Efesios 2 - Biblia Guarani Tumpa Iñee

Yandemboasa Tumpa ipɨakavi rupi

¹ Tumpa omee peve tekove, pemano peiko yave ikavimbae pe jare mbaeyoa pe.

² Echa jókuae pe ko peyapo yepi tenonde rupi, pemomoe teko kuae ɨvɨ pegua, peyapo jókuae mburuvicha yaechambae vae iñeereendumbae vae re oparavɨkɨ oï vae jemimbota.

³ Tenonde yave opaete yande vi yaiko yandesoo jemimbota reño jae reta rami. Yayapo yepi yandesoo jemimbota reta jare yandeyemongeta retaño. Jáeramo Tumpa iyarasɨ igüɨ pe yaiko, opaete ïru reta rami.

⁴ Ërei Tumpa yandeparareko yae, jare yanderaɨu yae ramo,

⁵ yepe tëi tenonde yave ñamano ñaï mbaeyoa pe, ërei omee yandeve tekove Cristo re (Tumpa ipɨakavi rupi ayemboasauka),

⁶ Cristo ndive yandemoingove ye, jare yandemboguapɨ ara pe jae ndive.

⁷ Kuae oyapo, oechauka vaerä ara reta taɨkuegua pe kërai tuicha yae ko ipɨakavi, jare ipɨakavi yandeve Cristo Jesús rupi.

⁸ Echa Tumpa ipɨakavi rupi ko pemboasa, peporogüɨrovia rupi; kuae mbaetɨ ko peyeugüi aeño, mbota ko Tumpa güi;

⁹ tembiapo rupiä ko, agüɨye vaerä kia ave oyemboete iyé.

¹⁰ Echa Tumpa jembiapo ko yande, yandeapo Cristo Jesús re, yayapo vaerä mbae ikavi vae. Kuae ko tenonde güive voi ma Tumpa omokätɨro yayapo vaerä.

Yembopɨakatu Tumpa ndive

¹¹ Jáeramo, pemaendúa pe judiombae reta, tenonde rupi jete pe oyembocircuncida vae reta jeise peve “oyembocircuncidambae”,

¹² jókuae ara rupi peikose Cristombae reve, peiko tee Israel pegua reta güi, jare Tumpa iporogüɨrökuavee päve güi, mbaetɨ mbae penoi peäro vaerä jare peTumpambae kuae ɨvɨ pe.

¹³ Ërei añave Cristo Jesús re, pe reta mombɨrɨ peikose Tumpa güi vae, peyemboyauka jese Cristo Jesús jugüɨ rupi.

¹⁴ Cristo ko jae mbɨakatu güeru yandeve vae. Jae oyapo metei ramiño judío reta jare judiombae vae reta ndive. Omboai ñomotareɨ judío reta jare judiombae vae reta omboyao oyougüi vae,

¹⁵ omboai jete pe ñomotareɨ reta, omboai mborookuai jei vae reta, judío reta jare judiombae vae reta güi oyapo metei tëta ipɨau vae imbaerä; jökorai omee mbɨakatu chupe reta,

¹⁶ imano rupi kurusu re ombopɨakatu Tumpa ndive mókoi reve metei ramiño; jökorai omboai ñomotareɨ reta.

¹⁷ Jayave ou omoërakua peve ñee ikavi mbɨakatu pegua, pe mombɨrɨ peiko yepi vae pe jare köiño roiko vae pe.

¹⁸ Echa Cristo rupi mókoi reve yandepuere yaya yandeRu re Espíritu Santo rupi.

¹⁹ Jáeramo pe reta ketɨgua ramiä ma ko ani oguataiño vae ramiä ma ko, oporogüɨrovia vae reta iñeïru ma ko, Tumpa jëtara reta,

²⁰ pe reta ko o oñemopüa vae rami, jókuae temimondo reta jare ñeemombeúa reta ko ita o oñemopüa jese vae rami. Ërei Jesucristo etei ko jae ita o ekina iguapɨka.

²¹ Jese ko o okuakuaa ojo oiko, oyeapo vaerä metei tupao oñeñono tee vae yandeYa pe.

²² Cristo rupi pe reta vi peyeapo metei rami, peiko vaerä Tumpa oikoarä, Espíritu rupi.