ESTER 6 - Biblia Guarani Tumpa Iñee

Amán ipɨarupiä omboete Mardoqueo

¹ Jókuae pɨ̈tu mburuvicha guasu mbaetɨ ipuere oke, jare oekauka tembikuatía, opaete mbae oasagüe oyekuatía oï pɨpe vae, omongeta reta vaerä chupe.

² Jayave oväe reta pɨpe kërai Mardoqueo oendu Bigtán jare Teres, mókoi eunuco reta öke iyangarekoa reta oñomomiari ñogüɨnoi oyuka vaerä mburuvicha guasu Asuero vae regua.

³ Jare mburuvicha guasu oparandu: —¿Oñemee pa mbae nunga mbota ani mbaemboete Mardoqueo pe, kuae oyapogüe re? Jare iyɨvɨrigua imborɨa reta jei: —Mbaetɨ etei mbae ave oñemee chupe.

⁴ Jökorai yave Amán oike ou mburuvicha guasu jo joka pe, oiporu vaerä Mardoqueo ombosavava jókuae oyapouka chupeguarä vae re. Jayave mburuvicha guasu oparandu: —¿Kia pa aipo oï oka pe?

⁵ Jare iyɨvɨrigua reta jei chupe: —¡Amán, ko oï oka pe! Jare mburuvicha guasu jei: —¡Toike!

⁶ Amán oike, jare mburuvicha guasu oparandu chupe: —¿Mburuvicha guasu ikɨ̈reɨ metei kuimbae omboeteuka yave, mbae pa ikavi oyeapo chupe? Jare Amán jei ipɨa pe: “¿Kia ye pa mburuvicha guasu omboeteukata chegüi?”

⁷ Jare Amán jei mburuvicha guasu pe: —Mburuvicha guasu ikɨ̈reɨ omboeteuka kuimbae vae pe,

⁸ toyereru mburuvicha guasu jemimonde etei, omonde vaerä jare kavayu mburuvicha guasu opo jese vae, jare mburuvicha guasu iñäka-regua,

⁹ jare toñemee jókuae temimonde jare kavayu, mburuvicha rerovia katu vae ipo pe; jare jae tomondeuka jókuae kuimbae nekɨ̈reɨ remboeteuka vae pe, jare togüɨraja kavayu re oka guasu rupi jare tomoërakuauka osapúkai reve jenonde: “¡Körai ko oyeapo kuimbae, mburuvicha guasu ikɨ̈reɨ omboeteuka vae!”

¹⁰ Jayave mburuvicha guasu jei Amán pe: —Eipɨɨ aramoete temimonde jare kavayu, jare eyapo jókuae rere rami Judáɨgua Mardoqueo pe, öke pe oguapɨ oï vae; jare agüɨye etei erova jókuae rere vae.

¹¹ Jayave Amán oipɨɨ temimonde omondeuka Mardoqueo pe, jare ombopo kavayu re güɨroata tëta guasu joka guasu rupi jare osapúkai jenonde: “¡Körai ko oyeapo kuimbae, mburuvicha guasu ikɨ̈reɨ omboeteuka vae!”

¹² Kuae jaɨkue rupi Mardoqueo ou ye mburuvicha guasu jo jöke pe, jare Amán jangai ojo jo kotɨ, ipɨatɨtɨ, jova oñomi reve.

¹³ Jare Amán omombeu jembireko Zeres pe jare opaete ivɨa-ïru reta pe, mbae oasa jae ndive vae. Jayave imborɨa yarakuaa vae reta jare jembireko Zeres jei chupe: —Kuae Mardoqueo jóvai remboɨpɨ neamɨri vae Judáɨgua reta iñemuña ko yave, ngaraa ndepuere remoamɨri.

¹⁴ Jare jökorai imiari ñogüɨnoi ramboeve, yogüeru eunuco reta jangai reve güɨraja vaerä Amán, Ester oyapo arete okaru reta vaerä vae pe.