ESTER 5 - Biblia Guarani Tumpa Iñee

Ester oike mburuvicha guasu oïa pe

¹ Jare mboapɨa ara pe Ester oyemonde kavi, jare oike mburuvicha guasu jo joka japɨpe pe, oyemboɨ mburuvicha guasu öke re katu oguapɨ oïa jóvai.

² Jare mburuvicha guasu oecha Ester oï oka pe yave, ipɨakatu omae jese; javoi mburuvicha guasu güɨropövee ipopoka oro pegua güɨnoi ipo pe vae Ester kotɨ, jayave Ester ou opoko jókuae popoka iyapɨ re.

³ Jare mburuvicha guasu oparandu: —¿Maratu pa reiko Ester? ¿Mbae pa reipota? Reiporu yave cheve mborookuaía mbɨte rupi, toñemee ndeve.

⁴ Jare Ester jei: —Mburuvicha guasu pe jaekavi yave; pekua Amán ndive tembíu kavi ayapo ndevea pe.

⁵ Jayave mburuvicha guasu jei: —Aramoete peeka Amán jare toyeapo Ester oipota rami. Jare mburuvicha guasu ou Amán ndive, Ester tembíu kavi oyapoa pe.

⁶ Okaru jare jou reta ramboeve vino, mburuvicha guasu jei Ester pe: —¡Eiporu nde reipota vae jare toñemee ndeve reiporu rupi, yepe tëi mbɨte rupi cheporookuaía!

⁷ Jare Ester jei: —Aipota jare aiporu vae, jae kuae:

⁸ Mburuvicha guasu ipɨakatu ko cheré yave, jare aiporu vae omee cheve chembopɨakatu vaerä yave, pɨareve eyu Amán ndive tembíu kavi ayapoa pe, jare pɨareve tamombeu ndeve, nde mburuvicha guasu reparandu cheve vae.

Amán oyapo kavi ɨvɨra oeterasauka vaerä jese Mardoqueo

⁹ Amán oyerovia yae oë okarúa güi; ërei oecha yave Mardoqueo mburuvicha guasu jöke pe mbaetɨ ave opüa ani omɨi yepe jenda güi, iyarasɨ yae,

¹⁰ ërei mbaetɨ omboyekuaa, ou jo pe, jare oenɨiuka ivɨa-ïru reta jare jembireko Zeres.

¹¹ Jare imiari chupe reta imbaeyekou tuicha yae vae re jare imichia jeta vae re, jare opaete mburuvicha guasu kërai ombotuicha vae re, jare omboeteuka mburuvicha guasu iyɨvɨrigua reta pe jare tembiokuai reta pe vae.

¹² Jare Amán jei ye: —Ester mbaetɨi kia oekauka okaru mburuvicha guasu ndive, jaeño che; jare pɨareve peguarä oparea ye oreve.

¹³ Ërei ngatu opaete kuae reta mbaetɨi chembopɨakatu, aecha ñavo Judáɨgua Mardoqueo oguapɨ oï mburuvicha guasu jöke pe.

¹⁴ Jayave jembireko Zeres jare opaete ivɨa-ïru reta jei chupe: —Eyatɨkauka ɨvɨra veintidó metro ɨvate vae, jare pɨareve eiporu mburuvicha guasu pe, Mardoqueo toyeeterasa jese, jökorai ndepɨakatuta reo rekaru mburuvicha guasu ndive. Amán pe ipöra jókuae yemongeta jare oyapouka jei reta chupe rami.