ECLESIASTÉS 7 - Biblia Guarani Tumpa Iñee

Arakuaa jare arakuaambae

¹ Ñanerërakua kavi vae ikavi yae ko, jókuae mbae ikäti kavi yae vae güi. Ñamano vae ikavi yae ko, jókuae ara yaa ramo vae güi.

² Manoa pe yaja vae ikavi yae ko, aretea pe yaja vae güi; echa mano jae ko opaete vae reta iyapɨ, jare oikoveño oï vae ipuere oyemongeta avei jese.

³ Yandepɨatɨtɨ vae jaekaviño ko yapuka vae güi, echa yandepɨatɨtɨ vae, yandembopɨakatu.

⁴ Yarakuaa vae, oyemongeta mano re, ërei yarakuaambae, oyemongeta arete reño.

⁵ Yayeapɨsaka yarakuaa vae iporombosɨmbi re vae ko ikavi yae, yarakuaambae iñeeyukɨ re yayeapɨsaka vae güi.

⁶ Yarakuaambae vae ipuka ñana opiriri ókai yapepo igüɨ pe vae rami ko, jare kuae mbaeä etei vi ko.

⁷ Teko rai ombojopa yarakuaa vae, jare mbaemboepɨ vɨari güɨrokomegua jeko kavi.

⁸ Mbae yayapo vae yamboapɨ ma vae ikavi yae ko, yamboɨpɨ ramo etei vae güi. Yandepɨa guasu vae ko ikavi yae, yandepɨarai vae güi.

⁹ Agüɨye ndearasɨ katu, echa yarakuaambae reta ko iyarasɨ katu.

¹⁰ Agüɨye etei ere: “¿Maera pa ko arakae ikavi yae mbae, añave rupi vae güi?” Echa jókuae mbarandu, mbaetɨ ko arakuaa pegua.

¹¹ Arakuaa katu mbaeyekou ndive vae ikavi yae ko, opaete kuae ɨvɨ pe yogüɨreko vae pe.

¹² Echa arakuaa katu oporoepɨ vi ko korepoti rami, ërei arakuaa oyapɨraa yé korepoti, echa omee tekove katu jókuae arakuaa güɨnoi vae pe.

¹³ Emae kavi Tumpa jembiapo re; echa ¿kia pa ipuere ombosɨmbi jae omoapegüe?

¹⁴ Ikavi reiko yave, eyekou jókuae reiko kavi ramboeve; ërei mbaetɨ ikavi reiko yave eyemongeta, Tumpa jemimbota ko kuaekuae, kuimbae agüɨye vaerä oikuaa mbae ra ko oasata vae.

¹⁵ Opaete kuaekuae aecha michi pegua aikoveño aiko ramboeve, jae ko: Kuimbae jupi vae omano jupi rupi oiko reve, jare oime iyoa vae iyoa oiko reve oikopuku.

¹⁶ Agüɨye oasa ete ndepɨakavi, agüɨye vi oasa ete ndearakuaa. ¿Maera pa nde aeño reñemokañɨteukata?

¹⁷ Agüɨye oasa ete eyapo ikavimbae, agüɨye vi oasa ete ndearakuaambae. ¿Maera pa remanota, ndei remanoa oväe mbove?

¹⁸ Kuaekuae eyapo, jókuae ïru reta reeyambae reve. Echa Tumpa güi oipoɨu vae, oë kavita chupe opaete mbaembae.

¹⁹ Arakuaa omomɨ̈rata iyarakuaa vae, payandepo mburuvicha reta tëta guasu pe ñogüɨnoi vae güi.

²⁰ Añetete, mbaetɨ metei ave jupi vae kuae ɨvɨ pe, ikavi vae iyapoa jare mbaetɨi iyoa vae.

²¹ Agüɨye erovia opaete mbaembae reendugüe re, agüɨye vaerä rerovia nderembiokuai reta mbae jei ndekotɨ yave.

²² Echa nde reikuaa kavi vi ko reï, rere avei yepi ikavimbae ïru vae reta kotɨ.

Arakuaa jeka

²³ Opaete kuae ayapo chearakuaa reve; jae cheyeupe: “Tachearakuaa katu”, ërei mbaetɨ chearakuaa.

²⁴ ¡Mbaetɨ chepuere aikuaa opaete mbaembae oyeapogüe! ¡Yavai yae ko, mbaetɨ kia ipuere oikuaa!

²⁵ Jayave añeñono aikuaa kavi vaerä, ayemboe jare aeka arakuaa ikavigüe. Jare ayu aikuaa mbaetɨ ko ikavi yandearakuaambae vae jare mbokere ko yandearakuaambae vae.

²⁶ Ayu aikuaa mano güi ikavimbae yae ete vae, jae ko kuña ñuai rami, oporoitɨ jare oporoäpɨti. Tumpa reño oyeko vae ojoyepe chugüi, ërei iyoa vae, oa ipo pe.

²⁷ Aipota ramboeve aikuaa opaete mbaembae regua, che añemoñee vae, aikuaa vae jae ko:

²⁸ ¡Mbaetɨño aväe jókuae añetete aeka vae! Mil kuimbae güi aväe chupe metei, ërei metei ave kuña mbaetɨ aväe opaete vae güi.

²⁹ Aväe chupe vae jaeño kuae: Tumpa oyapo jupi kuimbae, ërei jae aeño oñererokomegua.