ESTER 1 - Biblia Guarani Tumpa Iñee

Mburuvicha guasu Asuero oyapo arete

¹ Mburuvicha guasu Asuero oporookuai ciento veintisiete ɨvɨ oyemboyao vae reta re, tëtaguasu India güive Etiopía pe.

² Iporookuaía güɨnoi Susa pe, kuae tëta güi mburuvicha guasu reta oporookuai.

³ Mboapɨa año ma oiko mburuvicharä yave oyapo arete okaru reta vaerä opaete mburuvicha reta, iyɨvɨrigua reta, sundaro ruvicha imbaepuere yae vae reta Persia pegua jare Media pegua, mburuvicha reta jare ɨvɨ oyemboyao vae reta juvicha reta,

⁴ oechauka vaerä iporookuaía iyemboetea, jare imbaepuere tuicha yae vae. Arete oupitɨ ova yasɨ.

⁵ Kuae omboapɨ yave mburuvicha guasu oyapo ye ïru arete chiu ara rupi mburuvicha guasu jo iko raɨ pegua oka pe, opaete Susa pegua reta pe, kuae tëta güi mburuvicha guasu reta oporookuai; oparea oikokatu vae reta pe jare paravete vae reta pe,

⁶ oka omopöra kavi oikëse tïi, jovɨ jare jovɨasɨ vae pe, tɨmasa lino pegua pɨ̈ta vae re oësɨvo moäka-vera korepoti pegua vae rupi jare omoata jɨsɨ ita mármol jee vae re; jare tenda reta oro pegua jare korepoti pegua katuai, joka re oñono vi ita ipöragüe: Pórfido jee vae, mármol jee vae, alabastro jee vae jare jacinto jee vae.

⁷ Jare jou reta vino kopa oro pegua pe, metei ñavo ambuaeyee yee ïru güi vae pe, jare jeta vino kavi mburuvicha guasu ipɨakavi rupi.

⁸ Jare jókuae kau mborookuai jei rami oyeapo: Mbaetɨ ñomoñera rupi kia okau vaerä; echa jökorai mburuvicha guasu omee mborookuai opaete jo pe omaangareko vae reta itenondegua reta pe; oyapo vaerä metei ñavo vae ipɨapotaa rupi.

⁹ Vasti mburuvicha guasu jembireko oyapo vi arete okaru reta vaerä oyeparea chupe vae reta jembireko reta peguarä, mburuvicha guasu Asuero jo pe.

¹⁰ Chiúa ara pe mburuvicha guasu osavaɨpo ma yave omondo Mehumán, Bizta, Harbona, Bigta, Abagta, Zetar jare Carcas, chiu eunuco reta oyeokuai mburuvicha guasu Asuero pe vae,

¹¹ güeru reta vaerä jóvai Vasti, mburuvicha guasu jembireko, iñäka regua jembipe vae ndive, oechauka vaerä imaepöra opaete vae pe jare mburuvicha reta pe; echa ipöra yae ko.

¹² Ërei ngatu Vasti mbaetɨ oipota ou mburuvicha guasu jóvai, jae oyókuai eunuco reta rupi rami; jare mburuvicha guasu iyarasɨ yae;

¹³ jayave mburuvicha guasu oparandu yarakuaa jare mborookuai re oikuaa katu vae reta pe, echa jökorai oyepokuaa mburuvicha guasu, oparandu mborookuai re oikuaa vae reta pe jare jupi vae oikuaa vae reta pe;

¹⁴ jare ñogüɨnoi päve jae ndive Carsena, Setar, Admata, Tarsis, Meres, Marsena, jare Memucán, chiu mburuvicha reta Persia pegua jare Media pegua, mburuvicha guasu ndive etei oguapɨ, mborookuaía pe vae reta.

¹⁵ Mburuvicha guasu oparandu chupe reta: —Mborookuai jei rami, ¿mbae pa ayapota Vasti pe? Echa mbaetɨ oyapo eunuco reta rupi ayókuai vae.

¹⁶ Jare Memucán jei mburuvicha guasu pe jare ïru mburuvicha reta jóvai: —Vasti mbaetɨ ko oyavɨ mburuvicha guasu kotɨño, opaete ïru mburuvicha reta kotɨ ko oyavɨ jare opaete tëta reta pegua mburuvicha guasu Asuero iporookuaía pegua kotɨ vi ko.

¹⁷ Echa kuae Vasti oyapogüe oenduta opaete kuña reta, jaema jae reta ngaraa ma iporomboete ime kotɨ, jei retata: “Mburuvicha guasu Asuero omondo tëi güeruruka jembireko Vasti, ërei jae mbaetɨ ou.”

¹⁸ Jare tembireko reta Persia jare Media pegua oendu yave Vasti oyapogüe, jei retata opaete mburuvicha guasu iyɨvɨrigua reta pe; jare oimeta jeta arasɨ jare oñogüɨröɨro vae.

¹⁹ Jáeramo mburuvicha guasu, jaekavi ndeve yave, toë mborookuai ndembaepuere güi, jare toyekuatía mborookuai Persia jare Media pegua ipɨte pe, agüɨye vaerä oyemboai: “Vasti agüɨye ye mo tou mburuvicha guasu Asuero jóvai.” Jare mburuvicha guasu toñono ipoepɨka pe ïru kuña jeko kavi yae chugüi vae.

²⁰ Jare mburuvicha guasu mborookuai omee vae toyeendu opaete iporookuaía pe yepe tëi tuicha yae, jare opaete kuña reta tomboete ime ñavo, oikokatu vae reta jare paravete vae reta vi.

²¹ Ipöra kuae ñee mburuvicha guasu pe jare iyɨvɨrigua mburuvicha reta pe. Jare mburuvicha guasu oyapo Memucán jei rami;

²² omondo tupapire opaete tëta reta rupi. Tëta ñavo jembikuatía oï rami jare tëta ñavo iñee ae pe, jei reve: “Opaete kuimbae toyemboeteuka jo pe, jare kuae toñemoërakua jëta pe iñee ae pe.”