Efesios 6 - Biblia Guarani Tumpa Iñee

¹ Kunumi reta jare kuñatai reta toyapo tu jare ichɨ jei vae, yandeYa re güɨrovia ramo, echa kuae jupi ko.

² Emboete nderu jare ndesɨ, echa kuae ko jae mborookuai tenondegua morogüɨrökuavee ndive vae,

³ reiko kavi vaerä, jare reikopuku vaerä ɨvɨ pe.

⁴ Jare pe tu reta agüɨye pemboarasɨuka pemichia reta, jaeño pembokuakuaa pemboe kavi reve yandeYa re.

⁵ Tembiokuai reta, peyapo peya reta jei vae pemboete reve jare peipoɨu reve, jupi reve kavi, Cristo pe peyeokuai rami.

⁶ Agüɨye peyeokuai kavi peya reta pe jae omae oï yaveño, jare pemboyerovia vaeräño. Peyeokuai chupe, Cristo pe peyeokuai rami, pepɨakatu reve peyapo Tumpa jemimbota.

⁷ Peyeokuai pekɨ̈reɨ ngatu reve kavi, yandeYa pe rami, mbaetɨ kuimbae reta pe rami.

⁸ Peikuaa kuae: Oyeokuai vae ani oyeokuaimbae vae oyapo mbae ikavi vae yave, yandeYa omeeta chupe mbae ikavi vae oyapo rupi.

⁹ Jare pe mbaravɨkɨ iya reta peyapo jupi vae perembiokuai reta pe, agüɨye “ronupata” pere chupe reta. Echa peikuaa jae reta iYa jare peYa ara pe oï vae, mbaetɨ ko oporomboyoavɨ.

Tembiporu reta ñeraro pegua Tumpa omee vae

¹⁰ Jare añave cherɨvɨ reta, peñemomɨ̈rata yandeYa re, imbaepuere yae rupi.

¹¹ Peyemonde tembiporu ñeraro pegua Tumpa omee vae pe, pepuere vaerä täta peï opaete mbae ikavimbae vae aña guasu oipota oyapo peve vae güi.

¹² Echa mbaetɨ ñañeraro ñaï ɨvɨ pegua reta ndive. Ñañeraro ko ñaï mburuvicha reta, imbaepuere vae reta, tenondegua ete mburuvicha pɨtumimbi pegua reta ndive, jeta vae ara rupigua reta ikavimbae pegua reta ndive.

¹³ Jáeramo, peiporu opaete tembiporu ñeraro pegua Tumpa omee vae, pepuere vaerä peropɨa ikavimbae iara pe, jare pemoamɨri güire pepɨ̈rata vaerä pepɨta.

¹⁴ Jáeramo peñemomɨ̈rata, peyeumbɨkua añetegüe pe, peyemonde mbaejupi pe, temimonde ñeraro pegua pe rami,

¹⁵ jare pemonde pepɨapaa jae ko peïndaivi peraja vaerä ñee ikavi vae mbɨakatu pegua.

¹⁶ Jare opaete kuaekuae güi, peipɨɨ yeopiaka jae ko mborogüɨrovia, agüɨye vaerä aña imii raɨ jendɨ vae oa peré.

¹⁷ Peñono peäka re äka-ɨru jiero pegua yemboasa pegua, jare peiporu Tumpa iñee, jae ko kɨsepuku Espíritu pegua.

¹⁸ Peyerure avei, pemoñera Tumpa Espíritu rupi. Peyerure avei agüɨye vaerä pekuérai. Jekuaeño peyerure Tumpa pe opaete oporogüɨrovia vae reta re;

¹⁹ jare cheré vi, Tumpa omee vaerä cheve ñee, akɨɨyembae reve aikuaauka vaerä yaikuaa rapembae vae ñee ikavi regua.

²⁰ Echa Tumpa chembou jekovia pe amoërakua vaerä; kuae jeko pegua tembipɨɨ aï. Peyerure cheré, amoërakua vaerä akɨɨyembae reve.

Tamaraeme reta

²¹ Tíquico omombeuta peve opaete mbaembae, peikuaa vaerä cheregua jare ayapo aï vae regua. Tíquico ko jae yanderɨvɨ aaɨu vae. Jae oyeokuai kavi yandeYa pe.

²² Jáeramo amondo pépɨri, peikuaa vaerä oreregua, jare jae pembopɨakatu vaerä.

²³ Cherɨvɨ reta, yandeRu Tumpa jare yandeYa Jesucristo ipɨakatu, iporoaɨu jare mborogüɨrovia toï pe ndive.

²⁴ Tumpa ipɨakavi toï opaete yandeYa Jesucristo oaɨu yae añetete pegua vae reta ndive. ¡Amén!