Efesios 3 - Biblia Guarani Tumpa Iñee

Pablo iparavɨkɨ judiombae vae reta ipɨte pe

¹ Kuae jeko pegua che Pablo, Cristo Jesús jembipɨɨ, pe judiombae vae reta re;

² peikuaa ma ko aipo kërai Tumpa ipɨakavi omee cheve aparavɨkɨ vae pe ndive.

³ Echa Tumpa oechauka cheve vae rupi oikuaauka yaikuaa rapembae vae, tenonde ma aikuatía peve rami.

⁴ Pemongeta yave, peikuaa kavita che aikuaa kavi ko jókuae Cristo regua yaikuaa rapembae vae,

⁵ jókuae tenonde yave rupi mbaetɨ kuimbae reta oikuaa vae, ërei añave Tumpa oikuaauka temimondo oñono tee iyeupeguarä vae reta pe jare iñeemombeúa reta pe Espíritu rupi.

⁶ Kërai judiombae reta güɨnoi vi judío reta ndive imbaerä vae, jare meteiño jete, jare mókoi reve güɨnoi retata Tumpa güɨrökuavee Cristo Jesús re, ñee ikavi vae rupi vae.

⁷ Jókuae re, Tumpa cheapo jókuae mbaravɨkɨ peguarä, jae ipɨakavi rupi jare imbaepuere rupi.

⁸ Yepe tëi che ko michi yae opaete oporogüɨrovia vae michi yae vae güi, ërei oñemee cheve Tumpa ipɨakavi, amoërakua vaerä judiombae reta pe ñee ikavi vae, Cristo imbaeyekou yaipapa rapembae vae re,

⁹ jare aikuaauka vaerä opaete pe oyekuaambae iyɨpɨ güive Tumpa re vae, jae ko opaete mbaembae iyapoa.

¹⁰ Tumpa iyarakuaa tuichagüe yae vae, oyekuaa vaerä oporogüɨrovia vae reta rupi, mburuvicha reta pe jare imbaepuere vae ara rupigua reta pe.

¹¹ Echa jökorai Tumpa oyapo iyemongeta opambae vae yandeYa Jesucristo rupi,

¹² jese yandepuere yaike Tumpa oïa pe yandeporogüɨrovia rupi.

¹³ Jáeramo agüɨye peyembopɨtu, aiporara peré vae re. Jaeño pemboete Tumpa kuae re.

Cristo iporoaɨu

¹⁴ Kuae jeko pegua, che ayetavatɨka yandeYa Jesucristo Tu jóvai.

¹⁵ Opaete tëtara ara pegua reta jare ɨvɨ pegua reta jese oikove,

¹⁶ omee vaerä peve iyemboetea tuicha yae rupi pepɨ̈rata peporogüɨrovia pe iEspíritu rupi,

¹⁷ Cristo toiko pepɨa pe peporogüɨrovia rupi, jökorai tätagüe jare pepɨ̈rata vaerä mboroaɨu pe,

¹⁸ peikuaa kavi yae vaerä opaete oporogüɨrovia reta ndive, tuichagüe yae ko Cristo iporoaɨu vae,

¹⁹ jökorai peikuaa Cristo iporoaɨu oyapɨraa ko opaete arakuaa, petɨnɨe vaerä Tumpa pe.

²⁰ Jare añave toyemboete Tumpa, imbaepuere yae oyapo vaerä jeta yae opaete mbaembae yaiporu vae ani yaikuaa vae güi, imbaepuere yandeɨvɨte pe oparavɨkɨ vae rupi.

²¹ Toyemboete Tumpa opaete oporogüɨrovia vae reta rupi Cristo Jesús re, jekuaekuae avei rupi. ¡Amén!