma okau reta yave mburuvicha guasu jei Ester pe: —¿Mbae pa ko jae reiporu vae Ester? Oñemeeta ndeve, yepe tëi mbɨte rupi mborookuaía.

³ Jayave Ester mburuvicha guasu jembireko jei: —Mburuvicha guasu, ndepɨakatu ko cheré yave, jare jaekavi ko ndeve yave, aiporu neɨ̈ro vaerä cherekove pe jare cherëtaɨgua reta jekove pe;

⁴ echa che jare cherëtaɨgua reta roñemee roï opa vaerä romano jare opa vaerä rokañɨtei. Tembiokuairä roñemee yave chekïriiñota tëi; ërei jókuae tovaicho oyapogüe ngaraa etei jaekavi mburuvicha guasu iporookuaía peguarä.

⁵ Mburuvicha guasu Asuero jei Ester pe: —¿Kia pa, jare ketɨ pa oime oï jókuae oyemongeta ikavimbae yae oyapo vaerä vae?

⁶ Ester jei: —¡Tovaicho jare ikavimbae yae oyapo vae, jae ko kuae Amán ipɨapochɨ vae! Jayave Amán jova iyu yae opɨta okɨɨye güi mburuvicha guasu jare jembireko jóvai.

⁷ Javoi mburuvicha guasu opüa jókuae okarúa güi, iyarasɨ yae reve oë ojo joka pegua kó raɨ pe; Amán opɨta omoñera Ester güɨroasayepe vaerä jekove; echa oikuaa mburuvicha guasu oyukata ko.

⁸ Mburuvicha guasu ou ye kó raɨ kotɨ güi okarúa pe yave, oecha Amán oyetavatɨka oï, Ester oyapakua oïa re, jayave mburuvicha guasu jei: —¿Reipota pa repoko Ester re chero pe etei? Jökorai jei yave, jembiokuai reta oñova Amán jova.

⁹ Jare metei jembiokuai eunuco Harbona jee vae jei mburuvicha guasu pe: —Mase, oime Amán jëta pe oyatɨka ɨvɨra veintidó metro ɨvate vae oeterasa vaerä jese Mardoqueo, jókuae kuimbae omombeu ndeve ndemomburu vae reta regua vae. Jayave mburuvicha guasu jei: —¡Peeterasa jese!

¹⁰ Jökorai oeterasa reta Amán ɨvɨra omokätɨro tëi Mardoqueo peguarä vae re. Jökorai mburuvicha guasu iyarasɨ poi.