ESDRAS 6 - Biblia Guarani Tumpa Iñee

¹ Jayave mburuvicha guasu Darío omee mborookuai oyeeka vaerä tupapire reta oñeñovatúa pe, mbae jepɨ vae reta oñeñovatúa pe Babilonia pe;

² jare oñeväe chupe tëta guasu Acmeta pe mburuvicha guasu jo ɨvɨ Media pe oï vae pe, metei tembikuatía pe oyekuatía oï pɨpe körai yemomaendúa:

³ “Mburuvicha guasu Ciro metei año ma oiko yave, omee mborookuai oñeñono ye vaerä tupao iguapɨka, oñemopüa ye vaerä Tumpa jo Jerusalén pe, joko pe oñemee vaerä mɨmba oyeyukagüe, jare ɨvategüe güɨnoi vaerä veintisiete metro jare ipɨgüe veintisiete metro.

⁴ Mboapɨ ñesɨro ita tuichagüe oñeñono vaerä, jare metei ñesɨro ɨvɨra ipɨau vae. Jare opaete tupao guasu re oyeporu vae mburuvicha guasu ikorepoti oñeñovatúa güi toyemboepɨ.

⁵ Jaeramiño vi Tumpa jo pegua tembiporu reta oro pegua jare korepoti pegua Nabucodonosor opa güeru Jerusalén güi Babilonia pe vae, toyereraja ye tupao guasu pe Jerusalén pe, toñeñono ye Tumpa jo pe.”

⁶ Jayave mburuvicha guasu Darío jei tëta ruvicha Tatnai pe, Setar-boznai pe jare ïru reta ɨ̈aka Éufrates jovaicho pe yogüɨreko vae reta pe: “Pesɨrɨ Jerusalén güi

⁷ jare pemaeño toñemopüa ye jókuae tupao, judío reta juvicha jare itenondegua reta tomopüa Tumpa jo jenda pe aeño.

⁸ Che amee kuae mborookuai peve pemborɨ vaerä judío reta itenondegua reta, Tumpa jo oñemopüa ye vaerä: Jókuae ɨ̈aka jovaicho pe oyekovara mburuvicha peguarä vae güi, toñemee jókuae kuimbae reta pe oatambae reve agüɨye vaerä opɨta mbaravɨkɨ.

⁹ Jare opaete mbae oata vae, sacerdote reta Jerusalén pe ñogüɨnoi vae oiporu rupi, toñemee chupe reta pemboavaimbae reve, toro taɨrusu vae, vecha kuimbae taɨrusu vae, mɨmba oyeyukagüe opaetei oyeapɨ Tumpa ara pe oï vae peguarä vae, trigo, yukɨ, vino jare olivo iasaite,

¹⁰ omee reta vaerä mɨmba oyeyukagüe, Tumpa ara pe oï omboyerovia vaerä, jare oyerure reta vaerä mburuvicha guasu re jare taɨ reta re.

¹¹ Poyókuai vi kia nunga vae mbaetɨ oyapo kuae mborookuai yave, toyeekɨ jo güi metei ɨvɨra, toyeatɨka jare toyeeterasa jese, jare jo topa toyembosururu.

¹² Jare Tumpa oiparavo oñono vaerä jee joko pe vae, tomboai opaete mburuvicha guasu reta ani tëtaguasu reta oipota oipoepɨ ani omboai Tumpa jo Jerusalén pegua vae. Che Darío amee kuae mborookuai, jare toyeapo jarembae voi.”

¹³ Jayave mburuvicha Tatnai ɨ̈aka Éufrates jovaicho pegua, Setar-boznai jare iñeïru reta, oyapo jare omee reta oatambae reve, mburuvicha guasu Darío omee mborookuai rami.

¹⁴ Jökorai judío itenondegua reta opa omboapɨ mbaravɨkɨ jarembae pegua, ñeemombeúa Hageo jare ñeemombeúa Zacarías, Iddo taɨ omoërakua rami. Omopüa reta jare opa oyapo reta Israel iTumpa omee mborookuai vae rupi, jare mburuvicha guasu reta Ciro jare Darío Persia pegua omee vae rupi, jare Artajerjes.

¹⁵ Kuae tupao opa oyeapo mboapɨa ara yasɨ Adar pe, ovaa año ma Darío oiko mburuvicha guasuä yave.

¹⁶ Jayave Israel iñemuña sacerdote reta, levita reta, jare opaete tembipɨɨ güi oyerova ye vae, oyerovia katu reve oñono tee reta omboarete reve Tumpa jo.

¹⁷ Jare Tumpa jo oñeñono tee omboarete vae peguarä omee reta cien toro taɨrusu vae, dosciento vecha kuimbae jare cuatrociento vecha kuimbae taɨrusu vae; jare Israel iñemuña reta pe Tumpa iñɨ̈ro vaerä iyoa re, doce kavara kuimbae, Israel taɨ reta iñemuña ñavo re.

¹⁸ Jare oñono reta sacerdote reta iparavɨkɨ ae rupi, jare levita reta iparavɨkɨ ae rupi, oyeokuai reta vaerä Tumpa pe, Jerusalén pe, Moisés jembikuatía pe oï rami.

¹⁹ Jaeramiño vi oyapo reta arete Pascua catorcea ara pe, tenondegua yasɨ pe.

²⁰ Echa sacerdote reta jare levita reta opa oyetɨo Tumpa jóvai metei rami; opaete vae oyetɨo kavi ñogüɨnoi, jare oyuka reta mɨmba pascua peguarä vae opaete oyerova ye vae reta re, jare jëtara sacerdote reta re, jare iyé ae reta.

²¹ Jou reta tembíu Pascua pegua Israel iñemuña reta tembipɨɨ güi oyerova ye vae, opaete jókuae oyembosɨrɨ kuimbae ɨvɨ ipo jeko kavimbae reta güi vae ndive, omboete reta vaerä yandeYa, Israel iTumpa.

²² Jare oyapo reta yerovia katu ndive arete mbaemboete pegua mbɨyape oyembovumbae pegua chiu ara, yandeYa omee ye oyerovia reta vaerä jeko pegua, jare oipoepɨ mburuvicha guasu Asiria pegua ipɨa ikotɨ reta, omomɨ̈rata vaerä omopüa Tumpa jo, Israel iTumpa.