ESTER 4 - Biblia Guarani Tumpa Iñee

Judío reta ipɨatɨtɨ

¹ Mardoqueo oikuaa kavi ma oyeapogüe yave, omondoro jemimonde reta, jare oyemonde temimonde mbɨatɨtɨ pegua pe, tanimbu oñono iñäka re jare oë tëta guasu rupi ipɨatɨtɨ yae jare oyaeo jäse reve.

² Jare jökorai ou oväe mburuvicha guasu jöke jóvai; echa mbaetɨ jókuae nunga temimonde ndive kia ipuere oike mburuvicha guasu oïa pe.

³ Jare ɨvɨ oyemboyao vae ñavo rupi mburuvicha guasu omee mborookuai vae ojo oväea pe, Judáɨgua reta ipɨatɨtɨ yae, oyekuaku reta tembíu güi, oyaeo mbɨatɨtɨ ndive; jare jeta amogüe reta jemimonde mbɨatɨtɨ pegua ndive oke tanimbu re.

Ester oñemoe jëtaɨgua reta re

⁴ Jare yogüeru kuñatai reta jare eunuco reta oyeokuai mburuvicha guasu jembireko Ester pe vae, oikuaauka reta vaerä chupe mbae oasa oï vae. Jayave jae ipɨatɨtɨ yae; jare omondo temimonde omondeuka vaerä Mardoqueo pe, omboi vaerä jókuae temimonde jaimbe vae; ërei ngatu jae mbaetɨ oipota.

⁵ Jayave Ester oenɨi Hatac, metei eunuco reta güi mburuvicha guasu omee oyeokuai vaerä chupe vae, kuae oyókuai omondo Mardoqueo pɨri, oikuaa vaerä mbae ra oasa oï vae, jare maera ko jökorai oï vae.

⁶ Jayave Hatac ojo Mardoqueo pɨri mburuvicha guasu jo jöke jóvai oï oka guasu vae pe.

⁷ Jare Mardoqueo omombeu chupe opaete mbaembae oasa oï vae, jare oikuaauka vi Amán omeeta kuri korepoti mburuvicha guasu ikorepoti rɨru pe, Judáɨgua reta opa oñemokañɨtei vaerä vae regua.

⁸ Omee vi chupe mborookuai Susa pe oyekuatiagüe oï pɨpe vae, opa oñemokañɨtei reta vaerä vae regua, oechauka vaerä Ester pe; jare omondo vi oyókuai ojo vaerä mburuvicha guasu jóvai, oñemoe vaerä jëtara Judáɨgua reta re omoñera reve.

⁹ Hatac ou omombeu Ester pe Mardoqueo iñee.

¹⁰ Jayave Ester jei ye Hatac pe Mardoqueo pe omombeu vaerä:

¹¹ “Opaete oyeokuai mburuvicha guasu pe vae, jare opaete ɨvɨ oyemboyao yaoa rupigua reta oikuaa ko meteiño mborookuai oï vae. Kërai oipotagüe kuimbae ani kuña oike yave mburuvicha guasu joka pe, omae vaerä jese oenɨiukambae reve vae yave omanota ko. Jaeño mburuvicha guasu güɨropövee ikotɨ popoka oro pegua yave oasayepeta; jare che mbaetɨ etei chereenɨi aecha vaerä mburuvicha guasu treinta ara rupi ma.”

¹² Jare Ester iñee omombeu reta Mardoqueo pe.

¹³ Jayave Mardoqueo omondo ye jei Ester pe: —Agüɨye eyemongeta ndeño ete reasayepeta ïru judío reta güi, mburuvicha guasu jo pe reï güiño.

¹⁴ Echa kïriiño repɨta kuae ara rupi yave, Judáɨgua reta pe outa ko yemborɨ ïkotɨa güi; ërei ngatu nde jare nerëtara reta opata pekañɨtei. ¡Güɨramoi jaerä nde reyeparavo mburuvicha guasu jembirekorä!

¹⁵ Jare Ester omondo jei Mardoqueo pe:

¹⁶ “Ekua emboatɨ opaete Judáɨgua Susa pe ñogüɨnoi vae, jare peyekuaku tembíu güi cheré, agüɨye pekaru jare peɨu mboapɨ ara, ara rupi jare pɨ̈tu rupi; jökoraita vi che ayapo cherembiokuai kuñatai reta ndive, jare jaɨkue rupi aiketa mburuvicha guasu oïa pe, yepe tëi mbaetɨ mborookuai jökorai; cheyuka yave tacheyuka.”

¹⁷ Jayave Mardoqueo ojo oyapo Ester oyókuai rami.