ESTER 2 - Biblia Guarani Tumpa Iñee

Ester oyeparavo mburuvicha guasu jembirekorä

¹ Opa güire oasa kuaekuae reta, mburuvicha guasu Asuero iyarasɨ poi ma, jare imaendúa Vasti oyapogüe re jare mborookuai oñemoërakua ikotɨ vae re.

² Jayave iyɨvɨrigua imborɨa reta jei chupe: —Mburuvicha guasu, toyeeka ndeve kuñatai reta maepöra yae vae, ndeiño etei oasa kuimbae ndive vae.

³ Jare eñono kuimbae reta tëta reta ñavo güi, güɨraja vaerä kuñatai reta maepöra yae vae, ndeiño etei oasa kuimbae ndive vae, o kuña reta pegua pe, tëta Susa mburuvicha guasu jëta pe, eunuco Hegai oyangareko mburuvicha guasu ikuña reta re vae ipo pe, jare joko pe toñemee chupe reta oñemopöra vaerä.

⁴ Jare kuñatai re reipota remae vae, toiko nderembirekorä Vasti ipoepɨka pe. Kuae yemongeta ipöra mburuvicha guasu pe, jare oyapo jökorai.

⁵ Tëta Susa mburuvicha guasu oikoa pe oiko metei kuimbae Judáɨgua Mardoqueo jee vae, Jair taɨ; Jair jae ko Simei taɨ, Simei jae ko Cis taɨ, Cis jae ko Benjamín iñemuña pegua.

⁶ Jae yepe jeta vae Jerusalén güi oyererugüe reta iñemuña, Jeconías mburuvicha guasu Judá pegua ndive vae, jae ko Nabucodonosor mburuvicha guasu Babilonia pegua tembipɨɨrä güeruruka vae.

⁷ Mardoqueo ombokuakuaa tayɨrä itutɨ tayɨ Hadasa, jae ko Ester, echa tu jare ichɨ omano; jókuae kuñatai ikavi jare ipöra yae.

⁸ Jare oñemoërakua yave mburuvicha guasu iporookuai oyeapo vaerä vae, jeta kuñatai ndei omenda vae oyemboatɨ tëta Susa mburuvicha guasu jëta pe, o kuña reta pegua Hegai oyangarekoa pe yave, Ester oyereraja vi mburuvicha guasu jo pe, oï vaerä Hegai iporoangareko igüɨ pe.

⁹ Jare Hegai ipɨakatu omae Ester re, jáeramo ombotenonde voi omee chupe oñemopöra vaerä jare omongaru kavi vaerä, omee vi chupe chiu kuñatai ikavi vae reta ndei omenda vae mburuvicha guasu jo pegua reta; jare jae reta ndive güɨraja kuña reta jo kavi pe ikavi yaea pe.

¹⁰ Ester mbaetɨ etei oyemombeu Judáɨgua ko vae, jëtara ave mbaetɨ omombeu, echa Mardoqueo yepe jei chupe agüɨye vaerä oyemombeu.

¹¹ Jare Mardoqueo oguata ara ñavo o kuña reta pegua joka jóvai rupi, oikuaa vaerä kërai ra oï Ester, jare kërai ra oyangareko reta jese vae.

¹² Jare ara oväe ou vaerä mburuvicha guasu Asuero pɨri metei ñavo kuñatai ndei omenda vae yave, oasa güire doce yasɨ, mborookuai kuña reta kotɨ jei rami, echa jökorai oñemopöra yogüɨreko ou regua oväe ara; jae ko: Ova yasɨ mbae ikäti kavi vae mirra pegua pe, jare ova yasɨ ïru mbae ikäti kavi vae, jare kuña reta mbae oipichɨ iyé vae pe,

¹³ jayave ramo kuñatai ndei omenda vae ou mburuvicha guasu pɨri. Opaete jae oiporu vae oñemee chupe, oñemopöra kavi vaerä pɨpe, jókuae ndive oë vaerä o kuña reta pegua güi ou mburuvicha guasu jo pe.

¹⁴ Kaaru yave ou jare ndeimbove yave ojo ye ïru o kuña reta pegua pe, eunuco Saasgaz, mburuvicha guasu kuña güɨrekoiño vae reta iyangarekoa ipo pe; mbaetɨ yeta ma ou mburuvicha guasu pɨri, ërei mburuvicha guasu oipota yave oekauka yeta jee rupi.

¹⁵ Ester, Mardoqueo ombokuakuaa tayɨrä vae, itutɨ Abihail amɨri tayɨgüe, ara oväe ma ou vaerä mburuvicha guasu pɨri yave, mbaetɨ ye mbae oiporu, jaeño eunuco Hegai, kuña reta iyangarekoa jei chupe vae; jare opaete vae ipɨakatu omae Ester re.

¹⁶ Jare güɨraja reta Ester mburuvicha guasu Asuero jo pe payandepoa yasɨ pe, jae ko Tebet yasɨ; Asuero chiu año ma mburuvicha guasurä oiko yave.

¹⁷ Jare mburuvicha guasu oaɨu yae Ester opaete ïru kuña reta güi, ipɨakatu yae jese opaete ïru kuñatai reta ndeiño etei oasa kuimbae ndive vae güi; jare oñono iñäka re äka-regua mburuvicha pegua, jare oyapo jembirekorä, Vasti ipoepɨka pe.

¹⁸ Javoi mburuvicha guasu oyapo arete guasu Ester pe, jare oparea opaete mburuvicha reta jare iyɨvɨrigua reta pe, jare tëta reta pe oyekovara mburuvicha peguarä vae ombogüeyɨ chupe reta, jare omee jeta mbota ipɨakatu rupi.

Mardoqueo oendu yemomburu mburuvicha guasu kotɨ

¹⁹ Jare kuñatai reta ndeiño etei oasa kuimbae ndive vae oyererajauka ye mokoía ma ïru o kuña reta pegua pe yave, Mardoqueo oguapɨ oï mburuvicha guasu jo jöke pe.

²⁰ Jare Ester, Mardoqueo oyókuai rami mbaetɨ etei omombeu Judáɨgua ko vae ani jëtara ave; echa Ester oyapo Mardoqueo jeigüe, jese oiko yave oyapose rami.

²¹ Jókuae ara Mardoqueo oguapɨ oï mburuvicha guasu jöke pe yave, oendu Bigtán jare Teres, mókoi eunuco öke iyangarekoa reta pochɨ jare oeka kërai oyuka vaerä mburuvicha guasu Asuero.

²² Mardoqueo oikuaa yave kuae, omombeu Ester mburuvicha guasu jembireko pe, jare Ester omombeu yoapɨ ye mburuvicha guasu pe Mardoqueo omombeugüe.

²³ Jare oyeapo mbarandu kuae regua yave oñeväe añetete yepe; jáeramo mókoi reve jókuae eunuco reta, mburuvicha guasu oeterasauka ɨvɨra oyeatɨka vae re. Jare kuae mbaembae oyeapogüe oyekuatía oï tembikuatía pe, mburuvicha guasu regua oyekuatía oïa pe.