Efesios 1 - Biblia Guarani Tumpa Iñee

Tamaraeme

¹ Che Pablo, Jesucristo jemimondo Tumpa jemimbota rupi vae, aikuatía opaete peporogüɨrovia vae Cristo Jesús re Efeso pe peiko vae pe.

² YandeRu Tumpa jare yandeYa Jesucristo ipɨakavi jare ipɨakatu toï pe ndive.

Tumpa jeta iporerekua yanderé Cristo rupi

³ Toyemboete Tumpa, yandeYa Jesucristo Tu. Jae iporerekua yanderé opaete mborerekua ara pegua pe, Cristo re,

⁴ jae yandeparavo jese ndei ɨvɨ oyeapo mbove, ñañeñono tee yaiko vaerä ikɨambae jae jóvai;

⁵ iporoaɨu rupi iyɨpɨ güive voi yandeparavo yandeapo vaerä taɨ retarä Jesucristo rupi, jae ipɨa jemimbota rupi,

⁶ ipɨakavi yae oyemboete vaerä, jókuae rupi yandeapo taɨrä, Taɨ oaɨu vae rupi;

⁷ jugüɨ rupi yandereepɨ ma, Tumpa iñɨ̈ro vaerä yandeve yandeyoa reta re, ipɨakavi yae rupi,

⁸ omee jeta yae yandeve ipɨakavi, iyarakuaa katu yae rupi;

⁹ jare oikuaauka yandeve jemimbota yaikuaa rapembae vae, jae ipɨakavi rupi. Jae etei oyemongeta oyapo vaerä vae.

¹⁰ Jae ko, omboatɨ vaerä opaete mbaembae oyeapogüe Cristo ipo pe, opaete mbaembae ara pe oï vae, jare opaete ɨvɨ pe oï vae. Kuae ko oyeapota ara oväe yave.

¹¹ Iyɨpɨ güive voi yandeparavo ñanoi vaerä jae omeeta yandembaerä vae, jae oyapo opaete mbaembae ipɨa jemimbota rupi vae.

¹² Oyemboeteuka vaerä ore rupi, ore räri Cristo re rogüɨrovia vae reta rupi.

¹³ Jare pe reta vi perovia Cristo re, peendu yave ñee añete vae, ñee ikavi vae yemboasa pegua yave, Tumpa pemokañɨmaa Espíritu Santo jae güɨrökuavee vae pe.

¹⁴ Jae ko oikuaauka Tumpa omeeta yandeve vae iyarä ko yande vae, yandereraja ete regua, oyemboeteuka vaerä.

Pablo oyerure oporogüɨrovia vae reta pe oñemee vaerä arakuaa

¹⁵ Jáeramo che aikuaa perovia yandeYa Jesús re yave, jare kërai peaɨu opaete oporogüɨrovia vae reta,

¹⁶ mbaetɨ chekuérai amee yasoropai peré Tumpa pe, jekuaeñoi chemaendúa peré, cheyerure rupi,

¹⁷ yandeYa Jesucristo iTumpa, Tu imboetea yae vae, tomee peve arakuaa katu jare toikuaauka peve mbaembae, peikuaa kavi vaerä Tumpa regua.

¹⁸ Tumpa toesape pearakuaa, peikuaa kavi vaerä mbaerä ra pereenɨi vae jare kërai penoi vi ko mborerekua tuichagüe oporogüɨrovia vae reta ndive vae,

¹⁹ jare kërai tuichagüe yae ko imbaepuere yandekotɨ vae, kërai jókuae imbaepuere oparavɨkɨ yanderé vae.

²⁰ Jókuae imbaepuere ko omoingove ye Cristo omanogüe reta ipɨte güi, jare omboguapɨ iyakatu kotɨ ara pe,

²¹ güɨnoi vaerä mbaepuere opaete mburuvicha reta ara pegua, ɨvɨ pegua jare oipotagüe mbaepuere güɨnoi vae re, jare opaete tuichagüe yae vae reta, añave pegua reta jare oikota vae reta re;

²² jare oñono Cristo ipo igüɨ pe opaete mbaembae. Omee vi chupe oiko vaerä oporogüɨrovia vae reta iñäkarä,

²³ echa oporogüɨrovia vae reta ko Cristo jete. Jae omotɨnɨe oporogüɨrovia vae reta, jare jae omotɨnɨe opaete mbaembae.