ESDRAS 5 - Biblia Guarani Tumpa Iñee

¹ Ñeemombeúa Hageo jare ñeemombeúa Zacarías, Iddo taɨ omboeta reta judío reta Judá pegua pe jare Jerusalén pegua pe, Israel iTumpa jee re, jae reta ndive oime oï vae.

² Jayave Zorobabel, Salatiel taɨ jare Jesúa, Josadac taɨ omboɨpɨ reta ye omopüa Tumpa jo Jerusalén pe, jare Tumpa iñeemombeúa reta ñogüɨnoi jae reta ndive omborɨ reta vaerä.

³ Jókuae ara rupi yogüeru ípɨri reta tëta ruvicha Tatnai ɨ̈aka Éufrates jovaicho pegua, jare Setar-boznai jare iñeïru reta jei reta körai: “¿Kia pa jei peve pemopüa ye vaerä kuae tupao guasu jare ikësea reta?”

⁴ Oparandu reta vi chupe reta: “¿Mbae pa jee jókuae kuimbae reta omopüa ye kuae tupao guasu ñogüɨnoi vae?”

⁵ Ërei yandeYa oï judío reta itenondegua reta ndive, jökorai tovaicho reta mbaetɨ omombɨtauka reta mbaravɨkɨ, oikuaauka regua kuae re Darío pe, jare jae ombou ye regua oikuaauka chupe reta tupapire rupi.

⁶ Jae kuae tupapire oikuatía reta omondo mburuvicha guasu Darío pe vae ïru, tëta ruvicha Tatnai, Setar-boznai jare iñeïru reta ɨ̈aka Éufrates jovaicho pe yogüɨreko vae reta.

⁷ Jókuae tupapire pe jei körai: “Mburuvicha guasu Darío, mbɨakatu toï nde ndive,

⁸ mburuvicha guasu roikuaauka kuae re ndeve rojo ɨvɨ Judea pe Tumpa tuicha yae vae jo oïa pe, jókuae o oñemopüa oï ita tuichagüe vae pe; ɨvɨra reta opa ma oñeñono oguambɨ re, jare jarembae yae oyapo ñogüɨnoi kuae mbaravɨkɨ.

⁹ Jare roparandu tenondegua reta pe, roe chupe reta körai: ‘¿Kia pa jei peve pemopüa ye vaerä kuae tupao guasu jare tëta guasu ikësea reta?’

¹⁰ Jare roparandu vi chupe reta jee reta re roikuaauka vaerä ndeve, jókuae kuimbae reta oporomombaravɨkɨ ñogüɨnoi vae jee reta.

¹¹ Jare jei reta oreve körai: ‘Ore reta ko jae Tumpa ara pe jare ɨvɨ pe oï vae jembiokuai, jare romopüa ye roï kuae tupao guasu arakae oyeapo vae; mburuvicha guasu Israel pegua omboɨpɨ jare opa oyapo vae.

¹² Ërei jókuae jaɨkue rupi oreñemuñagüe reta omboarasɨuka Tumpa ara pe oï vae, jare jae omee Nabucodonosor mburuvicha guasu Babilonia pegua ipo pe, jae ko Caldeaɨgua, jókuae mburuvicha guasu opa omboai kuae tupao guasu, jare tëta pegua reta opa güɨraja tembipɨɨrä Babilonia pe.

¹³ Ërei tenondegua año Ciro omboɨpɨ oï mburuvicha guasurä Babiloniaɨgua reta re yave, jae etei omee mborookuai kuae Tumpa jo oñemopüa ye vaerä.’

¹⁴ Jaeramiño vi tembiporu reta korepoti pegua jare oro pegua Nabucodonosor opa güɨnoe güɨraja tupao guasu Jerusalén pegua güi oñono itupao guasu Babilonia pegua pe vae, mburuvicha guasu Ciro opa güɨnoeuka jare omee Sesbasar ipo pe, jae oñono mburuvicha tëta re oyangareko vaerä vae.

¹⁵ Jare jei chupe: ‘Eipɨɨ kuae tembiporu reta, jare eraja ye tupao guasu Jerusalén pegua pe, jare toñemopüa ye Tumpa jo jenda ae pe kavi.’

¹⁶ Jayave Sesbasar ou jare oñono Tumpa jo iguapɨka reta kuae Jerusalén pe. Jayave güive oñemopüa oiko, ërei ndeiño opa oyeapo añave.

¹⁷ Añave, nde mburuvicha guasu, jaekavi ndeve yave toyeeka ndetupapire reta oñeñovatúa pe, jókuae Babilonia pe oï vae pe, añete ra Ciro omee mborookuai oñemopüa ye vaerä Tumpa jo Jerusalén pe, jare eikuaauka ye oreve ndeyemongeta kuae re oreruvicha guasu.”