Efesios 5 - Biblia Guarani Tumpa Iñee

Peiko tembipe pe yogüɨreko vae reta rami

¹ Peiko Tumpa oiko rami. Echa pe ko jae taɨ reta oaɨu yae vae.

² Peyoaɨu, Cristo yanderaɨu rami. Echa jae oñemee omano vaerä yanderé, mɨmba oyeyukagüe ipiche katu vae Tumpa pe oñemee rami.

³ Ërei agüɨye etei peyapo aguasa jare opaete teko pɨ̈chɨi, ani peipotarai mbae ambuae. Echa pe reta Tumpa peñono tee vae mbaetɨ jaekavi peyapo vaerä kuae;

⁴ agüɨye pemiari ñee mbokere, ñee arakuaambae pegua, ñee pɨ̈chɨi, mbaetɨ jaekavi peyapo vaerä vae; ërei kuae pere vaerägüe pemee yasoropai Tumpa pe.

⁵ Echa pe reta peikuaa ko metei ave aguasa oyapo vae, ani ikɨa Tumpa jóvai vae, ani imbae potarai vae (kuae ko itumpa-raanga pota vae reta) ngaraa yogüɨreko Cristo jare Tumpa iporookuaía pe.

⁶ Agüɨye kia ave tapembotavɨ ñee osirivembae pe, echa kuae jeko pegua ko Tumpa iyarasɨ ou iñeereendumbae reta re.

⁷ Jáeramo, agüɨye peyea jókuae nunga reta ndive.

⁸ Echa tenonde yave peikose pɨtumimbi pe rami. Ërei añave peiko tembipe rami yandeYa re. Peiko tembipe pe yogüɨreko vae reta rami.

⁹ Echa Espíritu omee yandeve vae ko mbɨakavi, mbaejupi jare añete vae.

¹⁰ Jekuaeño peipota peikuaa yandeYa ombopɨakatu vae.

¹¹ Agüɨye etei peñemoïru pɨtumimbi pe yogüɨreko vae reta jembiapo pe, ërei pemboete ikavimbae ko jókuae reta jembiapo vae.

¹² Echa ñemomarai ko ñanemiari vaerä ave jókuae oyapo vɨari reta vae re.

¹³ Ërei tembipe oï yave, omboyekuaa kavi opaete mbaembae. Echa tembipe ko omboyekuaa kavi opaete mbae vae.

¹⁴ Jáeramo Tumpa jei: “Esareko mo, nde reke vae. Epüa ye omanogüe vae reta ipɨte güi, jare Cristo ndemboesapeta.”

¹⁵ Jáeramo, peñemoäta ngatu peiko kavi vaerä, agüɨye peiko iyarakuaambae vae reta rami. Peiko iyarakuaa vae reta rami.

¹⁶ Peiporu kavi ara reta, echa ara reta mbaetɨ ko ikavi.

¹⁷ Jáeramo, agüɨye peiko pearakuaambae, ërei peikuaa kavi yandeYa jemimbota.

¹⁸ Agüɨye peyembosavaɨpo, echa jókuae reta oyapo jeta mbae ikavimbae vae. Ërei pemaeño Espíritu Santo re omotɨnɨe vaerä pepɨa.

¹⁹ Pemiari reve oyoupe salmo reta rupi, tairari reta Tumpa pegua; pepɨa pe pemboete jare petairari yandeYa pe.

²⁰ Pemee avei yasoropai opaete mbae re yandeRu Tumpa pe, yandeYa Jesucristo jee re.

Peiko kavi oyoupi

²¹ Peiko kavi oyoupi, peipoɨu reve Tumpa güi.

²² Kuña reta toiko ime jeia re, yandeYa re rami;

²³ echa kuimbae ko jae kuña iñäka, Cristo oporogüɨrovia vae reta iñäka rami. Echa oporogüɨrovia vae reta jae ko Cristo jete jare Cristo ko jae imboasaa.

²⁴ Oporogüɨrovia vae reta yogüɨreko Cristo jeia re rami, jökorai vi kuña reta toiko ime jeia re opaete pe.

²⁵ Kuimbae reta toaɨu jembireko, Cristo oaɨu oporogüɨrovia vae reta rami, echa jae oñemee omano vaerä jese reta,

²⁶ oñono tee vaerä iyeupeguarä, jare oyoe vaerä iñee rupi, ɨ pe mbae yayoe vae rami;

²⁷ jökorai oporogüɨrovia vae reta imboetea yae reve güeru vaerä jóvai ikɨambae reve ani jova oñɨñɨimbae reve ani jókuae rami vae, jaeño ikɨambae etei, ikavi yae reve.

²⁸ Jökoraiño vi kuimbae reta toaɨu jembireko, jae reta oyeaɨu rami. Jembireko oaɨu vae, jae etei oyeaɨu.

²⁹ Echa mbaetɨi ko kia omotareɨ jete vae, jaeño omongaru jare oyangareko jese. Jökorai ko Cristo oyangareko oporogüɨrovia vae reta re,

³⁰ echa yande ko jae Cristo jete, isoo jare ikägüe reta.

³¹ “Jáeramo, kuimbae toeya tu jare ichɨ, toyogüɨreko jembireko ndive, jare toyogüɨreko metei ramiño.”

³² Tuicha yae ko kuae yaikuaa rapembae vae. Chemiari ko aï peve Cristo re jare oporogüɨrovia vae reta re.

³³ Ërei metei vae ñavo toaɨu jembireko, jae oyeaɨu rami. Jare kuña tomboete ime.